Eye Health: వయసు పెరిగే కొద్దీ కళ్ళు మసకబారతాయెందుకు? మీ చూపును కాపాడుకునే సూపర్ టిప్స్..

వయసు పెరిగే కొద్దీ మన శరీరంలో అనేక మార్పులు చోటు చేసుకుంటాయి. వాటిలో ముఖ్యమైనది కంటి చూపులో మార్పు. చిన్నప్పుడు స్పష్టంగా కనిపించినవి, వయసు పెరిగే కొద్దీ మసకబారడం, దగ్గరివి సరిగా కనిపించకపోవడం వంటివి సహజం. అయితే, ఈ మార్పులు ఎందుకు వస్తాయి? వీటిని ఎలా ఆలస్యం చేయవచ్చు? అనే విషయాలపై మెధావి స్కిల్స్ యూనివర్సిటీ పరిశోధకులు ఆసక్తికరమైన విషయాలను వెల్లడించారు.

కంటి చూపులో మార్పులు:

మన కన్ను కాంతిని వంచే విధానంలో మార్పుల వల్లే సాధారణ కంటి సమస్యలు వస్తాయి. ఇందులో మయోపియా (దగ్గరి చూపు), హైపర్‌మెట్రోపియా (దూరపు చూపు), మరియు ప్రెస్బియోపియా (వయసు పెరిగే కొద్దీ దగ్గరి వస్తువులపై దృష్టి పెట్టలేకపోవడం) వంటివి ఉంటాయి. పరిశోధన ప్రకారం, వయసు పెరిగే కొద్దీ కంటిలోని లెన్స్ బిగుసుకుపోవడం, దృష్టిని కేంద్రీకరించే కండరాలు బలహీనపడటం వల్ల కంటి చూపులో మార్పులు వస్తాయని డాక్టర్ అయన్ ఛటర్జీ వివరించారు.

వివిధ వయసులలో కంటి చూపు:

20లలో: ఈ వయసు వారిలో మయోపియా (దగ్గరి చూపు) ఎక్కువగా కనిపిస్తుంది. అధ్యయనం ప్రకారం, 30 ఏళ్ల లోపు వారిలో 28.5% మంది మయోపియాతో బాధపడుతున్నారు. దీనికి ప్రధాన కారణం ఎక్కువ సమయం స్క్రీన్ల ముందు గడపడం, అవుట్‌డోర్ కార్యకలాపాలు తగ్గడం అని డాక్టర్ ఛటర్జీ తెలిపారు.

30లలో, 40లలో: 30లలో హైపర్‌మెట్రోపియా (దూరపు చూపు) సాధారణమవుతుంది. చిన్న అక్షరాలు చదవడానికి ఇబ్బంది పడటం మొదలవుతుంది. 40లలో ప్రెస్బియోపియా (దగ్గరి చూపు మసకబారడం) వస్తుంది. పుస్తకాలు దూరం పెట్టి చదవడం, ఫోన్‌లోని అక్షరాలను పెద్దవిగా చేయడం వంటివి ఈ దశలో కనిపిస్తాయి.

కంటి పరీక్షలు ఎందుకు ముఖ్యం?

ఈ మార్పులు క్రమంగా జరుగుతాయి కాబట్టి, దృష్టి గణనీయంగా క్షీణించే వరకు మీరు వాటిని గమనించకపోవచ్చు. అందుకే సాధారణ కంటి పరీక్షలు చాలా అవసరం. “సకాలంలో సరైన లెన్స్‌లను సూచించడం ద్వారా కంటి చూపును కాపాడవచ్చు, మరింత క్షీణించకుండా నిరోధించవచ్చు” అని డాక్టర్ ఛటర్జీ సూచించారు.

కంటి ఆరోగ్యాన్ని కాపాడటానికి చిట్కాలు:

వార్షిక కంటి పరీక్షలు: మీ కంటి చూపు బాగానే ఉందని భావించినా, ఏటా కంటి పరీక్ష చేయించుకోండి.

స్క్రీన్ సమయం తగ్గించండి: స్క్రీన్ సమయాన్ని తగ్గించి, ప్రతి 20 నిమిషాలకు ఒకసారి 20 అడుగుల దూరంలో ఉన్న వస్తువును 20 సెకన్ల పాటు చూడండి (20-20-20 నియమం).

బహిరంగ కార్యకలాపాలు: ముఖ్యంగా పిల్లలు, యువకులు బయట ఎక్కువ సమయం గడపడం వల్ల మయోపియాను నివారించవచ్చు.

లక్షణాలను నిర్లక్ష్యం చేయవద్దు: మసకబారిన దృష్టి, కంటి ఒత్తిడి లేదా తలనొప్పి వంటివి కంటి సమస్యలకు తొలి సంకేతాలు కావచ్చు.

సరియైన లెన్స్‌లు వాడండి: వైద్యులు సూచించిన కళ్లద్దాలు లేదా కాంటాక్ట్ లెన్స్‌లను తప్పనిసరిగా వాడాలి.

మీ కళ్ళు ఎల్లప్పుడూ ఒకేలా ఉండవు. అవి నిరంతరం మారుతూ ఉంటాయి. ప్రారంభ దశలోనే గుర్తించడం, సరళమైన మార్పులు చేసుకోవడం ద్వారా మన కళ్ళను ఆరోగ్యంగా, స్పష్టంగా ఉంచుకోవచ్చు.