టాలీవుడ్ ను షేక్ చేస్తున్న డ్యాన్సర్ల పాలిటిక్స్

టాలీవుడ్ డ్యాన్సర్స్ అసోసియేషన్‌లో నెలకొన్న వివాదం రోజురోజుకు తీవ్రమవుతోంది. సస్పెన్షన్లు, రాజీనామాలతో మొదలైన ఈ రగడ ఇప్పుడు ఎన్నికల నోటిఫికేషన్, కోర్టు జోక్యం వరకు చేరింది. ఫిలిం ఇండస్ట్రీ ఎంప్లాయిస్ ఫెడరేషన్ (FIEF) పెద్దలు, అసోసియేషన్ సభ్యులు కలిసి ఒక నిర్ణయం తీసుకున్నప్పటికీ, ఎన్నికల అంశం మళ్ళీ కొత్త వివాదానికి దారి తీసింది.లేబర్ కమీషనర్ కార్యాలయంలో జరిగిన విచారణకు డ్యాన్సర్స్ అసోసియేషన్ గైర్హాజరు కావడంతో ఎటువంటి పురోగతి కనిపించలేదు. హైకోర్టు ఆదేశాలు వచ్చే వరకు ఎన్నికలు పెట్టవద్దంటూ అసోసియేషన్ లేబర్ ఆఫీసర్ కు లేఖ ఇవ్వడంతో వివాదం యథాతథంగా మారింది. దీంతో ఈ నెల 9వ తేదీన అసోసియేషన్ ఎన్నికలు జరుగుతాయా లేదా అనే సందిగ్ధత నెలకొంది.మరోవైపు, ఫిలిం ఫెడరేషన్ డ్యాన్సర్స్ అసోసియేషన్ కు ఫైనల్ నోటీసులు పంపింది. ఆరోపణలు ఎదుర్కొంటున్న ప్రధాన కార్యదర్శి పదవికి మాత్రమే ఎన్నికలు నిర్వహించాలని, లేదా మొత్తం ఎగ్జిక్యూటివ్ బాడీకి ఎన్నికలు నిర్వహించాలని రెండు ప్రతిపాదనలు చేసింది. ఈ వ్యవహారం ప్రస్తుతం కోర్టు పరిధిలో ఉండటంతో తదుపరి పరిణామాలపై అందరి దృష్టి నెలకొంది.