ఉగాది స్పెషల్ పూర్ణం బూరెలు రెసిపీ..! ఆంధ్ర స్టైల్లో పర్ఫెక్ట్ గా చేయండి ఇలా..!

సంస్కృతంలో ఉగాది అంటే ఒక కొత్త శకం ప్రారంభం. ఉగాది రోజున బ్రహ్మ ప్రపంచ సృష్టిని మొదలుపెట్టాడు అనే నమ్మకం ఉంది. ఒక సంవత్సరం బ్రహ్మకు ఒకే రోజు వంటి విషయం మన పెద్దలు చెబుతారు. వసంత రుతువు ప్రారంభమై, సూర్యుడు భూమధ్యరేఖ దాటే రోజు కూడా ఇదే.

ఉగాది పచ్చడి.. పండుగలు అన్నింటికంటే ముఖ్యంగా ప్రసిద్ధి పొందిన రుచికరమైన వంటకం. ఉగాది పచ్చడి తెలుగు ప్రజల పాక సంస్కృతికి ప్రత్యేకంగా ఉంటుంది. ఈ పచ్చడిలో ఆరు రకాల రుచులు ఉంటాయి. ఇవి మనం జీవితంలో అనుభవించే వివిధ రకాల భావోద్వేగాలను ప్రతిబింబిస్తాయి. పచ్చి మామిడికాయ, బెల్లం, చింతపండు వంటి పదార్థాలతో తయారయ్యే ఈ పచ్చడి మనం జీవితంలో ఎదుర్కొనే తీపి, చేదు, పులుపు, ఉప్పు వంటి అనుభవాలను గుర్తు చేస్తుంది.

పండుగల్లో పూర్ణం బూరెలకు ఒక ప్రత్యేకత. ఇది ఆంధ్రప్రదేశ్‌లో ప్రసిద్ధి చెందిన తీపి వంటకం. శనగ పప్పు, బెల్లం, ఉప్పు, నెయ్యితో తయారయ్యే ఈ వంటకం ప్రతి పండుగలో ప్రత్యేకంగా చేస్తారు. పూర్ణం బూరెలు అనేది సాంప్రదాయ ఆంధ్ర వంటకం. ఇది పండుగలకు ప్రసాదంగా కూడా వాడుతారు. ఇప్పుడు మనం పూర్ణం బూరెలు ఎలా తయారు చేసుకోవాలో తెలుసుకుందాం.

కావాల్సిన పదార్థాలు

• శనగ పప్పు – 1 కప్పు
• నెయ్యి – 3 టీస్పూన్లు
• బెల్లం – 1 కప్పు
• ఏలకుల పొడి – తగినంత
• మినపప్పు – ¾ కప్పు
• బియ్యం – 1 కప్పు
• చక్కెర – తగినంత
• ఉప్పు – తగినంత
• నూనె – తగినంత

తయారీ విధానం

పూర్ణం బూరెలు తయారీకి ముందుగా శనగపప్పును రెండు గంటలు నానబెట్టి కుక్కర్‌లో ఉడికించాలి. ఉడికించిన పప్పును బెల్లం, ఏలకుల పొడితో కలిపి మెత్తని పేస్ట్ తయారు చేయాలి. ఈ మిశ్రమం పూర్తిగా చల్లారిన తర్వాత చిన్న చిన్న ముద్దలుగా చేసుకోవాలి. మరోవైపు మినపప్పు, బియ్యాన్ని 4 నుండి 6 గంటల పాటు నానబెట్టి వీటితో పాటు చక్కెర, ఉప్పు కూడా కలిపి మెత్తని పిండిగా తయారు చేసుకోవాలి. ఇప్పుడు కడాయిలో ఆయిల్ వేసి బాగా వేడయ్యాక మినపప్పు, బియ్యం పిండిలో పూర్ణం ముద్దలను ముంచి నూనెలో వేసి బంగారు రంగు వచ్చే వరకు వేయించాలి.

పూర్ణం బూరెలులో ఉపయోగించే శనగపప్పు ప్రోటీన్, ఖనిజాలతో నిండి ఉంటుంది. అలాగే ఇందులో నెయ్యి ఉపయోగించడం వల్ల ఒమేగా-3 ఫ్యాటీ ఆమ్లాలు, యాంటీఆక్సిడెంట్లు శరీరానికి లభిస్తాయి. ఇది ఆరోగ్యానికి మేలు చేస్తుంది. ఉగాది పండుగ మన సంస్కృతిలో కొత్త ప్రారంభానికి ప్రతీక. పూర్ణం బూరెలు వంటి ప్రత్యేకమైన వంటకాలు ఈ పండుగ సంబరాలను మరింత రుచికరంగా, ఆనందకరంగా మార్చుతాయి.