Donkey Milk: చిన్నారులకు గాడిద పాలు ఇవ్వడం మంచిదేనా.. తాగిస్తే ఏమవుతుంది.?

స్కూలుకు డుమ్మా కొట్టే వారిని చదువుకోకుండా గాడిదలు కాసుకుంటావా.? అంటుంటారు. అయితే ఇప్పుడు గాడిదలు పెంచుతూ కోట్లు సంపాదిస్తున్నారు. ఎంతో మంది సక్సెస్‌ స్టోరీలకు సంబంధించిన కథనాలు సోషల్‌ మీడియాలో వైరల్‌ అవుతున్నాయి. గాడిద పాలను విక్రయిస్తూ లక్షల్లో సంపాదిస్తున్నారు. దీంతో అసలు గాడిద పాలకు ఎంతకు అంత డిమాండ్ ఉందన్న దాని గురించి తీవ్ర స్థాయిలో చర్చ నడుస్తోంది. చిన్నారులకు గాడిద పాలు ఇవ్వడం ద్వారా ఎంతో మేలు జరుగుతుందని నిపుణులు చెబుతున్నారు.

గాడిద పాలను అందించడం ద్వారా చిన్నారుల ఆరోగ్యం మెరుగుపడుతుందని చెబుతుంటారు. ముఖ్యంగా గ్రామీణ ప్రాంతాల్లో వీధి వీధి తిరుగుతూ గాడిద పాలను విక్రయిస్తుంటారు. అయితే గాడిద పాలను చిన్నారులకు తాగిపించడం ద్వారా ఎలాంటి లాభాలు ఉంటాయి.? అసలు చిన్నారులకు గాడిద పాలను పట్టడం మంచిదేనా.? లాంటి వివరాలు ఇప్పుడు తెలుసుకుందాం..

గాడిద పాలలో ఎన్నో పోషకాలు ఉంటాయని నిపుణులు చెబుతున్నారు. ముఖ్యంగా ఆవు, గేదె, మేక, ఇతర పాడి జంతువుల పాలతో పోలిస్తే గాడిద పాలలో.. తల్లి పాలలో ఉండే పోషకాలు ఉన్నట్లు పలు పరిశోధనల్లో వెల్లడైంది. గాడిద పాలలో ఆవు పాలతో సమానమైన ప్రొటీన్లు, విటమిన్లు, ఖనిజాలు ఉంటాయని నిపుణులు చెబుతున్నారు. అందుకే వీటిని శిశువులకు పట్టించడం మంచిదని చెబుతున్నారు. ముఖ్యంగా శ్వాస సంబంధిత సమస్యలను సైతం గాడిద పాలు దూరం చేస్తాయని నిపుణులు అంటున్నారు.

దగ్గు, దమ్ము వంటి సమస్యలతో బాధపడే చిన్నారులకు గాడిద పాలు బెస్ట్‌ రెమెడీ అని చెబుతుంటారు. ఇన్ఫెక్షన్లూ, కోరింత దగ్గు, ఆర్థరైటిస్, వైరల్‌ జ్వరాలు, ఆస్తమా, గాయాలు నయం చేసేందుకు గాడిదపాలను మందుగా వాడుతుంటారని నిపుణులు సూచిస్తున్నారు. గాడిద పాలలో యాంటీ మైక్రోబయాల్‌ లక్షణాలు పుష్కలంగా ఉంటాయి. ఇవి అంటువ్యాధులు, బ్యాక్టీరియా, ఇతర వైరస్‌ల బారి నుంచి శరీరాన్ని రక్షిస్తున్నాయి. గాడిద పాలను తీసుకోవడం వల్ల నిద్రలేమి, ఎసిడిటీతోపాటు ఎగ్జిమా, సిఫిలిస్‌, స్కాబిస్‌, దురద, తామర వంటి సమస్యల నుంచి బయటపడొచ్చు. రోగ నిరోధక శక్తిని పెంచడంలో కీలకపాత్ర పోషిస్తాయని అంటున్నారు. గాడిద పాలలో ఉండే లాక్టోస్ ఎముకలను బలంగా మార్చడంలో ఉపయోగపడుతుంది.

ఇక కేవలం శరీర ఆరోగ్యాన్ని మాత్రమే కాకుండా చర్మ ఆరోగ్యాన్ని సంరక్షించడంలో కూడా గాడిద పాలు బాగా ఉపయోగపడతాయి. గాడిద పాలను ఎన్నో సౌందర్య ఉత్పత్తుల్లో ఉపయోగిస్తున్నారు. వీటిలో ఉండే ప్రొటీన్లు యాంటీఆక్సిడెంట్లుగా పనిచేసి చర్మ కణాలను ఆక్సీకరణ నష్టం నుంచి కాపాడడంలో సహాయపడతాయి. గాడిద పాలను విక్రయిస్తూ లక్షలు ఆర్జిస్తుండడానికి ప్రధాన కారణం ఇదేనని చెప్పాలి.

నోట్‌: పైన తెలిపిన విషయాలు కేవలం ప్రాథమిక సమాచారం మేరకు మాత్రమే. ఆరోగ్యానికి సంబంధించి వైద్యుల సూచనలు పాటించడమే ఉత్తమం.

మరిన్ని లైఫ్‌ స్టైల్‌ వార్తల కోసం క్లిక్‌ చేయండి..