అది ఇది వద్దు.. కోడి కాళ్ల పులుసు ఇలా చేశారంటే తెపాళ్ల గిన్నె మొత్తం ఊడ్వాల్సిందే..

Kodi kalla pulusu: కోడి కాళ్లు.. (Chicken Feet) పోషకాల గని. వీటిలో కొల్లాజెన్, ప్రోటీన్, కాల్షియం, భాస్వరం, జింక్ పుష్కలంగా ఉంటాయి. ఇవి కీళ్ల నొప్పులను తగ్గించి, చర్మ సౌందర్యాన్ని పెంచి, ఎముకలను బలోపేతం చేస్తాయని డైటీషియన్లు చెబుతున్నారు. దీంతోపాటు.. రోగనిరోధక శక్తిని పెంచి, రక్తహీనతను నివారించడంలో, ఆరోగ్యకరమైన జీర్ణవ్యవస్థకు కూడా ఇవి సహాయపడతాయని పేర్కొంటున్నారు. నాన్ వెజ్ ప్రియులు.. కోడి కాళ్లను చాలా మంది తింటారు.. కోడి కాళ్లను పులుసు మాదిరిగా ఇష్టంగా వండుకుని.. ఆస్వాదిస్తారు.. దీని రుచి అద్భుతంగా ఉంటుంది.. కోడి కాళ్ళు తినడం వల్ల శరీరంపై సానుకూల ప్రభావాలు కనిపిస్తాయని.. ఇంకా ఎన్నో ప్రయోజనాలను పొందవచ్చని నిపుణులు చెబుతున్నారు.

వాస్తవానికి కోడి కాళ్ళ పులుసు తెలుగు వంటకాల్లో ఒక ప్రత్యేకమైన రుచి. ఈ పులుసును తయారు చేయడానికి ముందుగా కోడి కాళ్ళను స్టవ్ మీద కాల్చి, వాటిపై ఉన్న తోలును, గోర్లను తీసివేయాలి. శుభ్రం చేసిన కోడి కాళ్ళను చిన్న ముక్కలుగా కట్ చేసి కడగాలి.

తయారీకి కావలసిన పదార్థాలు:

కోడి కాళ్ళు, నూనె, పచ్చిమిర్చి, ఉల్లిపాయలు, అల్లం వెల్లుల్లి పేస్టు, పసుపు, ఉప్పు, టమాటో, కారం, నీళ్లు, రోట్లో దంచిన మసాలా, చికెన్ మసాలా, కొత్తిమీర.

వంట ప్రారంభించడానికి, కడాయిలో నూనె వేసి, పచ్చిమిర్చి, సన్నగా తరిగిన ఉల్లిపాయ ముక్కలు వేసి ఎర్రగా వేయించాలి. ఉల్లిపాయలు వేగిన తర్వాత ఉప్పు, అల్లం వెల్లుల్లి పేస్టు, పసుపు వేసి పచ్చివాసన పోయేంతవరకు వేయించాలి. ఆ తర్వాత శుభ్రం చేసుకున్న కోడి కాళ్ళను వేసి బాగా కలపాలి. తరిగిన టమాటో ముక్కలు వేసి పది నిమిషాలు మూత పెట్టి మగ్గించాలి.

టమాటో మగ్గిన తర్వాత కారం, ఒక గ్లాసు నీళ్లు పోసి, గ్రేవీ చిక్కబడేంత వరకు పది నిమిషాల పాటు ఉడికించాలి. చివరగా రోట్లో దంచిన మసాలా, చికెన్ మసాలా, కొత్తిమీర వేసి రెండు నిమిషాలు ఉంచి స్టవ్ ఆఫ్ చేయాలి.

ఇంతటితో ఎంతో రుచిగా ఉండే కోడి కాళ్ళ పులుసు సిద్ధం అవుతుంది.. వేడి వేడి అన్నంలోకి ఈ పులుసు అద్భుతమైన రుచిని అందిస్తుంది. ఇంకెందుకు ఆలస్యం.. ఈ వంటకాన్ని ఇంట్లో ప్రయత్నించి, అద్భుతమైన రుచిని ఆస్వాదించండి.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..