రోజూ ఉల్లిపాయ తింటే డాక్టర్ల అవసరం ఉండదా.. శరీరంలో ఏం జరుగుతుందంటే..?

భారతీయ వంటకాల్లో ఉల్లిపాయ ప్రాముఖ్యత గురించి ప్రత్యేకంగా చెప్పక్కర్లేదు. కూరలు, సూప్‌లు, స్టూలు.. ఇలా ఏ పదార్థమైనా ఉల్లిపాయ పడితేనే ఆ రుచే వేరు. చికెన్, మటన్, బిర్యానీ తినేటప్పుడు ప్లేట్‌లో ఉల్లిపాయ ఉండాల్సిందే.. అయితే ఉల్లిపాయ కేవలం రుచిని పెంచడమే కాదు అంతకు మించిన అద్భుత ఔషధ గుణాలను కలిగి ఉందని నిపుణులు చెబుతున్నారు. ఉత్తరప్రదేశ్‌కు చెందిన ఆయుష్ ఆసుపత్రి వైద్యాధికారి డాక్టర్ స్మితా శ్రీవాస్తవ ప్రకారం.. ఉల్లిపాయలలో యాంటీఆక్సిడెంట్లు, యాంటీ బాక్టీరియల్, యాంటీ ఇన్ఫ్లమేటరీ లక్షణాలు పుష్కలంగా ఉంటాయి. ఇవి శరీరంలో రోగనిరోధక శక్తిని పెంచుతాయి. పచ్చి ఉల్లిపాయ లేదా ఉడికించిన ఉల్లిపాయను క్రమం తప్పకుండా తీసుకోవడం వల్ల జలుబు, దగ్గు, సీజనల్ ఇన్ఫెక్షన్ల నుండి రక్షణ లభిస్తుంది.

గుండె పదిలం.. కొలెస్ట్రాల్‌కు చెక్

గుండె ఆరోగ్యానికి ఉల్లిపాయ ఒక వరం లాంటిది. ఇందులో ఉండే సల్ఫర్ సమ్మేళనాలు, ఫ్లేవనాయిడ్లు శరీరంలోని చెడు కొలెస్ట్రాల్‌ను తగ్గించడంలో సహాయపడతాయి. తద్వారా రక్తపోటు నియంత్రణలో ఉండి, గుండెపోటు, స్ట్రోక్ వచ్చే ప్రమాదం తగ్గుతుంది.

షుగర్ వ్యాధిగ్రస్తులకు వరం

మధుమేహంతో బాధపడేవారు ఉల్లిపాయను తమ డైట్‌లో చేర్చుకోవడం వల్ల రక్తంలోని చక్కెర స్థాయిలు అదుపులో ఉంటాయి. ఇది శరీరంలో ఇన్సులిన్ పనితీరును మెరుగుపరుస్తుంది. అయితే మధుమేహ వ్యాధిగ్రస్తులు దీనిని పరిమితంగా తీసుకోవాలని వైద్యులు సూచిస్తున్నారు.

జీర్ణక్రియ మెరుగుపడుతుంది

ఉల్లిపాయల్లో ఫైబర్ అధికంగా ఉంటుంది. ఇది పేగు ఆరోగ్యాన్ని మెరుగుపరిచి గ్యాస్, అజీర్ణం, మలబద్ధకం వంటి సమస్యల నుండి ఉపశమనం కలిగిస్తుంది. శరీరం నుండి విషపూరిత పదార్థాలనుబయటకు పంపడంలో ఇది కీలక పాత్ర పోషిస్తుంది.

అందమైన చర్మం.. ఒత్తైన జుట్టు

ఆరోగ్యానికే కాదు, అందానికి కూడా ఉల్లిపాయ మేలు చేస్తుంది. ఇందులోని యాంటీఆక్సిడెంట్లు చర్మాన్ని యవ్వనంగా ఉంచుతాయి. అలాగే ఉల్లిపాయ రసం జుట్టు కుదుళ్లను బలపరిచి, జుట్టు రాలడాన్ని తగ్గిస్తుంది. కొత్త జుట్టు పెరగడానికి సహకరిస్తుంది.

ఎవరు తినకూడదు?

ప్రయోజనాలు ఉన్నప్పటికీ, తీవ్రమైన కడుపు సమస్యలు ఉన్నవారు లేదా ఉల్లిపాయ అలర్జీ ఉన్నవారు వైద్యుల సలహా మేరకు మాత్రమే వీటిని తీసుకోవాలి. ఉల్లిపాయలను సరైన మోతాదులో తీసుకున్నప్పుడే శరీరానికి పూర్తిస్థాయిలో శక్తి, ఆరోగ్యం లభిస్తాయి.

మరిన్ని హెల్త్ వార్తల కోసం ఇక్కడ క్లిక్ చేయండి..