విద్యాబాలన్ మనసుదోచిన మంచులక్ష్మి

తండ్రి నుంచి అబ్బిందో ఏమో.. టాలీవుడ్ సీనియర్ హీరో మోహన్ బాబు సంతానం తాము అనుకున్నది నిర్భయంగా చెప్పేస్తారు. ఇలా మంచు లక్ష్మి చేసిన కామెంట్లే బాలీవుడ్ నటి విద్యా బాలన్ కు తెగనచ్చేశాయి. విషయం ఏంటంటే.. బాలీవుడ్ హీరో సుశాంత్ సింగ్ రాజ్ పుత్ చనిపోవడం తెలిసిందే. అతని మరణానికి నటి రియా చక్రవర్తి కారణమని తీవ్ర ఆరోపణలు వస్తున్నాయి. ఈ నేపథ్యంలో మంచు లక్ష్మి ఇటీవల స్పందించారు. నటి రియా చక్రవర్తికి మద్దతుగా నిలిచారు. వాస్తవాలు తెలుసుకోకుండా ఒకరిని నిందించడం సరికాదని, ఇతరుల కుటుంబాలను అవమానించేలా వ్యాఖ్యలు చేయరాదని మంచు లక్ష్మి పేర్కొన్నారు. మీడియాలో వస్తున్న కథనాలు చూస్తే రియా కుటుంబం అనుభవించే వేదన ఎలా ఉంటుందో తనకు తెలుసని వ్యాఖ్యానించారు. ఇవే వ్యాఖ్యలు విద్యను మెప్పించాయి. రియాకు మద్దతు ఇచ్చేందుకు ధైర్యంగా ముందుకొచ్చిందంటూ మంచు లక్ష్మిని విద్య అభినందించారు. గాడ్ బ్లెస్ యూ మంచు లక్ష్మి అంటూ విద్య సందేశం ఇచ్చారు. దురదృష్టవశాత్తు సుశాంత్ రాజ్ పుత్ విషాద ఘటన ఓ మీడియా సర్కస్ లా మారిపోయిందని విద్య విచారం వ్యక్తం చేశారు.