MLC Kavitha : నటుడు అర్జున్ నిర్మించిన హనుమాన్ దేవాలయాన్ని సందర్శించిన ఎమ్మెల్సీ కవిత

యాక్షన్ కింగ్ అర్జున్ ప్రస్తుతం విలన్ గా క్యారెక్టర్ ఆర్టిస్ట్ గా సినిమాలు చేస్తూ దూసుకుపోతున్నారు. అలాగే రీసెంట్ గా దర్శకుడిగానూ మారారు. ఒకప్పుడు హీరోగా అర్జున్ కు మంచి క్రేజ్ ఉండేది. ఎన్నో సూపర్ హిట్ సినిమాల్లో నటించి అలరించారు అర్జున్. ఇక అర్జున్ కు సినిమాలతో పాటు దైవ భక్తి కూడా ఎక్కువే.. ఆయన హనుమాన్ ఆలయాన్ని కూడా నిర్మించారు. తాజాగా ఆ ఆలయాన్ని టిఆర్ఎస్ ఎమ్మెల్సీ కవిత సందర్శించారు. ప్రముఖ ఆంగ్ల పత్రిక నిర్వహించనున్న సదస్సులో పాల్గొనడానికి చెన్నైలో పర్యటిస్తున్న టిఆర్ఎస్ ఎమ్మెల్సీ కల్వకుంట్ల కవిత ప్రముఖ అర్జున్ సర్జ నిర్మించిన హనుమాన్ దేవాలయాన్ని సందర్శించి ప్రత్యేక పూజలు చేశారు. అర్జున్ దంపతులు కల్వకుంట్ల కవితకు ఘనస్వాగతం పలికారు.

ఈ సందర్భంగా కవిత మీడియాతో మాట్లాడుతూ.. చెన్నైలో పర్యటించడం తనకు ఎప్పుడూ ఆనందంగా ఉంటుందని తెలిపారు. తమిళనాడు అస్తిత్వం చాలా గొప్పదని, అక్కడి ప్రజలు స్ఫూర్తిదాయకంగా ఉంటారని అన్నారు. తమిళనాడు ప్రజలు తమ సంస్కృతి భాష చరిత్ర వారసత్వం పట్ల గర్వంగా ఉంటారని, ప్రతి ఒక్కరికి ఆ గౌరవభావం ఉండాలని అన్నారు.

ఉమ్మడి ఆలోచన తత్వం భారతీయులను ఐక్యంగా ఉంచుతుండడం గర్వంగా ఉందని కవిత తెలిపారు. దేశంలోని అతిపెద్ద హనుమాన్ దేవాలయాన్ని నిర్మించినందుకు అర్జున్ కు కవిత అభినందనలు తెలిపారు.