సీజన్తో పనిలేదు..ఈ పందిరి మల్లె మీ ఇంట్లో ఉంటే.. ప్రతి రోజూ పూల వర్షమే..!
ఎండాకాలం అనగానే ముందుగా మామిడి పండ్లు గుర్తుకు వస్తాయి. మార్కెట్ నిండా రకరకాల మామిడి పండ్లు నోరూరిస్తుంటాయి. అలాగే, ఆడవాళ్లకు గుర్తుకు వచ్చేది మల్లెపూలు. అవును, సమ్మర్ సీజన్లో మల్లెపూలు ఎక్కువగా పూస్తాయి. సాయంత్రం అయిందంటే చెట్టు నిండా విరబూసి సూవాసనలు వెదజల్లుతుంటాయి. కానీ, సీజన్తో పనిలేకుండా ప్రతి నిత్యం పూలు పూసే పందిరి మల్లె మీకు గుర్తుందా..? దాని స్పెషల్ ఏంటో తెలిస్తే వెంటనే తెచ్చేసుకుంటారు.
Updated on: Apr 17, 2026 | 11:22 AM
గ్రామాల్లో ఇంటి గుమ్మం దాటగానే ముక్కుకు తగిలే మల్లెపూల సువాసన మనసును పులకింపజేస్తుంది. పల్లెటూళ్లలో ఇంటి ముందు పందిళ్లపై, ప్రహరీ గోడలపై విపరీతంగా పెరిగి, అద్భుతమైన సువాసనను వెదజల్లే తీగ మల్లె (Climbing Jasmine) గురించి . దీనిని గ్రామాల్లో “పందిరి మల్లె” అని కూడా పిలుస్తారు. దీనికి సంబంధించిన కొన్ని ఆసక్తికరమైన విషయాలు తెలిస్తే మీరు ఆశ్చర్యపోతారు. వెంటనే ఈ మొక్కను తెచ్చి పెంచటం మొదలుపెట్టేస్తారు. ముఖ్యంగా ఈ తీగ మల్లె మంచి సువాసనను వెదజల్లుతుంది. తీగ మల్లె పూలు సాయంత్రం వేళల్లో విచ్చుకుని, గ్రామం అంతా తెలిసేలా తియ్యటి సువాసనను పంచుతాయి.
పల్లెటూళ్లలో ఇంటి ముందు పందిళ్లపై అల్లుకుని, సాయంత్రం వేళల్లో అద్భుతమైన సువాసనను వెదజల్లే తీగ మల్లె (పందిరి మల్లె) గ్రామీణ జీవన సౌందర్యానికి ప్రతీక. సాధారణంగా గుండుమల్లె, బొండు మల్లెలు, జాజి మల్లె ఇలాంటి రకాలు వేసవి కాలం, వర్షాకాలం ప్రారంభంలో విపరీతంగా పూస్తాయి. కానీ, ఈ పల్లెటూరి నాటు పందిరి మల్లె మాత్రం సీజన్తో పని లేకుండా నిత్యం పూస్తూనే ఉంటుంది. ఇది చాలా వేగంగా అల్లుకునే తీగ జాతి. ఒక్క మొక్క నాటితే చాలు, కొద్ది కాలంలోనే ఇంటి పైకప్పు వరకు అల్లుకుంటుంది.
తీగ మల్లెకు ఎండ చాలా ముఖ్యం. కనీసం 5-6 గంటల పాటు నేరుగా ఎండ తగిలే చోట నాటాలి. ఎండ సరిగ్గా తగిలితేనే పూలు ఎక్కువగా పూస్తాయి. నీరు నిల్వ ఉండని సారవంతమైన మట్టి దీనికి శ్రేష్ఠం. నాటేటప్పుడు కొంచెం పశువుల ఎరువు కలిపితే మొక్క బలంగా పెరుగుతుంది. మొక్క ఎదుగుతున్న దశలో క్రమం తప్పకుండా నీరు పోయాలి. అయితే, మొగ్గలు వచ్చే ముందు నీటిని కొంచెం తగ్గించి, మట్టి ఎండినట్లు అనిపించినప్పుడు పోస్తే పూత బాగా వస్తుంది. పల్లెల్లో సాధారణంగా బియ్యం కడిగిన నీరు లేదా పులిసిన మజ్జిగను మొక్క మొదట్లో పోస్తుంటారు. ఇది మొక్కకు మంచి పోషణను అందిస్తుంది.
ఈ మొక్కతో ఆరోగ్య ప్రయోజనాలు కూడా ఉన్నాయని తెలిస్తే మరింత ఆశ్చర్యపోతారు. ఈ పూల సువాసన మనస్సును ప్రశాంతంగా ఉంచి, ఒత్తిడిని తగ్గిస్తుంది. అందుకే పూర్వం ఇళ్ల ముందు వీటిని కచ్చితంగా పెంచేవారు. తీగ మల్లె పూల నుండి తీసే నూనెను ఆయుర్వేదంలో చర్మ సమస్యలకు, కేశ సంరక్షణకు ఉపయోగిస్తారు.
