మహిళల్లో మొటిమలు ఎలా వస్తాయో తెలుసా..? షాకింగ్ విషయాలు మీకోసం..!

మొటిమలు ఒక సాధారణమైన చర్మ సమస్య అయినా మహిళలలో ఇది ఆత్మవిశ్వాసాన్ని తగ్గించేలా మారుతుంది. ముఖ్యంగా ముఖంపై వచ్చే మొటిమలు అందాన్ని దెబ్బతీసేలా ఉంటాయి. ఇది కేవలం బయట చర్మాన్ని ప్రభావితం చేసే సమస్య కాదు దాని వెనుక ఆరోగ్య సంబంధిత, హార్మోన్లతో సంబంధమున్న పలు కారణాలు ఉంటాయి. మహిళల్లో మొటిమలు ఏర్పడే ముఖ్యమైన కారణాల గురించి ఇప్పుడు తెలుసుకుందాం.

పాలీసిస్టిక్ ఓవరీ సిండ్రోమ్‌ (PCOS) అనేది మహిళల్లో సాధారణంగా కనిపించే హార్మోన్ల సమస్య. ఇది సంతానం పొందే శక్తికి సంబంధించిన అవయవాలపైనే కాదు.. ముఖం మీద కూడా ప్రభావం చూపుతుంది. ఈ పరిస్థితిలో ఆండ్రోజెన్ అనే పురుష హార్మోన్ స్థాయి ఎక్కువవుతుంది. ఫలితంగా చర్మంలో సెబమ్ అనే ఆయిల్ ఎక్కువగా ఉత్పత్తి అవుతుంది. ఇది చర్మపు రంధ్రాలను మూసివేసి మొటిమలుగా మారుతుంది.

మెనోపాజ్ దశలో మహిళల శరీరంలో ఎస్ట్రోజన్, ప్రొజెస్టెరాన్ వంటి హార్మోన్ల స్థాయిలు గణనీయంగా మారుతుంటాయి. ఈ హార్మోన్లలో వచ్చే తేడాలు చర్మాన్ని ప్రభావితం చేస్తూ మొటిమలకు దారి తీస్తాయి. ఎస్ట్రోజన్ స్థాయి తగ్గితే చర్మం పొడిబారుతుంది.. సెబమ్ ఉత్పత్తి ఎక్కువై మొటిమల రూపంలో బయటపడుతుంది.

చాలా మంది మహిళల్లో నెలసరి రాకముందు లేదా సమయంలో మొటిమలు వచ్చే సమస్య కనిపిస్తుంది. దీనికి కారణం శరీరంలోని హార్మోన్ల మార్పులు. ఈ దశలో సెబమ్ ఉత్పత్తి పెరిగి చర్మాన్ని ఆక్రమించేసే బ్యాక్టీరియా పెరిగే అవకాశం ఎక్కువగా ఉంటుంది.

మానసిక ఒత్తిడి శరీరంలోని కార్టిసోల్ అనే హార్మోన్‌ను ఉత్పత్తి చేయిస్తుంది. ఈ హార్మోన్ సెబమ్ ఉత్పత్తిని ప్రేరేపిస్తుంది. దీని వల్ల చర్మం ఆయిలీగా మారి మొటిమల ఏర్పాటుకు దోహదం చేస్తుంది. రోజూ ఒత్తిడిని ఎదుర్కొంటున్న మహిళలు ఈ సమస్యను ఎక్కువగా ఎదుర్కొనవచ్చు.

సంతాన నియంత్రణ మాత్రలు శరీరంలోని హార్మోన్ల నిర్మాణాన్ని మార్చగలవు. తరచూ పిల్స్ తీసుకోవడం వలన హార్మోన్ల సమతుల్యత తప్పిపోయి మొటిమలు వచ్చే అవకాశం పెరుగుతుంది. కొన్ని సందర్భాల్లో మాత్రలు ఆండ్రోజెన్ స్థాయిని పెంచేలా పనిచేయవచ్చు.

చర్మానికి సరిపడని స్కిన్ కేర్ ఉత్పత్తులు వాడటం కూడా మొటిమలకు కారణం అవుతుంది. రాత్రివేళ మేకప్ తీసి శుభ్రం చేయకపోవడం వల్ల చర్మపు రంధ్రాలు మూసివేయబడి మలినాలు చేరతాయి. అలాగే రసాయనాలతో తయారైన క్రీములు, ఫౌండేషన్‌లు కూడా చర్మానికి హానికరం కావచ్చు.

ఎక్కువగా చక్కెర, కొవ్వు పదార్థాలు, ప్రాసెస్డ్ ఫుడ్ తీసుకోవడం వల్ల శరీరంలో ఇన్సులిన్ స్థాయి పెరిగి అది చర్మాన్ని ప్రభావితం చేస్తుంది. ఇలా జంక్ ఫుడ్ ఎక్కువగా తినేవారిలో మొటిమలు రావడం కామన్‌గా కనిపిస్తుంది.

మొటిమల సమస్య కొన్ని కుటుంబాల్లో వారసత్వంగా వస్తుంది. మీ తల్లిదండ్రుల్లో ఎవరైనా ఈ సమస్యతో ఇబ్బంది పడ్డారా అంటే మీకూ వచ్చే అవకాశం ఉంది. పర్యావరణ కాలుష్యం, దుమ్ము, ధూళి వంటివి కూడా చర్మానికి హాని చేసి మొటిమలుగా మారుతాయి. ఈ కారణాలను గుర్తించి వాటిని నియంత్రించగలిగితే మొటిమల సమస్యను సులభంగా తగ్గించుకోవచ్చు.