Box Office 2025: రూ.300 కోట్ల క్లబ్‌లో చేరిన సినిమాలు.. టాలీవుడ్‌ లిస్ట్‌లో ఉన్నవి ఎన్ని?

2025 సంవత్సరం భారతీయ చలన చిత్ర పరిశ్రమకు ఒక మైలురాయిగా నిలిచింది. కరోనా అనంతర పరిస్థితుల నుంచి కోలుకుని, బాక్సాఫీస్ వద్ద రికార్డుల సునామీని సృష్టించింది. ఈ ఏడాది అనేక చిత్రాలు ప్రేక్షకులను థియేటర్లకు రప్పించడంలో విజయవంతమయ్యాయి. ముఖ్యంగా, రూ.300 కోట్ల గ్రాస్ కలెక్షన్స్ క్లబ్ లో ఏకంగా 8 సినిమాలు చేరి, భారతీయ సినిమా శక్తిని ప్రపంచానికి చాటిచెప్పాయి. అయితే, ఈ ఘనతలో సౌత్, బాలీవుడ్ చిత్రాలు పోటీపడినప్పటికీ, ఇందులో పాన్ ఇండియా స్థాయిలో దూసుకుపోతున్న టాలీవుడ్ నుంచి ఒక్క సినిమా కూడా లేకపోవడం సినీ అభిమానులకు, ట్రేడ్ వర్గాలకు ఆశ్చర్యం కలిగిస్తోంది!

8 సినిమాలు..

ఈ ఏడాది ప్రపంచవ్యాప్తంగా రూ.300 కోట్ల మార్క్‌ దాటి 8 సినిమాలు బాక్సాఫీస్‌ను షేక్ చేశాయి. ఈ జాబితాలో అగ్రస్థానంలో నిలిచిన హిందీ చిత్రం ‘ఛావా’. విక్కీ కౌశల్, అక్షయ్ ఖన్నా, రష్మిక మందన్న నటించిన ఈ ఎపిక్ హిస్టారికల్ యాక్షన్ డ్రామా కేవలం 7 రోజుల్లోనే రూ.807.91 కోట్లు వసూలు చేసి రికార్డు సృష్టించింది. దీని తర్వాత స్థానంలో కన్నడ నుంచి రిషబ్ శెట్టి దర్శకత్వం వహించిన ‘కాంతార: ఎ లెజెండ్ చాప్టర్ 1 ఉంది, ఇది 4 రోజుల్లోనే రూ.852.21 కోట్లను దాటింది.

మరో ముఖ్యమైన చిత్రం తమిళ సూపర్ స్టార్ రజనీకాంత్ నటించిన ‘కూలీ’. లోకేష్ కనగరాజ్ దర్శకత్వం వహించిన ఈ యాక్షన్ థ్రిల్లర్ కేవలం 3 రోజుల్లోనే రూ.300 కోట్ల మార్కును దాటి, మొత్తం రూ.518 కోట్లు వసూలు చేసింది. హిందీ నుంచి చిన్న సినిమాగా విడుదలైన ‘సైయారా’ రూ.570.33 కోట్ల వసూళ్లు రాబట్టి బ్లాక్​బస్టర్​ హిట్​గా నిలిచింది.

ఈ సినిమా 9 రోజుల్లోనే రూ. 300 కోట్ల మార్క్​ దాటేసింది. హృతిక్ రోషన్-జూనియర్ ఎన్టీఆర్ నటించిన స్పై యాక్షన్ థ్రిల్లర్ ‘వార్ 2’7 రోజుల్లో రూ. 364.35 కోట్లు, ‘ధురంధర్’ 7 రోజుల్లో రూ.313.75 కోట్లు రాబట్టి ఈ క్లబ్‌లో చేరాయి. కన్నడ నుంచి ‘మహావతార్ నరసింహ’ రూ.326.82 కోట్లు, మలయాళం నుంచి ‘లోక చాప్టర్ 1: చంద్ర’ రూ.303.86 కోట్లు రాబట్టి ఈ క్లబ్‌లో చోటు దక్కించుకున్నాయి.

టాలీవుడ్‌కి షాకింగ్ ట్విస్ట్..

పాన్ ఇండియా స్థాయిలో దూసుకుపోతున్న తెలుగు సినీ పరిశ్రమ నుంచి ఈ జాబితాలో ఒక్క సినిమా కూడా లేకపోవడం చర్చనీయాంశంగా మారింది. ‘బాహుబలి’, ‘ఆర్ఆర్ఆర్’ వంటి చిత్రాలతో పాన్ ఇండియా ట్రెండ్‌ను మొదలుపెట్టి, వేల కోట్లు వసూలు చేసిన టాలీవుడ్… 2025లో రూ.300 కోట్ల మార్క్‌ను అందుకోకపోవడం ఆశ్చర్యాన్ని కలిగిస్తోంది. ఈ గణాంకాలు.. పాన్ ఇండియా విజయం కేవలం తెలుగు సినిమాకు మాత్రమే పరిమితం కాదని, ఇతర భాషల సినిమాల కంటెంట్ కూడా దేశవ్యాప్తంగా, అంతర్జాతీయంగా ఆదరణ పొందుతోందని నిరూపించాయి. 2026లో అయినా టాలీవుడ్ సినిమాలు రికార్డులను సృష్టించి, ఈ క్లబ్‌లో అగ్రస్థానంలో ఉంటుందని సినీ అభిమానులు ఆశాభావం వ్యక్తం చేస్తున్నారు.