‘చంద్రయాన్-2’ ప్రయోగం వాయిదా

భారత అంతరిక్ష పరిశోధన సంస్థ ఇస్రో చేపట్టదలచిన ప్రతిష్టాత్మక ‘చంద్రయాన్ 2’ ప్రయోగం వాయిదా పడింది. డ్రాప్ టెస్టులో భాగంగా మూన్ ల్యాండర్ కాళ్లలో లోపాలను గుర్తించినట్లు ఇస్రో చైర్మన్ కె.శివన్ తెలిపారు. మూన్ ల్యాండర్ బరువును మోయగలిగేంత సామర్థ్యం.. దానికి అమర్చిన కాళ్లలో లేదని డ్రాప్ టెస్టులో తేలింది. దీంతో ఈ ప్రయోగాన్ని మే నెల వరకు హోల్డ్‌లో పెట్టినట్లు ఆయన పేర్కొన్నారు. అయితే 800కోట్ల రూపాయల ఖర్చుతో చేపట్టిన ఈ మిషన్‌ను ఏప్రిల్ రెండో వారంలో ప్రయోగించనున్నట్లు ఇస్రో వెల్లడించిన విషయం తెలిసిందే. కాగా ‘చంద్రయాన్ 2’ ద్వారా ఓ రోవర్‌ను చంద్రుడిపైకి పంపనున్నారు. ఈ రోవర్‌లో సిస్మోమీటర్, థర్మల్ ప్రోబ్ వంటివి అమర్చారు. చంద్రుడి ఉపరితలంపై ఉన్న మట్టిని పరీక్షించేందుకు స్పెక్ట్రోమీటర్‌ను కూడా ఈ రోవర్ మోసుకెళ్లనుంది.