దీపావళి వేళ ఆరోగ్యం, రుచి కలగలిసిన స్నాక్.. కేవలం 5 నిమిషాల్లో నో-ఆయిల్ హై-ప్రొటీన్ చాట్!
దీపావళి పండుగ వేళ నూనెలో వేయించిన పిండి వంటలకు బదులుగా ఆరోగ్యకరమైన, కరకరలాడే సరికొత్త స్నాక్స్‌ను తయారు చేసుకోవచ్చు. కంటెంట్ క్రియేటర్ పల్లవి చిబ్బర్ పరిచయం చేసిన ఈ జీరో-ఆయిల్, హై-ప్రొటీన్ చాట్ కేవలం 5 నిమిషాల్లో సులభంగా తయారవుతాయి. పుదీనా, చింతపండు చట్నీ, దానిమ్మ గింజలతో గార్నిష్ చేస్తే నోరూరించే రుచికరమైన చాట్ సిద్ధమవుతుంది. పండుగ రోజుల్లో ఆరోగ్యాన్ని కాపాడుకోవాలనుకునే వారికి ఈ నో-ఆయిల్ స్నాక్ అద్భుతమైన ప్రత్యామ్నాయంగా ఉంటుంది.
Updated on: Oct 28, 2026 | 9:36 AM
దీపావళి అనగానే రకరకాల మిఠాయిలు, నూనెలో వేయించిన కారాలు, సమోసాలు, కచోరీలు గుర్తుకు వస్తాయి. అయితే పండుగ ఆనందాన్ని ఆస్వాదిస్తూనే ఆరోగ్యానికి ఎలాంటి హాని కలగకుండా చూసుకోవడం చాలా ముఖ్యం. ఈ దీపావళికి జిడ్డు పదార్థాలకు దూరంగా ఉంటూ, కరకరలాడే ఆరోగ్యకరమైన స్నాక్‌ను కోరుకునే వారి కోసం ఓ అద్భుతమైన రెసిపీ అందుబాటులోకి వచ్చింది. సోషల్ మీడియాలో ప్రసిద్ధ కంటెంట్ క్రియేటర్ పల్లవి చిబ్బర్ పరిచయం చేసిన నూనె లేని, అధిక ప్రోటీన్లు కలిగిన స్ప్రౌట్స్‌ కెనాప్స్ చాట్ ప్రస్తుతం ఫుడ్ ప్రియులను విపరీతంగా ఆకట్టుకుంటోంది.
తయారీ విధానం చాలా సులభం!
నూనె లేదా డీప్ ఫ్రై అవసరం లేకుండా కేవలం 5 నిమిషాల్లో ఈ హెల్తీ చాట్‌ను సిద్ధం చేసుకోవచ్చు. దీనికి కావలసిన పదార్థాలు, తయారీ విధానం ఇలా ఉంది.
స్టోర్ నుండి తెచ్చిన టార్టిల్లా వ్రాప్స్‌ను చిన్న రౌండ్ సర్కిల్స్‌గా కట్ చేసుకోవాలి. వీటిని మఫిన్ మోల్డ్స్‌లో ఉంచి, క్రిస్పీగా మారే వరకు సుమారు 10 నిమిషాలు బేక్ చేయాలి. దీనివల్ల నూనె చుక్క కూడా లేకుండా అద్భుతమైన కరకరలాడే కప్‌లు సిద్ధమవుతాయి. ఇప్పుడు ఒక గిన్నెలో ఉడికించిన మొలకెత్తిన గింజలు, సన్నగా తరిగిన ఉల్లిపాయ ముక్కలు, పచ్చిమిర్చి, రెండు టేబుల్ స్పూన్ల పెరుగు, చాట్ మసాలా, కారం, తగినంత ఉప్పు వేసి బాగా కలుపుకోవాలి. ముందుగా సిద్ధం చేసుకున్న కెనాప్ కప్‌లలో ఈ స్ప్రౌట్స్‌ మిశ్రమాన్ని స్పూన్ సహాయంతో నింపాలి. దానిపై కొత్తిమీర చట్నీ, చింతపండు చట్నీ వేసి, అందమైన లుక్ కోసం దానిమ్మ గింజలతో గార్నిష్ చేసుకోవాలి.
View this post on Instagram
మీరు అతిథులకు వెంటనే సర్వ్ చేస్తుంటే పెరుగును ఉపయోగించవచ్చు. ఒకవేళ ముందుగానే ఈ స్నాక్‌ను సిద్ధం చేసి పెట్టుకోవాలనుకుంటే మాత్రం పెరుగు వేయకుండా పొడిగా ఉంచుకోవాలి, లేదంటే కెనాప్స్ మెత్తబడిపోతాయి. నూనె చుక్క లేకుండా ప్రొటీన్లు నిండిన ఈ టేస్టీ చాట్‌తో ఈసారి మీ దీపావళి వేడుకలను మరింత ఆరోగ్యకరంగా మార్చుకోండి.
