స్మార్ట్‌ డయల్‌ ఛార్జింగ్ కేస్‌తో నథింగ్ ఇయర్‌‌బడ్స్.. మార్కెట్‌ షేక్‌ కావడం పక్కా

అనూహ్యమైన సౌండ్ అనుభూతిని అందించే లక్ష్యంతో రూపుదిద్దుకున్న ట్రెండింగ్ ఓపెన్-ఇయర్ ట్రూ వైర్‌లెస్ ఇయర్‌బడ్స్ టెక్ ప్రపంచంలో తీవ్ర చర్చనీయాంశమయ్యాయి. ప్రత్యేకమైన స్మార్ట్ డయల్ ఛార్జింగ్ కేస్, శక్తివంతమైన బ్యాటరీ బ్యాకప్‌తో అడుగుపెట్టిన అద్భుతమైన గ్యాడ్జెట్ పూర్తి వివరాలు తెలుసుకుందాం.

స్కిన్-ఫ్రెండ్లీ మెటీరియల్స్‌..

నథింగ్ సబ్-బ్రాండ్ సిఎమ్‌ఎఫ్ నుండి సిఎమ్‌ఎఫ్ క్లిప్ ప్రో ఓపెన్-ఇయర్ ట్రూ వైర్‌లెస్ ఇయర్‌బడ్స్‌ను అంతర్జాతీయ మార్కెట్లలో లాంచ్ చేశారు. ఓపెన్-ఇయర్ క్లిప్-ఆన్ డిజైన్, 10.8mm డైనమిక్ డ్రైవర్, ఎల్‌డీఏసీ హై-రెజ్ ఆడియో సపోర్ట్, కృత్రిమ మేధ ఆధారిత కాలింగ్ ఫీచర్లు, అలాగే ఛార్జింగ్ కేస్‌లో ప్రత్యేక స్మార్ట్ డయల్ వంటి ఫీచర్లతో ఈ ఇయర్‌బడ్స్ లాంచ్ అయ్యాయి. సిఎమ్‌ఎఫ్ క్లిప్ ప్రోలో మూడు పాయింట్ క్లిప్ డిజైన్ ఉపయోగించారు. ఇది చెవిపై ఒత్తిడిని సమానంగా పంపిణీ చేయడం వల్ల ఎక్కువసేపు ధరించినా అసౌకర్యం కలగదు.

ప్రతి ఇయర్‌బడ్ బరువు కేవలం 5.92 గ్రాములు మాత్రమే. సి బ్రిడ్జ్‌లో ఫ్లెక్సిబుల్ టైటానియం వైర్ కోర్, స్కిన్-ఫ్రెండ్లీ మెటీరియల్స్‌ను ఉపయోగించగా ఆకౌస్టిక్ పాడ్ డిజైన్ శబ్దాన్ని నేరుగా చెవిలోకి సమర్థవంతంగా చేరేలా రూపొందించారు. ఆడియో కోసం 10.8mm డ్యూయల్-మాగ్నెట్ డైనమిక్ డ్రైవర్‌ను టీపీయూ ప్లస్ ఎల్‌సీపీ డయాఫ్రాగమ్‌తో అందించారు. ఇవి ఇరవై హెర్ట్జ్ నుంచి నలభై వేల హెర్ట్జ్ వరకు ఫ్రీక్వెన్సీ రెస్పాన్స్‌ను సపోర్ట్ చేస్తాయి. హై-రెజ్ ఆడియో వైర్‌లెస్ సర్టిఫికేషన్‌తో పాటు ఎల్‌డీఏసీ, ఏఏసీ, ఎస్బీసీ కోడెక్‌లకు మద్దతు ఉంది. అదనంగా స్టాటిక్ స్పేషియల్ ఆడియో, ఐదు ప్రీసెట్ ఈక్యూ మోడ్‌లు అందుబాటులో ఉన్నాయి.

కాలింగ్ ఫీచర్లు

కాల్స్ కోసం ప్రతి ఇయర్‌బడ్‌లో రెండు చొప్పున మొత్తం నాలుగు హెచ్‌డీ మైక్రోఫోన్‌లు ఉన్నాయి. వీపీయూ ఆధారిత క్లియర్ వాయిస్ టెక్నాలజీ, ఎలిఫెంట్ సౌండ్ ఏఐ సహాయంతో గాలి శబ్దం, ట్రాఫిక్, చుట్టుపక్కల నాయిస్‌ను తగ్గించి స్పష్టమైన వాయిస్‌ను అందిస్తుంది. సౌండ్ సీల్ ఫీచర్ ద్వారా ఆడియో లీకేజ్‌ను తగ్గించవచ్చు. ఈ సెట్టింగ్‌లను నథింగ్ ఎక్స్ యాప్ ద్వారా మార్చుకోవచ్చు.

ఈ ఇయర్‌బడ్స్‌లో హైలైట్ ఛార్జింగ్ కేస్‌పై ఉన్న స్మార్ట్ డయల్. దీని ద్వారా వాల్యూమ్ మార్చడం, మ్యూజిక్ ప్లేబ్యాక్ నియంత్రించడం, కాల్స్ నిర్వహించడం, బ్లూటూత్ పెయిరింగ్ వంటి పనులను ఫోన్‌ను తాకకుండా చేయవచ్చు. ప్రతి ఇయర్‌బడ్‌పై ఫిజికల్ బటన్లు ఉండటం వల్ల వ్యాయామం చేసే సమయంలో సులభంగా నియంత్రించవచ్చు.

బ్యాటరీ సామర్థ్యం

ప్రతి ఇయర్‌బడ్‌లో 60mAh బ్యాటరీ, ఛార్జింగ్ కేస్‌లో 475mAh బ్యాటరీ అందించారు. ఒక్కసారి పూర్తి ఛార్జ్‌తో పది గంటల మ్యూజిక్ ప్లేబ్యాక్, కేస్‌తో కలిపి ముప్పై రెండున్నర గంటల వరకు బ్యాటరీ బ్యాకప్ లభిస్తుంది. కేవలం పది నిమిషాల ఫాస్ట్ ఛార్జింగ్‌తో నాలుగు గంటల ప్లేబ్యాక్ లభిస్తుందని కంపెనీ తెలిపింది. వీటికి ఐపీ54 డస్ట్ అండ్ స్ప్లాష్ రెసిస్టెన్స్ రేటింగ్ లభించింది. సిఎమ్‌ఎఫ్ క్లిప్ ప్రో ధర అమెరికాలో 99 డాలర్లు కాగా, యూకేలో 79 పౌండ్లుగా నిర్ణయించారు.

డార్క్ గ్రే, లైట్ గ్రే, కోరల్ రంగుల్లో అందుబాటులోకి రానున్నాయి. ఈ ఇయర్‌బడ్స్ ఆగస్టు 15 నుంచి అమెరికా, యూకే, జపాన్ మార్కెట్లలో విక్రయాలు ప్రారంభం కానుండగా సెప్టెంబర్ 15 నుంచి యూరప్‌తో పాటు ఇతర అంతర్జాతీయ మార్కెట్లలో అందుబాటులోకి వస్తాయి. అయితే భారత మార్కెట్లో విడుదల చేయబోమని కంపెనీ స్పష్టం చేసింది. అద్భుతమైన ఫీచర్లతో వస్తున్న ఈ ఇయర్‌బడ్స్ టెక్ ప్రియులను విపరీతంగా ఆకట్టుకుంటున్నాయి.