ఉదయం చేసిన చపాతీలు సాయంత్రం వరకు మెత్తగా ఉంటాయ్.. పిండి కలిపేటప్పుడు ఇలా చేస్తే చాలు..
వేడివేడిగా, దూదిలా మెత్తగా ఉండే చపాతీలు తినడం ఎవరికి ఇష్టం ఉండదు చెప్పండి? కానీ ఉదయం ఎంతో ఇష్టంగా చేసిన చపాతీలు సాయంత్రానికల్లా అప్పడంలా గట్టిపడిపోతుంటాయి. వాటిని నమలాలంటేనే ఒక పెద్ద టాస్క్లా మారిపోతుంది. అసలు చపాతీలు గంటల తరబడి మెత్తగా ఉండాలంటే ఏం చేయాలి? పిండి కలిపేటప్పుడు మీరు చేసే చిన్న తప్పులేంటి, పాటించాల్సిన ఆ అద్భుతమైన చిట్కాలు ఏంటో ఇప్పుడు తెలుసుకుందాం..

వేడివేడి, మెత్తటి చపాతీలు తినడం అందరికీ ఇష్టమే. కానీ ఉదయం చేసిన రొట్టెలు సాయంత్రానికల్లా అప్పడంలా గట్టిగా, పొడిగా మారిపోతుంటాయి. వాటిని నమలాలంటేనే చాలా ఇబ్బందిగా అనిపిస్తుంది. నిజానికి, రోటీలు దూదిలా మెత్తగా రావాలన్నా, గంటల తరబడి తాజాగా ఉండాలన్నా అసలు రహస్యం అంతా మనం గోధుమ పిండిని కలిపే విధానంలోనే దాగి ఉంది. పిండి కలిపేటప్పుడు కేవలం 6 చిన్న మార్పులు చేస్తే, ఉదయం చేసిన రొట్టెలు రాత్రి భోజనం వరకు ఎంతో మృదువుగా ఉంటాయి. పిండిని కలపడానికి సాధారణ లేదా చల్లటి నీటికి బదులుగా ఎల్లప్పుడూ గోరువెచ్చని నీటిని ఉపయోగించాలి. గోరువెచ్చని నీరు పిండి త్వరగా నానడానికి, మంచి సాగే గుణాన్ని పొందడానికి సహాయపడుతుంది. దీనివల్ల రొట్టెలు చాలా మృదువుగా రావడమే కాకుండా, త్వరగా ఎండిపోకుండా ఉంటాయి.
కొద్దిగా పాలు లేదా నెయ్యి కలపండి
రోటీలు సాయంత్రం వరకు తాజాగా ఉండాలంటే.. పిండి కలిపేటప్పుడు నీటిలో కొద్దిగా పాలు కలపడం ఉత్తమం. లేదా ఒక చెంచా దేశీ నెయ్యి, ఫ్రెష్ మీగడనైనా వేసుకోవచ్చు. ఇవి సహజమైన తేమను అందించడమే కాకుండా, రొట్టెల రుచిని పెంచి అవి గట్టిపడకుండా కాపాడతాయి.
కనీసం 5-7 నిమిషాలు బాగా మర్దన చేయండి
చాలామంది పిండిలో నీళ్లు పోసి పైపైన కలిపి వదిలేస్తుంటారు. అలా కాకుండా, పిండిని అరచేతులతో కనీసం 5 నుంచి 7 నిమిషాల పాటు బాగా ఒత్తుతూ కలపాలి. పిండిని ఎంత బాగా మర్దన చేస్తే, దానికి అంత మంచి సాగే గుణం వచ్చి రొట్టెలు పెనం మీద బెలూన్లలా పొంగుతాయి.
పిండి మరీ గట్టిగా, మరీ పల్చగా ఉండకూడదు
పిండి కలిపేటప్పుడు నీళ్ల పాళ్లు సరైన నిష్పత్తిలో ఉండటం చాలా ముఖ్యం. పిండి మరీ గట్టిగా ఉంటే, రొట్టెలు కాల్చిన కొద్దిసేపటికే ఆరిపోయి గట్టిపడతాయి. అలాగని మరీ మెత్తగా, తడిగా ఉంటే రొట్టెలు ఒత్తడం కష్టమవుతుంది. కాబట్టి పిండిని మధ్యస్థంగా, మృదువుగా ఉండేలా కలుపుకోవాలి.
పిండికి 15-20 నిమిషాల విశ్రాంతి ఇవ్వండి
పిండి కలిపిన వెంటనే రొట్టెలు చేయడం ఎప్పుడూ మంచిది కాదు. పిండి ముద్దను కలిపాక కనీసం 15 నుంచి 20 నిమిషాల పాటు పక్కన పెట్టాలి. ఈ సమయంలో పిండిలోని గ్లూటెన్ బాగా సెట్ అవుతుంది. ఫలితంగా రొట్టెలు ఒత్తేటప్పుడు అంచులు చిరగకుండా గుండ్రంగా, మెత్తగా వస్తాయి.
తడి గుడ్డతో కప్పి ఉంచండి
ఇది అత్యంత ముఖ్యమైన చిట్కా. నానబెట్టిన పిండి ముద్దను గాలికి వదిలేయకుండా, ఎల్లప్పుడూ ఒక శుభ్రమైన తడి గుడ్డతో కప్పి ఉంచాలి. లేదంటే పిండి ముద్దపై పలుచని పొరలా నూనె లేదా నీటిని రాయవచ్చు. ఇది పిండిపై పొడి పొర ఏర్పడకుండా నివారించి, లోపల తేమను అలాగే నిలుపుతుంది.
