Fruits: పండ్లు, కూరగాయలపై ఈ స్టిక్కర్లేంటి.. వీటి అర్థం తెలుసా?

చాలామంది పట్టించుకోరు. కానీ, ఆ స్టిక్కర్లలో ఉండే నంబర్లు మీరు కొనే ఆహారం గురించిన ముఖ్యమైన రహస్యాలను వెల్లడిస్తాయి. అవి ఆర్గానిక్ పద్ధతిలో పండించినవా, జన్యుపరంగా మార్పు చేసినవి (GMO), లేదా సంప్రదాయ పద్ధతుల్లో పండించినవా అన్నది ఈ నంబర్ల ద్వారా తెలుసుకోవచ్చు. ఈ స్టిక్కర్లపై ఉండే సంఖ్యల కోడ్‌లను PLU (Price Look-Up) కోడ్‌లు అంటారు. ఇవి సాధారణంగా నాలుగు లేదా ఐదు అంకెలతో ఉంటాయి. ఈ కోడ్‌లను అర్థం చేసుకుంటే మీరు ఆరోగ్యకరమైన ఆహారాన్ని ఎంచుకోవడంలో చాలా సహాయపడుతుంది.

PLU కోడ్‌లను అర్థం చేసుకోవడం ఎలా?

నాలుగు అంకెల కోడ్, ‘3’ లేదా ‘4’తో ప్రారంభమైతే: ఈ కోడ్‌లు సాధారణంగా సంప్రదాయ పద్ధతుల్లో పండించిన పండ్లు, కూరగాయలను సూచిస్తాయి. అంటే, వీటిని పండించడానికి రసాయన ఎరువులు, పురుగుల మందులు ఉపయోగించి ఉండవచ్చు. ఉదాహరణకు, 4011 నంబర్ ఉన్న స్టిక్కర్ అరటిపండు సంప్రదాయ పద్ధతిలో పండించిందని తెలియజేస్తుంది.

ఐదు అంకెల కోడ్, ‘9’తో ప్రారంభమైతే: ఇది చాలా మంచి సంకేతం. ఈ నంబర్ ఉన్న పండ్లు, కూరగాయలు సేంద్రియ (Organic) పద్ధతిలో పండించినవి. అంటే, వీటిని ఎలాంటి రసాయనాలు, పురుగుల మందులు లేకుండా సహజ పద్ధతుల్లో సాగు చేశారని అర్థం. ఇది పర్యావరణానికి, మీ ఆరోగ్యానికి కూడా మంచిది. ఉదాహరణకు, 94011 కోడ్ ఉన్న అరటిపండు ఆర్గానిక్ అని తెలుపుతుంది.

ఐదు అంకెల కోడ్, ‘8’తో ప్రారంభమైతే: ఈ కోడ్ ఉన్న పండ్లు లేదా కూరగాయలు జన్యుపరంగా మార్పు చేసినవి (Genetically Modified Organism – GMO) అని సూచిస్తాయి. అంటే, వీటి జన్యువులను మార్చి పండించారని అర్థం. GMO ఉత్పత్తుల భద్రతపై చర్చలు జరుగుతున్నప్పటికీ, అవి వినియోగానికి సురక్షితమైనవిగా భావిస్తున్నారు. అయితే, చాలామంది వినియోగదారులు GMO ఉత్పత్తులకు దూరంగా ఉండటానికి ఇష్టపడతారు. ఉదాహరణకు, 84011 కోడ్ ఉన్న అరటిపండు GMO అని సూచిస్తుంది.

ఈ PLU కోడ్‌ల గురించి తెలుసుకోవడం వల్ల మీరు సరైన పండ్లు, కూరగాయలను ఎంపిక చేసుకోవచ్చు. ఆర్గానిక్ లేదా సంప్రదాయ ఉత్పత్తులను ఎంచుకోవడానికి ఈ స్టిక్కర్లు మీకు మార్గనిర్దేశం చేస్తాయి. ఈసారి మార్కెట్‌కు వెళ్ళినప్పుడు, స్టిక్కర్లపై ఉండే నంబర్లను గమనించడం మర్చిపోకండి!