భారతీయ సిక్కులకు పాకిస్తాన్ ఆహ్వానం..!

సిక్కుల ఆరాధ్య దైవం.. గురునానక్‌ దేవ్‌ 551వ జయంత్యుత్సవాలకు హాజరు కావాలని భారత్‌కి చెందిన సిక్కులను పాకిస్తాన్ ఆహ్వానించింది. పంజాబ్‌ ప్రావిన్సులోని గురునానక్‌ జన్మస్థలమైన నంకానా సాహిబ్‌లో మూడు రోజుల పాటు జరిగే ఈ వేడుకలు నవంబరు 27నుంచి మొదలుకానున్నాయి. కరోనా వైరస్‌ మహమ్మారి నేపథ్యంలో భారతీయ యాత్రికులకు పాక్‌లో ఐదు రోజుల పాటు మాత్రమే గడిపేందుకు అనుమతి ఇచ్చింది. యాత్రికులు కొవిడ్‌-19 నెగటివ్‌ రిపోర్టును చూపించి రావల్సి ఉంటుందని, అలాగే కొవిడ్‌ ప్రొటోకాల్‌ని తప్పనిసరిగా పాటించాలని ఓ అధికారి సోమవారం తెలిపారు. నవంబరు 27న వాఘా సరిహద్దు చేరుకున్న వారిని అక్కడి నుంచి ప్రత్యేక బస్సులో నంకానా సాహిబ్‌కు తీసుకెళ్తామని ఆయన చెప్పారు. అయితే, ఈ సారి నంకానా సాహిబ్‌ను మాత్రమే సందర్శించేందుకు అనుమతి ఉంది. ఇతర ప్రాంతాలకు వెళ్లేందుకు అవకాశం లేదని అధికారి స్పష్టం చేశారు. కాగా, గతేడాది ప్రారంభించిన కర్తార్‌పుర్‌ కారిడార్‌ని పాకిస్తాన్ తెరిచినా.. కొవిడ్‌ నేపథ్యంలో భారత్‌ అక్కడికి యాత్రికులను అనుమతించట్లేదు.