Dil Raju: ఆ ప్రభాస్ సినిమా ఫ్లాప్ అవుతుందని ముందే తెలుసు.. లోపం అర్థమైంది కానీ..

సినీ నిర్మాత దిల్‌ రాజు తన సుదీర్ఘ సినీ ప్రయాణంలో ఎదురైన అనుభవాలను, నైతిక విలువల ప్రాధాన్యతను ఓ ఇంటర్వ్యూలో పంచుకున్నారు. మున్నా చిత్రం పరాజయంపై స్పందిస్తూ, అది తనకు ముందే తెలిసిందని, ఆ సమయంలో పడిన వేదనను వివరించారు. “మున్నా సినిమా 3 గంటల షో చూడగానే ఏదో లోపం ఉందని అర్థమైపోయింది,” అని రాజు వెల్లడించారు. ప్రింట్లు పంపిన తర్వాత తన డిస్ట్రిబ్యూటర్లకు ఫోన్ చేసి, సినిమా కొంత నిరాశపరచవచ్చని, కానీ తాను అండగా ఉంటానని భరోసా ఇచ్చారు. మణిరత్నం చెలియా విషయంలోనూ ఇదే అనుభవం ఎదురైందని, రిలీజ్‌కు ముందు రోజునే అది బ్యాడ్ ఫిలిం అని తెలిసి అందరికీ చెప్పానని పేర్కొన్నారు. తన కెరీర్‌లో 90% నైతిక విలువలకే కట్టుబడి ఉంటానని దిల్ రాజు స్పష్టం చేశారు. దువ్వాడ జగన్నాథం వంటి చిత్రాల విషయంలో, సినిమా మొత్తం సిద్ధమై తాను చూసుకునే వరకు పంపిణీదారులను డబ్బు కట్టమని అడగలేదని ఆయన చెప్పారు. సినిమా విజయం సాధిస్తుందా లేదా అనే అంచనా తనకు ఎడిటింగ్ రూమ్‌లోనే 90% వరకు తెలిసిపోతుందని, అనుమానం ఉన్నప్పుడు మానసికంగా నష్టానికి సిద్ధపడతానని వెల్లడించారు. విమర్శలను, వెనుకమాటలను ఎదుర్కొన్నప్పుడు బాధపడతానని, అయితే ప్రతి ఒక్కరూ వారి దృష్టికోణంలో సరైనవారేనని భావిస్తానని దిల్ రాజు అన్నారు.

రుద్రమదేవి చిత్రం విషయంలో తనకు బాగా బాధ కలిగిందని, కానీ అటువంటి సంఘటనల నుంచి నేర్చుకుని, మళ్ళీ తప్పు జరగకుండా చూసుకుంటానని పేర్కొన్నారు. వ్యక్తులతో సంబంధాల విషయంలో, వారి మంచి చెడులను విశ్లేషించి, మంచి లక్షణాలు నచ్చితే సంబంధాలను కొనసాగిస్తానని, లేకపోతే నెమ్మదిగా దూరం అవుతానని చెప్పారు. దిల్‌ రాజు డిస్ట్రిబ్యూటర్‌గా కెరీర్ ప్రారంభించినప్పటి నుంచి పంపిణీదారుల కష్టాలను దగ్గరగా చూశారు. అతడు, పోకిరి, ఖుషి వంటి బ్లాక్‌బస్టర్‌ల సమయంలోనూ, నిన్నే ఇష్టపడ్డాను, జై వంటి చిత్రాలతో నష్టపోయినప్పుడు ఆర్య వంటి సినిమాలు తనకు మ్యాజిక్‌లా ఆదుకున్నాయని గుర్తుచేసుకున్నారు. డబ్బును ప్రేమించడం కన్నా నిలబడటమే ముఖ్యమని, విజయం ద్వారా వచ్చే డబ్బే తనకు కావాలని ఆయన తెలిపారు. పంపిణీదారులు సినిమా పరిశ్రమలో 90% నష్టపోతారని, సంవత్సరంలో 100 సినిమాలు కొంటే 10-20 మాత్రమే విజయవంతం అవుతాయని రాజు  ఆవేదన వ్యక్తం చేశారు. విజయవంతమైనప్పుడు తమ సినిమాలను పంపిణీదారులు దోచుకుంటున్నారు అనే భావన నిర్మాతల‌లో ఉంటుందని, అయితే తమ ఫ్లాప్ చిత్రాల వల్ల పంపిణీదారులు నష్టపోతున్నారని ఎవరూ ఆలోచించరని ఆయన పేర్కొన్నారు. అందుకే తాను తన పంపిణీదారులను కాపాడుకోవడానికి ప్రయత్నిస్తానని, 90% విజయం సాధించానని చెప్పారు. అయితే, పంపిణీదారులలో కూడా చిన్న చిన్న తప్పులు, స్వార్థాలు ఉంటాయని అంగీకరించారు. సినిమా వ్యవస్థను మెరుగుపరచడానికి త్వరగా ఆన్‌లైన్ వ్యవస్థ రావాలని, అది పారదర్శకతను పెంచి, నిర్మాతలందరికీ సహాయపడుతుందని దిల్ రాజు ఆకాంక్షించారు.

Also Read: ఆమె ఎప్పుడూ నా చేయి వదల్లేదు.. అలేఖ్య తారకరత్న అంతరంగం ఇదే..