జిమ్కు వెళ్లకుండానే బరువు తగ్గొచ్చు.. కోల్డ్ వెదర్లో హాట్గా, ఫిట్గా ఉంచే సూపర్ చిట్కాలు..
చలికాలంలో వ్యాయామం తగ్గడం, ఆకలి పెరగడం వల్ల బరువు పెరిగే అవకాశం ఉంటుంది. అయితే సరైన ఆహారం, తగినంత నీరు, ఆరోగ్యకరమైన పానీయాలు, చిన్నపాటి వ్యాయామాలతో బరువును నియంత్రించుకోవచ్చు. కొబ్బరి నీళ్లు, హెర్బల్ టీలు, పండ్లు, కూరగాయలు, తృణధాన్యాలను ఆహారంలో చేర్చుకోవడం మంచిది. రోజువారీ జీవనశైలిలో చిన్న మార్పులు చేసుకుంటే శీతాకాలంలోనూ ఫిట్గా ఉండవచ్చు.

భారతదేశంలో నవంబర్ నెలలో ప్రారంభమై ఫిబ్రవరి వరకు కొనసాగే శీతాకాలం, అత్యంత చల్లని వాతావరణాన్ని కలిగి ఉంటుంది. ఈ సీజన్లో ఉదయం నిద్రలేచి వ్యాయామశాలకు వెళ్లడం కొంత కష్టంగా అనిపిస్తుంది. ఇప్పటికే అధిక బరువు ఉన్నవారికి బద్ధకంతో వ్యాయామాలు వాయిదా పడటం సర్వసాధారణం. అయితే, ఈ కాలంలోనూ బరువు తగ్గడానికి సమర్థవంతమైన మార్గాలు ఉన్నాయి. చలికాలంలో ఆరోగ్యాన్ని కాపాడుకుంటూ బరువును అదుపులో ఉంచుకోవడానికి కొన్ని కీలకమైన ఆహారపు అలవాట్లు, జీవనశైలి మార్పులు అవసరం.
హైడ్రేషన్ కీలకం:
చలికాలంలో సాధారణంగా దాహం తక్కువగా అనిపిస్తుంది కాబట్టి, నీరు తాగడం తగ్గిపోతుంది. అయితే, ఇక్కడే ఒక ముఖ్యమైన విషయం ఉంది. శరీరానికి తగినంత నీరు అందకపోతే డీహైడ్రేషన్ ఏర్పడి, తరచుగా ఆకలిగా అనిపిస్తుంది. ఇది అనవసరమైన ఆహారాన్ని తీసుకోవడానికి దారితీస్తుంది, దీనివల్ల బెల్లీ ఫ్యాట్ తగ్గదు. కాబట్టి, చలికాలంలో ఖచ్చితంగా నీరు తాగాలి. చల్లటి నీరు తాగడం కష్టంగా అనిపిస్తే, గోరువెచ్చని నీటిని అలవాటు చేసుకోండి. గోరువెచ్చని నీరు తాగడం వల్ల శరీర ఉష్ణోగ్రత నియంత్రించబడి, రక్త ప్రసరణ పెరుగుతుంది. ఇది కొవ్వు కరగడానికి సహాయపడి, బరువు తగ్గడానికి తోడ్పడుతుంది. అధ్యయనాల ప్రకారం, మీ శరీర ఉష్ణోగ్రత కంటే చల్లని నీరు తాగితే, శరీరం దానిని వేడి చేయడానికి సమయం తీసుకుంటుంది. ఈ ప్రక్రియలో అవసరమైన క్యాలరీలు బర్న్ అవుతాయి. కాబట్టి, చల్లటి నీరు తాగగలిగితే మంచిది, లేకపోతే సాధారణ గది ఉష్ణోగ్రత వద్ద ఉన్న నీటిని తాగడం అలవాటు చేసుకోండి.
ఆరోగ్యకరమైన పానీయాలను ఎంచుకోండి:
నీటితో పాటు, కొన్ని ఆరోగ్యకరమైన పానీయాలు శీతాకాలంలో బరువు తగ్గడానికి సహాయపడతాయి.
కొబ్బరి నీళ్లు: కొబ్బరి నీళ్లలో నీటితో పాటు పొటాషియం వంటి ఎలక్ట్రోలైట్లు ఉంటాయి. వ్యాయామానికి ముందు తేలికపాటి, రుచికరమైన పానీయం కావాలనుకునే వారికి ఇది ఒక మంచి ఎంపిక. ఇది కొంతమేర పిండి పదార్థాలను కూడా అందిస్తుంది. చక్కెర కలపని కొబ్బరి నీళ్లను చిన్న గ్లాస్ తీసుకోవచ్చు.
బీట్రూట్ రసం: ఒక చిన్న బీట్రూట్ను శుభ్రంగా కడిగి నీటిలో కలిపి రసం తయారు చేసుకోవచ్చు. రుచి కోసం కొద్దిగా నిమ్మరసం కలపవచ్చు. ఇవి ఎంతో మంచివి.
హెర్బల్ టీలు: చల్లని వాతావరణంలో చాలామంది కాఫీ, టీ ఎక్కువగా తాగుతుంటారు. అయితే, చక్కెర, పాలు కలిపిన పానీయాలు ప్రమాదకరంగా మారవచ్చు. దీనికి బదులుగా బ్లాక్ టీ, హెర్బల్ టీలు (మందార టీ, ఊలాంగు టీ) ఎంచుకోండి. కాఫీలో కూడా యాంటీ ఇన్ఫ్లమేటరీ గుణాలు, యాంటీఆక్సిడెంట్లు ఎక్కువగా ఉంటాయి. వీటిని క్రమం తప్పకుండా తీసుకోవడం వల్ల జీవక్రియ పెరిగి బరువు తగ్గడం సులభమవుతుంది. అంతేకాకుండా, ఈ హెర్బల్ టీలు మంచి అనుభూతిని ఇస్తాయి.
ఆరోగ్యకరమైన ఆహారపు అలవాట్లు:
చలికాలంలో వాతావరణం చల్లగా ఉండటం వల్ల ఆకలి పెరుగుతుందని తేలింది. దీంతో ఎక్కువగా వేయించిన, నూనెతో కూడిన ఆహారాన్ని తీసుకుంటాం, దీనివల్ల క్యాలరీలు పెరుగుతాయి. అలా కాకుండా, ఫైబర్ అధికంగా ఉండే ఆరోగ్యకరమైన ఆహారాన్ని తీసుకోండి. ఇది శరీరానికి చాలా మంచిది. పండ్లు, కూరగాయలు, తృణధాన్యాలు వంటివి మీ ఆహారంలో చేర్చండి.
చురుకుగా ఉండండి:
జిమ్కు వెళ్లి వర్కవుట్ చేయకపోయినా, ఇంట్లోనే చురుకుగా ఉండవచ్చు. మెట్లు ఎక్కి దిగడం, డ్యాన్స్ చేయడం, స్కిప్పింగ్ వంటివి చేస్తూ బరువు తగ్గవచ్చు. చిన్నపాటి శారీరక శ్రమ కూడా కేలరీలను బర్న్ చేయడానికి, జీవక్రియను మెరుగుపరచడానికి సహాయపడుతుంది.
ఈ చిట్కాలను అనుసరించడం ద్వారా శీతాకాలంలో ఎదురయ్యే సవాళ్లను అధిగమించి, ఆరోగ్యంగా, ఫిట్గా ఉండవచ్చు. ఏమైనా అనారోగ్య సమస్యలుంటే నేరుగా ఆరోగ్య నిపుణులను సంప్రదించండి.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..
