నో మూవీ.. నవంబర్.. ఇదేం మ్యాజిక్!

మన టాలీవుడ్ స్టార్లు రిలీజ్ చేస్తే ఒకే రోజు పోటీపడి మరీ విడుదల చేస్తుంటారు. ఒకదాని ప్రభావం మరొకదానిపై పడి వసూళ్లు తగ్గిపోతాయని తెలిసీ కూడా.. ముహూర్త బలం అని చెప్పి నిర్మాతలు మొత్తుకుంటున్నా రిలీజ్ చేస్తుంటారు. ఇదే ఎప్పుడూ జరుగుతున్న సీన్. అంతేకాకుండా కొన్ని సార్లయితే పండగ సీజన్ పేరుతో భారీ కలెక్షన్స్ వస్తాయంటూ హడావుడిగా రిలీజ్ చేస్తారు. ఆ తరుణంలో వసూళ్ల సంగతి పక్కన పెడితే.. సినిమాకు పాజిటివ్ టాక్ వచ్చినా లాంగ్ రన్ తెచ్చుకోలేక వారం రోజులకే బొమ్మ రివర్స్ అవుతుంది. అందుకే ఇండస్ట్రీకి ఎన్ని హిట్స్ వచ్చాయో చెప్పాలంటే వేళ్ళ మీద లెక్కపెట్టుకునే పరిస్థితి వచ్చింది.

ఇది ఇలా ఉంటే మన నిర్మాతలు నవంబర్‌ని పూర్తిగా అనాధలా వదిలేయడం ఆశ్చర్యం కలిగించే అంశం. ఇప్పటివరకు చిన్న సినిమా నుంచి పెద్ద సినిమా వరకు ఒక్కదాన్ని కూడా ఈ నెలలో షెడ్యూల్ చేయలేదు. ‘సైరా’ నుంచి ‘వెంకీ మామ’, ‘రాజు గారి గది 3’ దాకా అన్నింటిని కూడా అక్టోబర్‌లో విడుదల చేయడానికి టార్గెట్ చేశారు తప్ప.. నవంబర్ నెల గురించి అసలు పట్టించుకోలేదు.

ఈ మధ్యకాలంలో మరీ ఇంత డ్రై మంత్ చూడలేదు. సినిమా పాజిటివ్ టాక్ వచ్చిందంటే జనాలు నెలతో సంబంధం లేకుండా ఆదరించిన సందర్భాలు ఎన్నో ఉన్నాయి. అలాంటిది ఇప్పుడు ఈ నవంబర్‌ను ఎందుకు వదిలేశారనేది అంతు చిక్కని ప్రశ్న. మరోవైపు డిసెంబర్‌లో ఇప్పటికే వారానికి ఒకటి లేదా రెండు సినిమాలు విడుదల అయ్యేలా నిర్మాతలు ప్లాన్ రెడీ చేసుకున్నారు. ఇక ఇప్పటికైనా మన నిర్మాతలు మరోసారి అలోచించి నవంబర్‌లో ఏదైనా సినిమా రిలీజ్ చేస్తారో లేదో చూడాల్సిందే.