కిడ్నీలు ఆరోగ్యంగా ఉండాలంటే.. రోజుకు ఎంత వాటర్ తాగాలో తెలుసా..?

వేసవిలో హైడ్రేటెడ్‌గా ఉండటం చాలా అవసరం. నీరు తగినంతగా తాగడం వల్ల కేవలం శరీరాన్ని హైడ్రేటెడ్‌గా ఉంచడమే కాకుండా మూత్రపిండాల పనితీరును కూడా మెరుగుపరుస్తుంది. నీరు త్రాగడం వల్ల శరీరంలో ఉన్న మలినాలు బయటకు వెళ్లి శరీరంలోని అవయవాలు సరిగా పనిచేస్తాయి. ముఖ్యంగా వేసవిలో పెరిగిన ఉష్ణోగ్రతల వల్ల నీరు త్రాగడం మరింత అవసరం. సరైన హైడ్రేషన్ లేకపోతే మూత్రపిండాలకు మేలు జరగదు. దీని వల్ల రోగాల బారిన పడే ప్రమాదం ఉంది.

వేసవిలో ఉష్ణోగ్రతలు పెరుగుతున్నప్పుడు శరీరం ఎక్కువ చెమట ద్వారా ద్రవాలను కోల్పోతుంది. ఈ సమయంలో ఎక్కువ నీరు త్రాగడం ద్వారా శరీరంలోని ద్రవాల సమతుల్యతను నిలుపుకోవచ్చు. నీరు తగినంతగా తాగడం మూత్రపిండాలకు అవసరం. ఎందుకంటే అవి శరీరంలోని అదనపు ద్రవాలను బయటకు పంపడం, విషపదార్థాలను తొలగించడం వంటి కీలక విధులను నిర్వహిస్తాయి. అందువల్ల వేసవిలో ఎక్కువగా నీరు తాగడం శరీరానికి అవసరమైన బలం అందిస్తుంది.

మూత్రపిండాలు శరీరంలో అత్యంత ముఖ్యమైన అవయవాలలో ఒకటి. ఇవి రక్తంలో ఉన్న మలినాలను తొలగించడం, ఎలక్ట్రోలైట్ల సమతుల్యతను కాపాడటం, రక్తపోటు నియంత్రణ వంటి పనులు చేస్తాయి. కానీ ఈ ప్రక్రియలన్నీ సజావుగా సాగేందుకు తగినంత నీరు అవసరం. రోజుకు తగినంత నీరు త్రాగకపోతే, మూత్రపిండాలు ఒత్తిడికి లోనవుతాయి. ఈ ఒత్తిడితో వాటి పని క్రమంగా తగ్గి మూత్రపిండాల్లో రాళ్లు ఏర్పడే అవకాశం ఉంటుంది. అందువల్ల ప్రతి రోజు తగినన్ని నీరు తాగడం అత్యవసరం.

మూత్రపిండాలు శరీరంలో ఫిల్టర్ సిస్టమ్ లా పని చేస్తాయి. నీరు తగినంతగా తీసుకోకపోతే రక్తంలో ఉన్న వ్యర్థాలు మూత్రపిండాల్లో పేరుకుపోతాయి. దీనివల్ల అవి ఎక్కువగా పని చేయాల్సి వస్తుంది. ఇది రాళ్లకు దారితీస్తుంది. ఈ రాళ్లు కొన్ని సందర్భాల్లో పెద్ద సమస్యలకు కారణం కావచ్చు అని ముంబైలోని యూరాలజిస్ట్ డాక్టర్ అంటున్నారు. వేసవిలో నీరు త్రాగడం కేవలం ఒక అలవాటు మాత్రమే కాదు. ఆరోగ్యానికి కూడా చాలా ముఖ్యం.

ప్రతిరోజు కనీసం ఎనిమిది గ్లాసుల నీరు తాగాలి. అంటే సుమారు రెండు లీటర్ల వరకు. అయితే వేసవిలో శరీరం ఎక్కువగా చెమటతో నీటిని కోల్పోతుంది. ఆ సమయంలో ఆ నష్టాన్ని భర్తీ చేయడానికి ఎక్కువ ద్రవాలు తీసుకోవడం చాలా ముఖ్యం. సాధారణ నీరు, రసం, కొబ్బరి నీరు, నిమ్మరసం వంటి ద్రవాలను పుష్కలంగా త్రాగడం వల్ల శరీరానికి కావలసిన నీటి అవసరం తీరుతుంది. అందువల్ల వేసవిలో శరీరం ఆరోగ్యంగా ఉండాలంటే రోజంతా ద్రవాలు తాగడం చాలా అవసరం అంటున్నారు వైద్య నిపుణులు.