ఫ్రెండ్‌షిప్ డేని గుర్తు చేస్తూ.. మరో వీడియోలో ప్రజలకు ప్రధాని మోదీ కీలక పిలుపు

Narendra Modi on National Handloom Day 2026 Telugu: దేశ ప్రజలు ఫ్రెండ్‌షిప్ డేను ఎంత ఉత్సాహంగా జరుపుకున్నారో, అదే ఉత్సాహంతో జాతీయ చేనేత దినోత్సవాన్ని (ఆగస్టు 7) కూడా జరుపుకోవాలని ప్రధాని నరేంద్ర మోదీ పిలుపునిచ్చారు. చేనేత వస్త్రాలను కొనుగోలు చేసి, వాటిని నిత్యజీవితంలో భాగం చేసుకోవడం ద్వారా దేశంలోని లక్షలాది మంది నేత కార్మికులకు అండగా నిలవాలని ఆయన కోరారు. ప్రధాని మోదీ గురువారం తన ఇన్‌స్టాగ్రామ్, ట్విట్టర్ ఖాతాలో డైరెక్ట్-టు-కెమెరా వీడియోను విడుదల చేశారు. ముఖ్యంగా యువత, ముఖ్యంగా జెన్ జీ (Gen Z)తో సోషల్ మీడియా ద్వారా మరింత చేరువ కావాలనే ప్రయత్నాల్లో భాగంగా ఈ వీడియోను పంచుకున్నారు.

ఫ్రెండ్‌షిప్ డే ఉదాహరణగా…

వీడియోలో మాట్లాడిన ప్రధాని.. ఫ్రెండ్‌షిప్ డే సందర్భంగా ప్రజలు స్నేహితులకు ఫ్రెండ్‌షిప్ బ్యాండ్లు కట్టి, ప్రేమాభిమానాలను వ్యక్తం చేసిన విధానాన్ని ప్రస్తావించారు. అదే తరహాలో భారత చేనేత సంప్రదాయాన్ని గౌరవిస్తూ జాతీయ చేనేత దినోత్సవాన్ని కూడా జరుపుకోవాలని సూచించారు. “మీరు ఫ్రెండ్‌షిప్ డేను ఎంత ఆప్యాయంగా జరుపుకున్నారో, అదే ఉత్సాహంతో హ్యాండ్లూమ్ డేను కూడా జరుపుకోండి” అని ప్రధాని మోదీ అన్నారు.

చేనేతను జీవితంలో భాగం చేసుకోండి

జాతీయ చేనేత దినోత్సవాన్ని కేవలం ఒక ప్రతీకాత్మక కార్యక్రమంగా కాకుండా, చేనేత ఉత్పత్తులను కొనుగోలు చేయడం, ధరించడం, ఉపయోగించడం ద్వారా దానికి నిజమైన అర్థం తీసుకురావాలని మోదీ సూచించారు. ఇలా చేయడం వల్ల దేశీయ చేనేత రంగానికి, నేత కార్మికుల జీవనోపాధికి బలమైన మద్దతు లభిస్తుందని చెప్పారు.

ప్రతి చేనేత వస్త్రం వెనుక ఒక కళాకారుడి కథ

ప్రతి చేనేత ఉత్పత్తి వెనుక ఒక నేత కార్మికుడి కష్టం, నైపుణ్యం, అంకితభావం దాగి ఉంటుందని ప్రధాని పేర్కొన్నారు. అలాంటి ఉత్పత్తులను కొనుగోలు చేయడం ద్వారా దేశవ్యాప్తంగా ఉన్న లక్షలాది మంది చేనేత కార్మికుల కుటుంబాలకు ఆర్థికంగా తోడ్పాటు అందుతుందని తెలిపారు. భారతదేశపు నేత వర్గాలు తరతరాలుగా సంప్రదాయ కళలను కాపాడుతూ, వాటిని తర్వాతి తరాలకు అందిస్తున్నాయని ఆయన ప్రశంసించారు.

‘వోకల్ ఫర్ లోకల్’కు బలం

చేనేత వస్త్రాలను ఎంచుకోవడం కేవలం ఫ్యాషన్ కోసం మాత్రమే కాదని, అది స్థానిక కళాకారులకు మద్దతు ఇవ్వడం, భారతీయ సాంస్కృతిక వారసత్వాన్ని పరిరక్షించడం, అలాగే ‘వోకల్ ఫర్ లోకల్’ భావనను బలోపేతం చేయడమని ప్రధాని అన్నారు. దేశీయ వస్త్రాల పట్ల, వాటిని తయారు చేసే కళాకారుల పట్ల ముఖ్యంగా యువతలో మరింత అనుబంధం పెరగాలని ఆయన ఆకాంక్షించారు.

జాతీయ చేనేత దినోత్సవం ప్రత్యేకత

ప్రతి ఏడాది ఆగస్టు 7న దేశవ్యాప్తంగా జాతీయ చేనేత దినోత్సవాన్ని నిర్వహిస్తారు. 1905లో ప్రారంభమైన స్వదేశీ ఉద్యమం జ్ఞాపకార్థం, అలాగే భారత చేనేత రంగం దేశ సంస్కృతి, ఆర్థిక వ్యవస్థకు అందిస్తున్న విశేష సేవలను గుర్తిస్తూ ఈ దినోత్సవాన్ని జరుపుకుంటున్నారు. కేంద్ర ప్రభుత్వం 2015 నుంచి అధికారికంగా జాతీయ చేనేత దినోత్సవాన్ని నిర్వహిస్తూ, స్వదేశీ వస్త్రాలను ప్రోత్సహించే కార్యక్రమాలు చేపడుతోంది. ఈ సందర్భంగా ప్రజలు స్థానిక చేనేత ఉత్పత్తులను వినియోగించాలని అవగాహన కల్పిస్తోంది.

ఇటీవలి కాలంలో ప్రధాని మోదీ సోషల్ మీడియా వేదికగా నేరుగా ప్రజలను ఉద్దేశించి వీడియోల ద్వారా వివిధ జాతీయ కార్యక్రమాలు, సామాజిక అంశాలపై సందేశాలు ఇస్తున్నారు. ముఖ్యంగా యువతను ఆకర్షించేలా ఈ తరహా వీడియోలు విశేష ఆదరణ పొందుతున్నాయి.

వీడియో చూడండి..

Tomorrow, 7th August is National Handloom Day. Let’s make India’s handloom diversity popular.

Share your videos with your favourite handloom products, including GRWM videos on social media.

Don’t forget to use #NationalHandloomDay. pic.twitter.com/zoFdTXphRL

— Narendra Modi (@narendramodi) August 6, 2026