చిరంజీవి రిక్షావోడు సినిమా చూస్తున్న టైంలో ఆ విషాదం తెలిసింది.. కన్నీళ్లు పెట్టుకున్న తాగుబోతు రమేష్
తెలుగు సినీ పరిశ్రమలో తన విలక్షణమైన శైలితో, ముఖ్యంగా తాగుబోతు పాత్రలతో ప్రేక్షకుల మన్నన పొందిన నటుడు తాగుబోతు రమేష్. ప్రస్తుతం సినిమాలతో పాటు టీవీ షోలు చేస్తూ ప్రేక్షకులను ఆకట్టుకున్నాడు తాగుబోతు రమేష్. గతంలో ఓ ఇంటర్వ్యూలో తాగుబోతు రమేష్ మాట్లాడుతూ..

తెలుగు సినీ ప్రేక్షకులకు ‘తాగుబోతు రమేష్’గా సుపరిచితుడైన నటుడు రమేష్, తన జీవితంలో ఎదురైన భావోద్వేగాలను, తీరని లోటును ఓ ఇంటర్వ్యూలో పంచుకున్నారు. గోదావరిఖని నేపథ్యం నుంచి వచ్చి, హాస్య నటుడిగా తనకంటూ ఒక ప్రత్యేక గుర్తింపును తెచ్చుకున్న రమేష్, తన వ్యక్తిగత జీవితంలోని కొన్ని ముఖ్య ఘట్టాలను స్మరించుకున్నారు. రమేష్ తన తల్లితో తనకున్న అనుబంధం గురించి వివరించారు. ఎప్పుడూ అమ్మతో ఎక్కువ అనుబంధం. మా అమ్మతోనే ఉండేవాడినని తెలిపారు. ఈ బలమైన అనుబంధం కారణంగా, 13-14 సంవత్సరాల వయసులో తన తల్లి టీబీతో మరణించినప్పుడు, అది తన జీవితాన్ని తీవ్రంగా ప్రభావితం చేసిందని రమేష్ పేర్కొన్నారు. ఆ సమయంలో ప్రపంచమే శూన్యంగా అనిపించిందని, ఎంతో ఏడ్చి ఏడ్చి కన్నీళ్లకు విరక్తి చెందానని ఆయన అన్నారు. తన తల్లి మరణం తర్వాత జీవితంపై ఆశ కోల్పోయినట్లు వెల్లడించారు. తండ్రి గురించి మాట్లాడుతూ, ఆయన నెగెటివ్ వ్యక్తి కాదని, సింగరేణిలో అందరూ మద్యం తాగినట్లే తన తండ్రి కూడా తాగేవారని చెప్పారు. తన తండ్రి అప్పుడప్పుడు తన అమ్మను తిట్టడం లేదా కొట్టడం వంటి సంఘటనలు చూసినప్పుడు, అమ్మను సంతోషపెట్టడానికి తండ్రిని అనుకరిస్తూ తాగుబోతు నటన చేసేవాడినని రమేష్ గుర్తు చేసుకున్నారు. అప్పుడు తన అమ్మ చాలా సంతోషించేదని, తన భర్త లాగే వీడు కూడా తాగుబోతు అవుతాడని సరదాగా అనేదని తెలిపారు. ఈ చిన్ననాటి అనుకరణలే తన వృత్తి జీవితానికి పునాది వేశాయని రమేష్ అన్నారు.
తాను చిన్నతనంలో ‘సింధూరపువ్వు’ సినిమా చూసేందుకు రాజేష్ థియేటర్కు వెళ్ళినప్పుడు, తల్లికి తెలియకుండా సినిమా చూసినందుకు ఆమె తనను కొట్టిందని రమేష్ గుర్తు చేసుకున్నారు. అలాగే, చిరంజీవి ‘రిక్షావోడు’ సినిమా చూస్తుండగా, తన తల్లి చనిపోయిందని స్నేహితుడు చెప్పిన విషాద సంఘటనను కూడా ఆయన ప్రస్తావించారు. ఈ మూడు సంఘటనలు తల్లికి తెలియకుండా సినిమా చూడడం, తల్లి మరణ వార్త విన్నప్పుడు సినిమా థియేటర్లో ఉండడం, చిన్నతనంలో తండ్రి తాగే అలవాటును అనుకరించడం ఇవన్నీ తన ప్రస్తుత సినిమా జీవితానికి ఎంతో దగ్గరి సంబంధం కలిగి ఉన్నాయని రమేష్ భావోద్వేగంగా వెల్లడించారు.
నేడు తాను అదే సినిమాలో నటిస్తున్నానని, ‘తాగుబోతు రమేష్’గా గుర్తింపు పొంది, మంచి పేరు సంపాదించుకున్నానని, కుటుంబానికి ఆర్థికంగా చేయూతనిచ్చి, కారులో తిరుగుతూ, ఇల్లు కొన్నానని రమేష్ సంతోషం వ్యక్తం చేశారు. అయితే, ఈ విజయాలను తన తల్లి చూడలేకపోవడం అనేది తన జీవితంలో ఎప్పటికీ పూడ్చలేని లోటు అని ఆయన కన్నీటి పర్యంతమయ్యారు. తన తల్లి ఇప్పటికీ తనతోనే ఉందని భావిస్తానని, తనకు నంది అవార్డు వచ్చినప్పుడు కూడా తల్లి లేని లోటు స్పష్టంగా కనిపించిందని రమేష్ అన్నారు. చిన్నతనంలోనే తల్లి చనిపోవడం వల్ల తన విజయాన్ని, తన కుటుంబాన్ని ఆమె చూడలేకపోయిందని ఆయన ఆవేదన చెందారు. తల్లిదండ్రులిద్దరూ చనిపోయినప్పటికీ, తల్లితో తనకు ఎక్కువ అనుబంధం ఉండడం వల్ల ఆమె లేని లోటు మరింత ఎక్కువగా అనిపిస్తుందని ఆయన తెలిపారు. తన అన్నలు, వదినలు స్వార్థం లేకుండా తనను బాగా చూసుకున్నారని, వారి ప్రేమ, నమ్మకం తన విజయానికి ఒక కారణమని రమేష్ పేర్కొన్నారు.
మరిన్ని సినిమా వార్తల కోసం ఇక్కడ క్లిక్ చేయండి




