నేపాల్‌కు మరో ముప్పు.. 20 నిమిషాల్లో 5 రెట్ల తీవ్రతతో వరదలంటూ..! హెచ్చరికతో హై అలర్ట్!

ఖాట్మండు: ఇప్పటికే భారీ వరదలు, కొండచరియల విరిగిపడటంతో అతలాకుతలమైన నేపాల్‌ను మరోసారి ఆకస్మిక వరదల ముప్పు భయపెడుతోంది. చైనా-నేపాల్ సరిహద్దు ప్రాంతంలో ఏర్పడిన నీటి నిల్వలు, శిథిలాల కారణంగా కొత్తగా వరద ముప్పు పొంచి ఉందని అధికారులు హెచ్చరిస్తున్నారు. తాజా సమాచారం ప్రకారం, కొన్ని ప్రాంతాల్లో ప్రజలను అప్రమత్తం చేస్తూ భద్రతా సిబ్బంది మైకుల ద్వారా హెచ్చరికలు జారీ చేశారు.

ఇప్పటికే బొటెకోషి, త్రిశూలీ నదీ పరివాహక ప్రాంతాల్లో సంభవించిన భారీ వరదలు ఇళ్లు, రహదారులు, వంతెనలు, విద్యుత్ మౌలిక సదుపాయాలను తీవ్రంగా దెబ్బతీశాయి. చైనా వైపు గ్యిరాంగ్ పోర్ట్ ప్రాంతం కూడా భారీగా దెబ్బతింది. శిథిలాలు నదీ ప్రవాహాలను అడ్డుకోవడంతో కొన్ని ప్రాంతాల్లో కొత్తగా నీటి నిల్వలు ఏర్పడ్డాయని, అవి తెగిపోతే మరింత భారీ వరదలు సంభవించే ప్రమాదం ఉందని తాజా నివేదికలు చెబుతున్నాయి.

ఆకస్మిక వరద ముంచెత్తిన రెండు రోజుల తర్వాత, ఒక సరస్సు గట్లు తెగిపోయిందని నేపాల్‌లోని రసువా జిల్లా అధికారులకు నోటీసు అందిందని ఆ జిల్లా అత్యున్నత అధికారి నరేంద్ర పరియార్ శుక్రవారం తెలిపారు. దీంతో నదిలో నీటిమట్టం పెరుగుతున్నట్లు ఆయన తెలిపారు. అయితే ప్రస్తుతం నీటిమట్టం ఎంత ఉందో స్పష్టంగా తెలియదని పేర్కొన్నారు. నేపాల్‌లోని చోచెన్ ఖోలా, పురేపు త్సాంగ్పో నదుల సంగమం సమీపంలో ఒక భారీ సరస్సు ఏర్పడిందని చైనా జలవనరుల మంత్రిత్వ శాఖ తెలిపింది. గురువారం (ఆగస్టు 27) ఉదయం నాటికి ఈ సరస్సు పరిమాణం సుమారు 20 లక్షల క్యూబిక్ మీటర్లుగా ఉందని, అది అప్పటికే పొంగిపొర్లుతోందన్నారు. చైనా సీసీటీవీ కథనం ప్రకారం, గిరాంగ్ సరిహద్దు సమీపంలోని ఆనకట్ట సరస్సు పొంగిపొర్లుతోంది. దీంతో సహాయక చర్యలను తాత్కాలికంగా నిలిపివేయాల్సి వచ్చింది. ఎగువన పెరుగుతున్న నీటిమట్టాలు మరిన్ని వరదల ముప్పును పెంచడంతో, అధికారులు పరిస్థితిని అంచనా వేసే వరకు సహాయక చర్యలను నిలిపివేశారు.

ఇదిలా ఉండగా.. శుక్రవారం (ఆగస్టు 28) ఉదయం నాటికి నేపాల్‌లో వరదల మృతుల సంఖ్య 469కు చేరింది. మరోవైపు వందలాది మంది ఆచూకీ ఇంకా లభించలేదు. చైనా వైపు ముగ్గురు మరణించగా, 558 మంది గల్లంతైనట్లు అధికారులు వెల్లడించారు. నేపాల్‌లో కూడా కనీసం 644 మంది గల్లంతైనట్లు తాజా సమాచారం. భారీ బురద, శిథిలాలు, దెబ్బతిన్న రహదారులు, వంతెనల కారణంగా సహాయక బృందాలు ప్రభావిత ప్రాంతాలకు చేరుకోవడంలో తీవ్ర ఇబ్బందులు ఎదుర్కొంటున్నాయి. హెలికాప్టర్లు, భద్రతా బలగాలతో సహాయక చర్యలు కొనసాగుతున్నాయి.

అయితే ‘20 నిమిషాల్లో ఐదు రెట్ల తీవ్రతతో వరద’ వస్తుందన్న నిర్దిష్ట హెచ్చరికకు ప్రస్తుతం విశ్వసనీయ అధికారిక ధృవీకరణ కనిపించలేదు. ప్రస్తుతం ఒక వీడియో సామాజిక మాధ్యమాల్లో వైరల్ అవుతోంది. అందువల్ల ఆ సమాచారాన్ని నిర్ధారించని సోషల్ మీడియా హెచ్చరికగా మాత్రమే చూడాలి. ప్రస్తుతం ప్రధాన ఆందోళన మాత్రం కొత్తగా ఏర్పడిన నీటి నిల్వలు తెగిపడే ప్రమాదంపైనే ఉంది.

వైరల్ వీడియోను ఇక్కడ చూడండి..

మరిన్ని అంతర్జాతీయ వార్తల కోసం ఇక్కడ క్లిక్ చేయండి..