చంద్రయాన్-2…. 20 గంటల కౌంట్ డౌన్ షురూ !

చంద్రయాన్-2 మిషన్ కి కౌంట్ డౌన్ మొదలైంది. సోమవారం తెల్లవారుజామున రెండు గంటల 51 నిముషాలకు శ్రీహరికోట నుంచి ప్రారంభం గల ఈ మిషన్ కి సంబంధించి ఆదివారం ఉదయం 6 గంటల 51 నిముషాలకు కౌంట్ డౌన్ మొదలుపెట్టారు. ఈ మిషన్ ద్వారా చంద్రునిపై రోబోటిక్ రోవర్ ని అడుగు పెట్టించాలన్నది మన ధ్యేయం. ఈ ప్రయోగంలో కక్ష్యలోకి అతి బరువైన రాకెట్ లాంచర్ ‘ జీ ఎస్ ఎల్వీ ..ఎంకే.-3 ‘ ని చంద్రునిపైకి ప్రయోగిస్తున్నట్టు ఇస్రో శాస్త్రవేత్తలు తెలిపారు. దీని మొత్తం కాల వ్యవధి ఏడాదిపాటని వారు పేర్కొన్నారు. 3.84 లక్షల కిలోమీటర్ల సుదీర్ఘ ప్రయాణం సాగించి దాదాపు రెండు నెలల అనంతరం ఈ రాకెట్ లాంచర్ చంద్రుని సౌత్ పోల్ సమీపంలో దిగుతుందని వారు వివరించారు. 640 టన్నుల రాకెట్ లాంచర్ అయిన దీన్ని ‘ బాహుబలి ‘గా అభివర్ణిస్తున్నారు. 15 అంతస్థుల బిల్డింగ్ అంతటి పొడవైన ఈ లాంచర్.. 3.8 టన్నుల బరువైన ఉపగ్రహాన్ని చంద్రునిపైకి మోసుకుపోతుంది. భారత దేశం ప్రయోగిస్తున్న అతి బరువైన లాంచర్లలో ఇది మూడవది. ఈ ప్రయోగాన్ని శ్రీహరికోట నుంచి రాష్ట్రపతి రామ్ నాథ్ కోవింద్ తిలకించనున్నారు. స్పేస్ పోర్ట్ నుంచి లైవ్ లాంచ్ ని చూసే మూడవ రాష్ట్రపతి కానున్నారు ఆయన.. దాదాపు రూ. 1,000 కోట్లతో చేపడుతున్న చంద్రయాన్-2 మిషన్ లో 1.4 టన్నుల విక్రమ్ లాండర్ కూడా ఓ భాగం. ఇది 27 కిలోల బరువైన ‘ ప్రగ్యాన్ ‘ రోవర్ ని మోసుకుపోతుంది. చంద్రుని సౌత్ పోల్ పై రెండు లోతైన ప్రదేశాల మధ్య ఈ రోవర్ దిగనుంది. ఈ రోవర్ చేసే 15 నిముషాల పని ‘ టెరిఫయింగ్ మూమెంట్స్ ‘ అని ఇస్రో చీఫ్ కె. శివన్ అభివర్ణించారు.ఇలాంటి క్లిష్టమైన పనిని తాము ఇదివరకెన్నడూ చేపట్టలేదన్నారు. ఈ ప్రయోగంలో ఇండియా సక్సెస్ అయితే.. ల్యూనార్ సర్ ఫేస్ పై తమ ఉపగ్రహాలను అడుగుపెట్టించడంలో విజయం సాధించిన నాలుగో దేశంగా అవతరిస్తుంది. ఈ ఏడాది ఆరంభంలో ఇజ్రాయెల్ ఇలాంటి ప్రయోగం చేసి విఫలమైంది.