సావిత్రి చివరి రోజుల్లో కోమాలో అచేతనంగా ఉన్నప్పుడు వెళ్లిన ఒకే ఒక్క తెలుగు నటి ఎవరంటే..

దివంగత నటి జమున గతంలో ఇచ్చిన ఇంటర్వ్యూలో దివంగత మహానటి సావిత్రి గారి జీవితంలోని విషాద ఘట్టాలను, తనతో ఆమెకున్న ఆత్మీయ అనుబంధాన్ని కన్నీళ్లతో వివరించారు. సావిత్రి పెళ్లి విషయంలో అప్పట్లో నాగేశ్వరరావు గారు, చక్రపాణి గారు వంటి పెద్దలు వద్దని వారించిన విషయాన్ని జమున గుర్తుచేసుకున్నారు. అప్పటికి తాను చిన్నదాన్నవడంతో వారి ప్రేమ వ్యవహారం గురించి పెద్దగా తెలియదని జమున పేర్కొన్నారు. అయితే, సావిత్రి గారికి పెళ్లయి, పిల్లలు పుట్టి, తర్వాత మద్యపానానికి బానిసైన సమయంలో తాను ఆమెకు చాలా దగ్గరయ్యానని చెప్పారు. ఆ కష్ట కాలంలో సావిత్రి బాధపడుతుంటే, “నీకు తెలిసే పెళ్లి చేసుకున్నావు, ఇప్పుడు నీ జీవితం నీది కాదు. నీకు ఇద్దరు పిల్లలు ఉన్నారు, వాళ్ల గురించి ఆలోచించు. ఉన్న ఆస్తులన్నీ పోయాయి, కనీసం ఊటీలో ఉన్న ఇంకొక ఆస్తిని అమ్మేసి ఒక మంచి ఫిక్స్డ్ డిపాజిట్ చేసుకో. సావిత్రి, ఆ ఇల్లు కాకపోయినా నీ స్థాయికి తగినట్టు ఉండు” అని సలహా ఇచ్చేదానిని జమున పంచుకున్నారు. జెమినీ గణేష్ గురించి అప్పటికే చెడు ప్రచారం ఉన్నప్పటికీ, సావిత్రి ఆయన్ని ఎందుకు పెళ్లి చేసుకోవాలనుకున్నారో ఆమె తనకు వివరంగా చెప్పలేదని జమున వెల్లడించారు. సావిత్రి కోమాలోకి వెళ్లినప్పుడు తాను ఒక్కదాన్నే వెళ్లి చూసి వచ్చానని జమున భావోద్వేగంగా తెలిపారు.

అప్పట్లో చెన్నైలో ఒక కార్యక్రమానికి వెళ్లినప్పుడు, తన భర్త శ్రీరామమూర్తితో కలిసి కోమాలో ఉన్న సావిత్రిని సందర్శించానని ఆమె గుర్తుచేసుకున్నారు. అంత భారీ మనిషి కేవలం ఒక చిన్న మాంసం ముద్దలా అయిపోయి పడి ఉండటంతో ఎంతో ఏడ్చేశానని అన్నారు. సావిత్రిని “అక్కా” అని పిలిచేదాన్నని, ఆమె తనను “చెల్లెమ్మా” అని ఆప్యాయంగా పిలిచేదని జమున తెలిపారు. జమున.. సావిత్రి గొప్ప దాతృత్వాన్ని కూడా వివరించారు. ఒకసారి జలగం వెంగళరావు.. సినిమా ఇండస్ట్రీ నుంచి సైక్లోన్ రిలీఫ్ ఫండ్ కోసం విరాళాలు సేకరించడానికి వచ్చారట. అప్పుడు ఆయన మెడలో దండ వేసినప్పుడు ఎవ్వరూ నయాపైసా ప్రకటించలేదట. సావిత్రి.. తన మెడలో ఉన్న బంగారు దండను తీసి ఇచ్చేసారని, ఆ దండను వేలం వేయగా ఆ రోజుల్లో 25 వేల రూపాయలు వచ్చాయని, ఆ డబ్బును సైక్లోన్ సహాయ నిధికి ఇచ్చారని జమున వెల్లడించారు.

అంతటి ఉదార స్వభావి అయిన సావిత్రి కష్టాల్లో ఉంటే, ప్రభుత్వం ఏదో ఒకటి చేయాలని తన భర్త ద్వారా అప్పటి ముఖ్యమంత్రి అంజయ్య గారికి జమున విజ్ఞప్తి చేశారు. అంజయ్య గారు వెంటనే స్పందించి, సావిత్రి గారిని అమెరికా తీసుకెళ్లి చికిత్స అందించడానికి అన్ని ఖర్చులు ప్రభుత్వమే భరిస్తుందని హామీ ఇచ్చారని, డాక్టర్లతో సంప్రదించి ఏర్పాట్లు చేయమని చెప్పారని జమున తెలిపారు. అయితే, మరుసటి రోజు ఉదయం మళ్లీ వెళ్ళినప్పుడు, అప్పటికి డాక్టర్లు ఉన్నారని, వారు సావిత్రిని తరలించడం అసాధ్యమని, “కదిపితే ఆవిడ ఇక ఉండదు, మేమంతా అమెరికన్ డాక్టర్లమే కాబట్టి ఏమి కదిలించుకోకండి అంతే అట్లాగే ఉంటారు మరి కొన్నాళ్ళు” అని చెప్పారని జమున కన్నీటిపర్యంతమయ్యారు. సావిత్రి జీవితం మొత్తం ఒక పెద్ద విషాదం అని, అంతటి విషాదం ఇంకెవరికీ రాలేదని జమున అన్నారు. ఆమె అద్భుతమైన నటి అని, కళ్లతోనే కథలను, భావాలను పలికించగల గొప్ప నటి అని జమున భావోద్వేగంగా గుర్తుచేసుకున్నారు.

Savitri Jamuna

Also Read: ఏసీ కూలింగ్ సరిగ్గా రావడం లేదని టెక్నిషియన్‌ను పిలిపించారు.. ఓపెన్ చేసి చూడగా..