Sleep Tips: నిద్రలేమితో బాధపడుతున్నారా? పవర్ నాప్‌తో మీ సమస్యకు చెక్ పెట్టండిలా!

నేటి వేగవంతమైన ప్రపంచంలో చాలామంది నిద్రలేమి సమస్యలతో సతమతమవుతున్నారు. ఈ నిద్రలేమి కారణంగా మానసిక, శారీరక అలసట పెరిగి, రోజువారీ కార్యకలాపాలు దెబ్బతింటున్నాయి. అయితే, ఈ సమస్యకు పరిష్కారంగా పగటిపూట కాసేపు విశ్రాంతి తీసుకోవడం (పవర్ నాప్) చాలా ఉపయోగకరమని ఆరోగ్య నిపుణులు చెబుతున్నారు. కేవలం 15 నుంచి 30 నిమిషాల పవర్ నాప్ మన ఆరోగ్యాన్ని, పనితీరును మెరుగుపరుస్తుంది.

పవర్ నాప్ మెదడుకు చాలా ఉపయోగకరం. ఇది జ్ఞాపకశక్తి, ఏకాగ్రత, సృజనాత్మకతను పెంచుతుంది. ముఖ్యంగా, రాత్రి నిద్ర సరిగా లేనివారు పగటిపూట ఈ చిన్న కునుకు వల్ల రోజంతా చురుకుగా, ఉత్సాహంగా ఉండగలుగుతారు. కొన్ని పరిశోధనల ప్రకారం, పవర్ నాప్ గుండె ఆరోగ్యానికి కూడా మేలు చేస్తుందని తేలింది. వారానికి ఒకటి లేదా రెండుసార్లు పవర్ నాప్ తీసుకునేవారికి గుండె జబ్బులు వచ్చే ప్రమాదం తక్కువగా ఉంటుందని ఒక అధ్యయనంలో వెల్లడైంది. అలాగే, పవర్ నాప్ రక్తపోటును తగ్గించి, ఒత్తిడి హార్మోన్ల స్థాయిలను అదుపులో ఉంచుతుంది. ఇది మనకు మానసిక ప్రశాంతతను కూడా అందిస్తుంది.

అయితే, పవర్ నాప్ విషయంలో కొన్ని జాగ్రత్తలు తీసుకోవాలి. ఒకవేళ మీరు ఎక్కువ సేపు అంటే గంటకు మించి నిద్రపోతే, అది మీ రాత్రి నిద్రకు భంగం కలిగిస్తుంది. దీన్ని స్లీప్ ఇనర్షియా అని అంటారు. దీనివల్ల రాత్రి సరిగా నిద్ర పట్టకపోవడమే కాకుండా, ఉదయం లేచినప్పుడు మగతగా, బద్ధకంగా అనిపించవచ్చు.

కాబట్టి, పవర్ నాప్ తీసుకోవడానికి సరైన సమయం, వ్యవధి ఎంచుకోవడం ముఖ్యం. మధ్యాహ్నం 1 నుండి 3 గంటల మధ్యలో కునుకు తీయడం ఉత్తమం. సాయంత్రం 3 గంటల తర్వాత తీసుకునే కునుకు రాత్రి నిద్రపై ప్రభావం పడుతుంది. మీకు నిద్ర సమస్యలు ఉన్నా లేదా పగటిపూట విపరీతమైన నిద్ర వస్తున్నట్లు అనిపించినా, వైద్యుడిని సంప్రదించడం మంచిది. సరైన పద్ధతిలో పవర్ నాప్ తీసుకుంటే, మనం ఆరోగ్యంగా, ఉత్సాహంగా ఉండవచ్చు.