Health Tips: శీతాకాలంలో ముల్లంగిని ఇలా వండుకుని తింటే అద్భుత ఆరోగ్య ప్రయోజనాలు పొందొచ్చు..
మంచి ఆహారం మంచి ఆరోగ్యాన్ని పెంపోందిస్తుంది. మనం తినే ఆహారమే మన ఆరోగ్యాన్ని నిర్దేశిస్తుంది. అందుకే ప్రతీ ఒక్కరూ తప్పనిసరిగా ఆరోగ్యకరమైన ఆహారాన్ని..
Updated on: Oct 21, 2022 | 4:52 PM
మంచి ఆహారం మంచి ఆరోగ్యాన్ని పెంపోందిస్తుంది. మనం తినే ఆహారమే మన ఆరోగ్యాన్ని నిర్దేశిస్తుంది. అందుకే ప్రతీ ఒక్కరూ తప్పనిసరిగా ఆరోగ్యకరమైన ఆహారాన్ని తీసుకోవాలని సూచిస్తుంటారు వైద్యులు, ఆరోగ్య నిపుణులు. కాదని రుచి కోసం వెంపర్లాడితే ఆస్పత్రులకు బిల్లులు కట్టాల్సి వస్తుందని అంటున్నారు. సాధారణంగా ప్రజలను సీజనల్ వ్యాధులు వేధిస్తుంటాయి. ఆ వ్యాధుల బారిన పడకుండా ఉండేందుకు పోషకాలు కలిగిన ఆహారం తీసుకోవడం తప్పనిసరి. కొన్ని ఆహార పదార్థాలలో పోషకాలు పుష్కలంగా ఉంటాయి. అలాంటి వాటిలో ముల్లంగి ఒకటి.
ముల్లంగిలో అవసరమైన విటమన్లు, ఖనిజాలు, పోషక సమ్మేళనాలు ఉంటాయి. ఇవి ఆరోగ్యంపై సానుకూల ప్రభావాన్ని చూపుతాయి. చలికాలంలో ముల్లంగిని తీసుకోవడం వలన ఆరోగ్యం మరింత పెరుగుతుందని చెబుతున్నారు వైద్యులు. ఆయుర్వేదం ప్రకారం ముల్లంగి అనేక అనారోగ్యాలను నయం చేస్తుంది. ముల్లంగిని 5 రకాలుగా, రుచికరమైన వంటకాలను చేసుకుని ఆహారంలో తీసుకోవచ్చని నిపుణులు చెబుతున్నారు. ఆ వంటకాలు ఏంటో ఇప్పుడు తెలుసుకుందాం..
ముల్లంగి పరోటా..
గోధుమ పిండి, నెయ్యి కలపాలి. మరో గిన్నెలో తురిమిన ముల్లంగి, కొత్తిమీర తరుగు, తరిగిన అల్లం, పచ్చిమిర్చి, నిమ్మరసం, ఉప్పు వేసి కలపాలి. పిండిని దీపం కుందులు మాదిరిగా చేయాలి. ఒక్కోదాంట్లో ముల్లంగి మిశ్రమాన్ని వేసి, క్లోజ్ చేయాలి. ఆ స్టఫ్డ్ బాల్‌లను చపాతీ ఆకారంలో రోల్ చేయాలి. ఆ పరోటాలను నెయ్యి అద్ది తవాలో గోధుమ రంగు వచ్చే వరకు కాల్చి, పెరుగుతో వేడి వేడిగా తింటే టేస్టీకి టేస్టీ, ఆరోగ్యానికి ఆరోగ్యం సొంతమవుతుంది.
ముల్లంగి కూర..
శనగపిండి, కొత్తిమీర, జీలకర్ర పొడి, ఎర్ర మిరప పొడి, పసుపు పొడి, ఉప్పు, నూనె కలపాలి. ఆ మిశ్రమాన్ని పక్కన పెట్టుకోవాలి. ఆ తరువాత నూనెలో ఆవాలు వేయించాలి. ఆ తరువాత ఇంగువ, తరిగిన ముల్లంగి వేసి బాగా వేయించాలి. ముల్లంగి ఆకులు వేసి మళ్లీ వేయించాలి. అప్పుడప్పుడు కలుపుతూ రెండు నిమిషాల పాటు మూతపెట్టి ఉడికించాలి. కాసేపటి తరువాత బేసన్ మిశ్రమాన్ని వేసి మూత పెట్టాలి. అప్పుడప్పుడు కలుపుతూ మరో రెండు నిమిషాల పాటు ఉడికించాలి. ముల్లంగి కూర రెడీ అవుతుంది. ఈ కూరను రోటీలు, పరాటాలతో కలిపి తింటే అద్భుతంగా ఉంటుంది. ముల్లంగి కూర, పరోటాతో తింటే శరీరానికి అవసరమైన పోషకాలు అందుతాయి. చలికాలంలో దీనిని తింటే మరిన్ని ప్రయోజనాలు ఉంటాయి.
ముల్లంగి, పప్పు కూర..
ప్రెజర్ కుక్కర్‌లో తరిగిన ముల్లంగి, పప్పు, ఉప్పు, పసుపు పొడి, నీటిని కలపాలి. మూత పెట్టి మూడు విజిల్స్ వచ్చే వరకు ఉడికించాలి. జీలకర్ర, బే ఆకు, లవంగాలను నెయ్యిలో కొన్ని సెకన్ల పాటు వేయించాలి. పచ్చిమిర్చి, అల్లం, ఎర్ర మిరపకాయ, ఇంగువ, ఉడికించిన ముల్లంగి మిశ్రమం, నీరు వేసి, అప్పుడప్పుడు కలుపుతూ రెండు-మూడు నిమిషాలు ఉడికించాలి. తరిగిన కొత్తిమీర వేసి బాగా కలపాలి. ముల్లంగి పప్పు రెడీ. వేడి వేడిగా, కాస్త నెయ్యి వేసుకుని తింటే సూపర్ టేస్ట్ ఉంటుంది.
ముల్లంగి ఖీర్..
తురిమిన ముల్లంగిని వేడి నీటిలో ఉడకబెట్టి, వడకట్టి పక్కన పెట్టుకోవాలి. ఒక పాన్‌లో పాలు పోసి మరిగించాలి. అందులో ఏలకుల పొడి, బే ఆకులు వేసి ఉడికించాలి. ముల్లంగిని నెయ్యిలో వేసి వేయించాలి. ఆ తరువాత పాలలో వేసి బాగా కలపాలి. కుంకుమ పువ్వు, పాల మిశ్రమం వేసి మరిగించాలి. నెయ్యిలో వేయించిన జీడిపప్పు, ఎండుద్రాక్ష, బాదం, తురిమిన కొబ్బరి వేసి, కొన్ని నిమిషాలపాటు ఉడికించాలి. ఇందులో బెల్లం పొడి, కొద్దిగా ఉప్పు వేసి బాగా కలపాలి. వేడి వేడి ముల్లంగి ఖీర్ రెడీ అయినట్లే. టేస్టీ, హెల్తీ ఖీర్‌ను గుటకలు వేసుకుంటూ తినేయొచ్చు. ఈ ఖీర్, శరీరానికి తక్షణ శక్తిని ఇస్తుంది.
ముల్లంగి సూప్..
ముల్లంగి ముక్కలను ఒక పాన్‌లో వేసి వేయించాలి. గరం మసాలా పొడి, నీళ్లతో కలిపి ముల్లంగి ముక్కలు మెత్తగా మారే వరకు బాగా ఉడికించాలి. ఉడికిన ముల్లంగి ముక్కలను గుజ్జుగా కలపాలి. ఆ తరువాత వడకట్టాలి. వడకట్టిన ముల్లంగి ద్రవంలో నీరు, మిరియాల పొడి కాలపాలి. ఈ సూప్‌ను మళ్లీ 5 నిమిషాలు ఉడికించాలి. తరిగిన కొత్తిమీర ఆకులు, ముల్లంగి ముక్కలతో ఆ సూప్‌ను అలంకరించాలి. శీతాకాలంలో రాత్రి వేళ వేడి వేడిగా తాగితే మంచి ప్రయోజనాలు ఉంటాయి.
మరిన్ని హెల్త్ వార్తల కోసం ఈ లింక్ క్లిక్ చేయండి..
