క్రిస్పీ ఉల్లి సమోసాలు.. బయట కొనాల్సిన పనేలేదు! ఇంట్లోనే ఇలా సింపుల్గా చేసేయండి
సాయంత్రపు వేళలో వేడి వేడి సమోసాలు తినాలనిపిస్తే, ఇంట్లో సులభంగా తయారుచేసుకోగలిగే క్రిస్పీ ఉల్లి సమోసా రెసిపీ మీకోసం. ఈ రెసిపీలో సమోసా షీట్లు తయారుచేయడం నుంచి రుచికరమైన స్టఫింగ్, సమోసా మడతపెట్టే విధానం, వేయించడం వరకు ప్రతి స్టెప్ వివరంగా ఈ కింద తెలుసుకోండి..
Updated on: Sep 13, 2026 | 12:40 PM
ఒక కప్పు మైదా పిండిని తీసుకొని, అందులో రుచికి సరిపడా ఉప్పు, ఒక టేబుల్ స్పూన్ వేడి చేసిన నూనె వేసి బాగా కలపాలి. నూనె వేయడం వలన సమోసా పై పొర క్రిస్పీగా వస్తుంది, నూనె తక్కువ పీల్చుకుంటుంది. తగినన్ని నీళ్లు కొద్దికొద్దిగా పోస్తూ సెమీ సాఫ్ట్ పిండిని కలపాలి. పిండి మరీ గట్టిగా లేదా మరీ మెత్తగా ఉండకూడదు. కనీసం నాలుగు నుండి ఐదు నిమిషాలు పిండిని బాగా నానబెట్టాలి, దీని వలన పిండి మెత్తగా తయారవుతుంది. కలిపిన పిండిని పది నిమిషాలు పక్కన ఉంచాలి.
సమోసా షీట్ల తయారీ ఇలా..
నానబెట్టిన పిండిని చిన్న చిన్న బాల్స్గా విభజించుకోవాలి. సమోసా షీట్లను రెండు పద్ధతులలో తయారుచేయవచ్చు. మొదటి పద్ధతిలో ఒక పిండి ముద్దను తీసుకొని, పొడి పిండితో వీలైనంత పలుచగా రోల్ చేయాలి. అది చేతిలోకి తీసుకుంటే వేళ్లు కనిపించేంత పలుచగా ఉండాలి. రెండవ పద్ధతి రెండు పిండి ముద్దలను పూరీ సైజులో రోల్ చేసి, ఒక దానిపై నూనె రాసి, పొడి పిండి చల్లి, దానిపై రెండవ పూరీని పెట్టి మళ్లీ పలుచగా రోల్ చేయాలి. ఇలా రోల్ చేసిన షీట్లను పెనంపై రెండు వైపులా ఐదు నుండి పది సెకన్ల పాటు కాల్చాలి. మరీ ఎక్కువ కాల్చకూడదు, కొద్దిగా పారదర్శకంగా మారితే సరిపోతుంది. రెండు పూరీలు కలిపి చేసిన షీట్లను వేడిగా ఉన్నప్పుడు జాగ్రత్తగా విడదీయాలి. తరువాత వీటిని సరిగ్గా కట్ చేయడానికి స్కేలును ఉపయోగించి రెండున్నర నుండి మూడు అంగుళాల వెడల్పు, ఏడు నుండి ఎనిమిది అంగుళాల పొడవుతో కట్ చేయాలి. మిగిలిన అంచులను చిన్న ముక్కలుగా కట్ చేసి చిప్స్గా వేయించుకోవచ్చు.
రుచికరమైన ఉల్లి స్టఫింగ్ తయారీ ఇలా.
ఒక పాన్లో ఒకటి లేదా రెండు టీ స్పూన్ల నూనె వేసి, అర టీ స్పూన్ జీలకర్ర వేసి వేయించాలి. తరువాత ఒక కప్పు సన్నగా తరిగిన ఉల్లిపాయలు, రెండు పచ్చిమిర్చి, అర టీ స్పూన్ అల్లం వెల్లుల్లి పేస్ట్ వేసి రెండు మూడు నిమిషాలు వేయించాలి. ఉల్లిపాయలు ఎక్కువ వేగాల్సిన అవసరం లేదు. ఇప్పుడు ఒక టీ స్పూన్ కారం, ఒక టీ స్పూన్ ధనియాల పొడి, అర టీ స్పూన్ వేయించిన జీలకర్ర పొడి, ఒక టీ స్పూన్ చాట్ మసాలా, రుచికి సరిపడా ఉప్పు వేసి బాగా కలపాలి. స్టవ్ ఆఫ్ చేసి, అర కప్పు అటుకులను చేతితో నలిపి కలపాలి. చివరగా రెండు టేబుల్ స్పూన్ల కొత్తిమీర, అర చెక్క నిమ్మరసం పిండి బాగా కలపాలి. నిమ్మరసం వలన టేస్ట్ చాలా బాగుంటుంది.
ఔసమోసా మడతపెట్టడం, వేయించడం..
ఒక గిన్నెలో రెండు టీ స్పూన్ల మైదా పిండిని తీసుకొని కొద్దిగా నీళ్లు కలిపి పేస్ట్లా చేసుకోవాలి. సమోసా షీట్ను తీసుకొని వీడియోలో చూపిన విధంగా త్రికోణాకారంలో మడతపెట్టి, మైదా పేస్ట్తో అతికించాలి. మధ్యలో ఉల్లి స్టఫింగ్ను నింపి, స్టఫింగ్ బయటికి రాకుండా మైదా పేస్ట్తో జాగ్రత్తగా మూసివేయాలి. డీప్ ఫ్రై చేయడానికి సరిపడా నూనెను మీడియం వేడి చేయాలి. నూనె వేడయ్యాక, సమోసాలను నూనెలో వేసి, మంటను మీడియం నుండి తక్కువ మంటకు అడ్జస్ట్ చేయాలి. సమోసాలు బంగారు రంగులోకి వచ్చి, క్రిస్పీగా మారే వరకు రెండు వైపులా తిప్పుతూ వేయించాలి. వేగిన తరువాత నూనె నుండి తీసివేయాలి. ఇలా ఇంట్లోనే ఎంతో రుచికరమైన, క్రిస్పీ ఉల్లి సమోసాలను తయారుచేసుకోవచ్చు. సమోసాలతో పాటు మిగిలిన షీట్ ముక్కలను వేయించి, ఉప్పు, కారం చల్లి చిప్స్గా ఆస్వాదించవచ్చు. కొన్ని పచ్చిమిర్చిని కూడా వేయించి సమోసాలతో పాటు తింటే కారంగా రుచి భలే ఉంటుంది.
