Christmas Recipes: కేలరీలు పెరగకుండా విందు! క్రిస్మస్‌కు టేబుల్ మీద ఈ వెరైటీలు ఉండాల్సిందే!

ఈ క్రిస్మస్‌కు నూనె, చక్కెర ఎక్కువ వాడిన వంటకాలకు బదులుగా ఆరోగ్యకరమైన వంటకాలు ప్రయత్నించండి. బీట్‌రూట్ సలాడ్ నుండి మసాలా రోస్ట్ చికెన్ వరకు, సాంప్రదాయ వంటకాలకు ఆరోగ్యకరమైన ట్విస్ట్ ఇస్తూ, చెఫ్ ప్రాజిత్ సింగ్ అందించిన ఈ ఐదు రెసిపీలు మీ పండుగ వేడుకలను పదిలం చేస్తాయి. ఈ వంటకాలు రుచితో పాటు శ్రేయస్సును పెంచుతాయి.

1. వార్మ్ స్పైస్డ్ బీట్, చిలగడదుంప సలాడ్ (సిట్రస్ వినైగ్రెట్‌తో)

కావాల్సినవి (4 మందికి):

2 మధ్యస్థ బీట్‌రూట్‌లు (వేయించినవి, ముక్కలుగా కోసినవి)

1 పెద్ద చిలగడదుంప (వేయించినది, ముక్కలుగా కోసినది)

2 కప్పుల బేబీ పాలకూర

1 నారింజ నుండి తీసిన ముక్కలు

2 టేబుల్ స్పూన్ల గుమ్మడి గింజలు (వేయించినవి)

వినైగ్రెట్ కోసం: 1.5 టేబుల్ స్పూన్ల ఆలివ్ ఆయిల్, 2 టేబుల్ స్పూన్ల నారింజ రసం, ½ టీస్పూన్ డిజోన్ ఆవాలు, ½ టీస్పూన్ తేనె, ఉప్పు, మిరియాల పొడి.

తయారీ విధానం:

ఒక గిన్నెలో వేయించిన బీట్‌రూట్, చిలగడదుంప, పాలకూర, నారింజ ముక్కలు కలపండి. మరొక గిన్నెలో వినైగ్రెట్ పదార్థాలు కలిపి సలాడ్‌పై వేయండి. వేయించిన గుమ్మడి గింజలతో అలంకరించి సర్వ్ చేయండి. ఈ సలాడ్‌లో విటమిన్లు, యాంటీఆక్సిడెంట్లు పుష్కలంగా ఉన్నాయి.

2. మసాలా హెర్బ్ రోస్ట్ చికెన్ (క్యారెట్-కొబ్బరి ప్యూరీతో)

క్రిస్మస్ విందుకు ప్రత్యేక ఆకర్షణ ఈ ప్రధాన వంటకం.

కావాల్సినవి (4-6 మందికి):

1 పూర్తి చికెన్ (1.2–1.4 కేజీలు)

120 గ్రాముల హంగ్ పెరుగు (నీరు తీసిన పెరుగు), 6 వెల్లుల్లి రెబ్బలు (తురిమినవి), 1 టేబుల్ స్పూన్ అల్లం (తురిమినది), 1 టీస్పూన్ కాశ్మీరీ మిరప పొడి, ¼ టీస్పూన్ పసుపు, ½ టీస్పూన్ గరం మసాలా, 1 టేబుల్ స్పూన్ నిమ్మరసం, 1 టేబుల్ స్పూన్ ఆలివ్ ఆయిల్, తగినంత ఉప్పు, 2 టేబుల్ స్పూన్ల కొత్తిమీర (తరిగినది).

క్యారెట్-కొబ్బరి ప్యూరీ: 300 గ్రాముల క్యారెట్‌లు (ఆవిరిలో ఉడికించినవి), 120 ml లైట్ కొబ్బరి పాలు, 5 గ్రాముల అల్లం, తగినంత ఉప్పు.

తయారీ విధానం:

చికెన్‌ను పెరుగు, అల్లం, వెల్లుల్లి, మసాలాలు, నిమ్మరసం, ఆలివ్ ఆయిల్ కలిపి కనీసం 2 గంటలు లేదా రాత్రంతా నానబెట్టండి (మ్యారినేట్ చేయండి). చికెన్‌ను 200°C వద్ద 60–70 నిమిషాలు రోస్ట్ చేయండి. ఉడికించిన క్యారెట్‌లు, కొబ్బరి పాలు, అల్లం కలిపి మెత్తగా ప్యూరీ చేయండి. ఆ ప్యూరీపై చికెన్‌ను ఉంచి, కొత్తిమీరతో అలంకరించి సర్వ్ చేయండి.

3. క్రాన్బెర్రీస్, గ్రీన్ బీన్స్, బాదంతో మిల్లెట్ పిలాఫ్

రుచితో పాటు పోషకాలను అందించే సైడ్ డిష్.

కావాల్సినవి (4 మందికి):

200 గ్రాముల కొర్రలు (Foxtail millet – కడిగినవి), 1 చిన్న ఉల్లిపాయ (ముక్కలు), 60 గ్రాముల గ్రీన్ బీన్స్ (ముక్కలు), 1 చిన్న క్యారెట్ (ముక్కలు), 40 గ్రాముల ఎండు క్రాన్బెర్రీస్, 1 దాల్చిన చెక్క, 1 బిర్యానీ ఆకు, 1 టీస్పూన్ ఆలివ్ ఆయిల్, 20 గ్రాముల బాదం (వేయించినవి, తరిగినవి), 400 ml నీరు లేదా స్టాక్, తగినంత ఉప్పు.

తయారీ విధానం:

ఆలివ్ ఆయిల్‌లో ఉల్లిపాయ, దాల్చిన చెక్క, బిర్యానీ ఆకు వేసి వేయించండి. కొర్రలు, గ్రీన్ బీన్స్, క్యారెట్, క్రాన్బెర్రీస్, స్టాక్, ఉప్పు వేసి కలిపి, తక్కువ మంటపై కొర్రలు మెత్తగా ఉడికే వరకు ఉంచండి. చివరగా వేయించిన బాదంతో అలంకరించి సర్వ్ చేయండి. కొర్రలలో ప్రోటీన్, డైటరీ ఫైబర్ ఎక్కువగా ఉండి కడుపు నిండుగా ఉంచుతాయి.

4. గ్రిల్డ్ వింటర్ వెజిటబుల్ ప్లేటర్ (కొత్తిమీర-పుదీనా చిమిచురితో)

పండుగ విందులో రంగురంగుల కూరగాయలతో తయారుచేసిన ఆరోగ్యకరమైన ప్లేటర్.

కావాల్సినవి (4-5 మందికి):

200 గ్రాముల కాలీఫ్లవర్, 2 క్యారెట్‌లు, 1 గుమ్మడికాయ (జుకినీ), 150 గ్రాముల పుట్టగొడుగులు, 1 టేబుల్ స్పూన్ ఆలివ్ ఆయిల్, ఉప్పు, మిరియాల పొడి.

చిమిచురి కోసం: 1 కప్పు కొత్తిమీర, ½ కప్పు పుదీనా, 2 వెల్లుల్లి రెబ్బలు, ½ పచ్చి మిరపకాయ, 1 టేబుల్ స్పూన్ నిమ్మరసం, 1.5 టేబుల్ స్పూన్ల ఆలివ్ ఆయిల్, తగినంత ఉప్పు.

తయారీ విధానం:

కూరగాయలకు ఆలివ్ ఆయిల్, ఉప్పు, మిరియాలు రాసి గ్రిల్ చేయండి. చిమిచురి పదార్థాలను కలిపి ఒక పేస్ట్‌లా తయారు చేయండి, ఆ పేస్ట్‌ను గ్రిల్ చేసిన కూరగాయలపై వేయండి. ఈ వంటకం పండుగ భోజనంలో ఎక్కువ కూరగాయలను చేర్చడానికి సహాయపడుతుంది.

5. బెల్లం, సాఫ్రాన్ కలిపి ఉడికించిన పియర్స్ (పిస్తాలతో)

సహజమైన తీపి, సులభంగా జీర్ణమయ్యే ఆరోగ్యకరమైన డెజర్ట్.

కావాల్సినవి (4 మందికి):

4 గట్టి పియర్స్ పండ్లు, 600 ml నీరు, 70 గ్రాముల బెల్లం, 6 పోగుల సాఫ్రాన్ (కుంకుమపువ్వు), 2 యాలకులు, 1 టీస్పూన్ నిమ్మరసం, 15 గ్రాముల పిస్తాలు (తరిగినవి).

తయారీ విధానం:

బెల్లం, కుంకుమపువ్వు, యాలకులు, నిమ్మరసం నీటిలో కలిపి బెల్లం కరిగే వరకు మరిగించండి. తొక్క తీసిన పియర్స్ పండ్లను వేసి, 15–20 నిమిషాలు మెత్తగా అయ్యే వరకు ఉడికించండి. కొద్దిగా చల్లబరచి, తరిగిన పిస్తాలతో సర్వ్ చేయండి. ఈ డెజర్ట్ సహజంగా తీపిగా ఉండి, ఆరోగ్యకరమైన క్రిస్మస్ విందుకు మంచి ముగింపునిస్తుంది.