చికెన్ బిర్యానీ అని చెత్త తినకండి.. ఓసారి ఇలా వండి తినండి, అసలు మజా తెలుస్తుంది!

హైదరాబాద్ చికెన్ దమ్ బిర్యానీ ప్రపంచవ్యాప్తంగా ప్రసిద్ధి చెందిన ఒక ఐకానిక్ వంటకం. అయితే దాన్ని అసలైన రుచి తెలియకుండా చాలా మంది ఏది పడితే అది తిని.. ఇదే అసలైన చికెన్ దమ్ బిర్యానీ అనుకంటున్నారు. అయితే దాని సున్నితమైన రుచి, అద్భుతమైన సుగంధం, దమ్ పద్ధతిలో నెమ్మదిగా వండటం వల్ల వచ్చే ప్రత్యేకత ఈ బిర్యానీని ఎంతో మందికి ఇష్టమైన వంటకంగా మార్చింది. ఈ వ్యాసంలో 1 కిలో చికెన్, బాస్మతి బియ్యంతో ఇంట్లోనే రుచికరమైన హైదరాబాద్ చికెన్ దమ్ బిర్యానీని ఎలా తయారు చేయాలో వివరంగా తెలుసుకుందాం..

కావాల్సిన పదార్థాలు:

• బాస్మతి బియ్యం – 1 కిలో (కడిగి, నానబెట్టి)
• చికెన్ – 1 కిలో
• నిమ్మరసం – 2 నిమ్మకాయల నుండి
• అల్లం వెల్లుల్లి పేస్ట్ – తగినంత
• పెరుగు – 200 గ్రాములు
• నూనె – 250 గ్రాములు (ఉల్లిపాయలు వేయించడానికి)
• మధ్యస్థ సైజు ఉల్లిపాయలు – 4 (సన్నగా కోసి వేయించి)
• పుదీనా ఆకులు – 1 కట్ట
• కొత్తిమీర – 1 కట్ట
• పసుపు – 1 టేబుల్ స్పూన్
• గరం మసాలా – 1/2 టేబుల్ స్పూన్
• ధనియాల పొడి – 1 టేబుల్ స్పూన్
• ఉప్పు – తగినంత
• బియ్యం కోసం మసాలాలు: యాలకులు (4-5), లవంగాలు (5-6), దాల్చినచెక్క (5-6 ముక్కలు), బిర్యానీ ఆకులు (5), షాజీరా (1 టేబుల్ స్పూన్), ఉప్పు.

కుంకుమపువ్వు (సాఫ్రాన్) – కొద్దిగా

ఫుడ్ కలర్ – కొద్దిగా (నీటిలో కలిపి)

తయారీ విధానం:

చికెన్ మ్యారినేషన్ (అఖ్ని తయారీ)

ముందుగా, ఒక పెద్ద గిన్నె (బగోనా) తీసుకుని శుభ్రం చేసిన చికెన్‌ను అందులో వేయాలి. తరువాత అల్లం వెల్లుల్లి పేస్ట్, నిమ్మరసం, కుంకుమపువ్వు, సగం వేయించిన ఉల్లిపాయలను చేతితో మెత్తగా చేసి కలపాలి. పసుపు, గరం మసాలా, ధనియాల పొడి, తగినంత ఉప్పు వేసి బాగా కలుపుకోవాలి. తరువాత పుదీనా, కొత్తిమీర ఆకులు వేయాలి. చివరగా, పెరుగును వేసి అన్నింటినీ చికెన్‌కు బాగా పట్టేలా కలపాలి. ఈ మిశ్రమానికి వేయించిన ఉల్లిపాయల నుండి వచ్చిన సగం నూనెను కలిపి, రుచి చూసి ఉప్పు, కారం సరిచూసుకోవాలి. ఈ మ్యారినేట్ చేసిన చికెన్‌ను కనీసం అరగంట పాటు పక్కన పెట్టాలి.

బియ్యం వండటం

మరో పెద్ద గిన్నెలో తగినంత నీటిని మరిగించాలి. నీరు మరుగుతున్నప్పుడు, బియ్యం కోసం సిద్ధం చేసిన యాలకులు, లవంగాలు, దాల్చినచెక్క, బిర్యానీ ఆకులు, షాజీరా మరియు తగినంత ఉప్పు వేయాలి. నీరు బాగా మరుగుతున్నప్పుడు, నానబెట్టిన బాస్మతి బియ్యాన్ని అందులో వేయాలి. బియ్యం 50% మాత్రమే ఉడికే వరకు వండాలి. అంటే బియ్యం సగం ఉడికి, ఇంకా కొద్దిగా గట్టిగా ఉండాలి. బియ్యం ఉడికిన తర్వాత వెంటనే నీటిని వడగట్టి పక్కన పెట్టుకోవాలి.

దమ్ ఇవ్వడం

మ్యారినేట్ చేసిన చికెన్ ఉన్న గిన్నెను తీసుకుని, దానిపై సగం ఉడికిన బియ్యాన్ని సమానంగా పరచాలి. బియ్యం పొర పైన మిగిలిన నూనెను (చికెన్ నుండి వేయించిన ఉల్లిపాయల నూనె) పోయాలి. తరువాత మిగిలిన వేయించిన ఉల్లిపాయలు, ఆహార రంగు కలిపిన నీటిని అక్కడక్కడా వేయాలి. కొద్దిగా పుదీనా, కొత్తిమీర ఆకులను కూడా చల్లాలి.

ఇప్పుడు, గిన్నెను అల్యూమినియం ఫాయిల్ పేపర్‌తో గట్టిగా మూసి, దానిపై గట్టి మూత పెట్టాలి. ఆ తర్వాత మూతపై బరువుగా ఉండే రాయి (ఓకలి) లేదా ఏదైనా భారీ వస్తువును పెట్టాలి. స్టవ్‌పై ఒక మందపాటి పెనాన్ని (తవా) పెట్టి, దానిని మధ్యస్థ మంటపై వేడి చేయాలి. పెనం వేడయ్యాక, బిర్యానీ గిన్నెను దానిపై ఉంచి, మధ్యస్థ మంటపై అరగంట పాటు దమ్ ఇవ్వాలి. ఈ దమ్ పద్ధతి వల్ల బిర్యానీకి అద్భుతమైన సువాసన, రుచి వస్తాయి మరియు చికెన్ బాగా ఉడుకుతుంది. అరగంట తర్వాత, స్టవ్ ఆపి, దమ్ గిన్నెను జాగ్రత్తగా తెరవాలి. వేడి వేడి, సువాసనభరితమైన హైదరాబాద్ చికెన్ దమ్ బిర్యానీని రాయితా, సలాడ్‌తో కలిపి వడ్డించండి. ఈ వంటకం మీ ఇంట్లో అందరినీ ఆకట్టుకుంటుంది.