Health Tips: రోజంతా కూర్చునే పనిచేస్తున్నారా..? అయితే ఈ సమస్యలు ఖాయం..
ఆఫీసులో రోజంతా కుర్చీపై కూర్చోవడం వెన్ను లేదా మెడ నొప్పికి మాత్రమే పరిమితం కాదు. ఎక్కువసేపు ఒకే స్థితిలో కూర్చోవడం వల్ల మీ శరీర అంతర్గత నిర్మాణంపై తీవ్ర ప్రభావం చూపుతుంది. అటువంటి పరిస్థితిలో.. ఎముకల సహజ ఆకారం, సమతుల్యత క్రమంగా క్షీణిస్తుంది. దీని కారణంగా అనేక ఆరోగ్య సమస్యలు వస్తాయి.
Updated on: Aug 12, 2025 | 2:14 PM
ప్రస్తుతం చాలామంది ఉద్యోగులు గంటల తరబడి ఆఫీస్ కుర్చీలో కూర్చుని పనిచేస్తున్నారు. ఇది ఆఫీస్ చైర్ సిండ్రోమ్ అనే తీవ్రమైన ఆరోగ్య సమస్యకు దారితీస్తోందని నిపుణులు హెచ్చరిస్తున్నారు. ఎక్కువసేపు ఒకే స్థితిలో కూర్చోవడం వల్ల శరీర బరువు వెన్నెముక, తుంటి, కాళ్ల ఎముకలపై పడుతుంది. దీనివల్ల కండరాలు బలహీనపడటం, ఎముక సాంద్రత తగ్గడం, కీళ్లపై ఒత్తిడి పెరగడం వంటి సమస్యలు తలెత్తుతాయి.
శరీరంపై ప్రభావాలు..
నిరంతరం కూర్చునే అలవాటు కండరాలు, ఎముకల్లో అసమతుల్యతకు కారణమవుతుంది. ఇది వెన్నెముక, మెడ, భుజాలు, తుంటిపై తీవ్ర ప్రభావం చూపుతుంది.రోజూ 8 గంటలు కూర్చున్నప్పుడు, శరీరంలోని కొన్ని భాగాలపై నిరంతర ఒత్తిడి ఉంటుందని ఆరోగ్య నిపుణులు చెబుతున్నారు. దీనివల్ల ఎముకలు వాటి సహజ ఆకారాన్ని కోల్పోతాయి. వెన్నెముక వంకరగా మారడం, తుంటి ఎముకలు బయటికి రావడంతో పాటు మోకాలి కీళ్ల కోణం కూడా మారవచ్చని సూచిస్తున్నారు.
వెన్ను – కీళ్ల సమస్యలు:
తప్పుడు స్థితిలో కూర్చోవడం వల్ల వెన్నునొప్పి, డిస్క్లు జారడం వంటివి జరుగుతాయి.
రక్త ప్రసరణ సమస్యలు:
ఎక్కువసేపు కూర్చోవడం వల్ల కాళ్లలో రక్త ప్రసరణ నెమ్మదించి.. సిరలు , వెరికోస్ వెయిన్లు ఉబ్బే ప్రమాదం పెరుగుతుంది.
ఎముక సాంద్రత తగ్గడం:
నిరంతర ఒత్తిడి వల్ల ఎముక సాంద్రత తగ్గిపోయి, ఆస్టియోపోరోసిస్కు దారితీస్తుంది.
బరువు పెరగడం:
తక్కువ కదలిక వల్ల కేలరీలు తక్కువగా ఖర్చవుతాయి. ఇది బరువు పెరగడానికి, మధుమేహం, అధిక రక్తపోటు వంటి జీవక్రియ రుగ్మతలకు కారణమవుతుంది.
ఈ సమస్యల నుంచి రక్షణ పొందాలంటే కొన్ని సాధారణ జాగ్రత్తలు తీసుకోవడం ముఖ్యం:
విరామం తీసుకోవడం:
ప్రతి 30-40 నిమిషాలకు ఒకసారి లేచి 2-3 నిమిషాలు నడవాలి.
సరైన భంగిమ:
పనిచేసేటప్పుడు మానిటర్ కంటి స్థాయిలో ఉండేలా చూసుకోవాలి. వెన్నెముకకు మద్దతు ఇచ్చే ఎర్గోనామిక్ కుర్చీని ఉపయోగించాలి.
వ్యాయామం:
రోజూ కనీసం 30 నిమిషాలు వ్యాయామం లేదా నడక వంటివి చేయాలి.
నీరు త్రాగడం:
తరచుగా నీళ్లు తాగడానికి లేచి వెళ్లడం ద్వారా శరీర కదలిక పెరుగుతుంది.
ఈ చిన్నపాటి మార్పులతో ఆఫీస్ చైర్ సిండ్రోమ్ నుంచి దూరంగా ఉండవచ్చని నిపుణులు సూచిస్తున్నారు.
(NOTE: ఇందులోని అంశాలు కేవలం అవగాహన కోసం మాత్రమే. నిపుణులు అందించిన సమాచారం ప్రకారం ఇక్కడ తెలియజేయడమైనది. ఆరోగ్యరీత్యా ఎలాంటి సమస్యలు ఉన్నానేరుగా వైద్య నిపుణులను సంప్రదించడం మంచిది)
మరిన్ని లైఫ్ స్టైల్ న్యూస్ కోసం క్లిక్ చేయండి..
