‘ఆర్ఆర్ఆర్‌’లో ఆ తమిళ స్టార్ హీరో..? అదే నిజమైతేనా..!

టాలీవుడ్ యంగ్ హీరోలు ఎన్టీఆర్, రామ్ చరణ్‌లతో దర్శకధీరుడు రాజమౌళి తెరకెక్కిస్తోన్న భారీ బడ్జెట్ చిత్రం ఆర్ఆర్ఆర్(రౌద్రం రణం రుధిరం). బాహుబలి బ్లాక్‌బస్టర్ హిట్ తరువాత జక్కన్న తెరకెక్కిస్తోన్న ఈ మూవీని డీవీవీ దానయ్య నిర్మిస్తున్నారు. పలు భారతీయ భాషల్లో వచ్చే ఏడాది జనవరి 8న ఈ మూవీని ప్రేక్షకుల ముందుకు తీసుకురావాలనుకుంటున్నారు. ఇక క్రేజీ ప్రాజెక్ట్‌గా తెరకెక్కిన ఈ మూవీపై అన్ని ఇండస్ట్రీల్లోనూ భారీ అంచనాలు ఉన్నాయి. ఈ నేపథ్యంలో ఆ అంచనాలను మరింత పెంచడానికి పలు భాషలకు చెందిన నటీనటులను ఈ క్రేజీ ప్రాజెక్ట్‌లో భాగం చేశారు రాజమౌళి. తాజా సమాచారం ప్రకారం ఈ ప్రాజెక్ట్‌లో తమిళ స్టార్ హీరో భాగం కాబోతున్నారట.

కోలీవుడ్‌లో స్టార్ హీరోగా కొనసాగుతోన్న విజయ్‌ను ఈ సినిమాలో అతిథి పాత్ర చేయించాలని రాజమౌళి అనుకుంటున్నారట. దీనిపై ఆయనను సంప్రదించాలని జక్కన్న భావిస్తున్నారట. రాజమౌళి సినిమా అంటే అందులో అతిథి పాత్రనైనా చేయాలనుకుంటారు ఎవరైనా. ఇక ఈ విషయంలో విజయ్‌ సానుకూలంగా స్పందిస్తే.. ఆర్ఆర్ఆర్‌కు మరింత కలర్ యాడ్ అయ్యే అవకాశాలు ఉన్నాయి. కాగా ఫిక్షన్ కథాంశంతో తెరకెక్కుతోన్న ఈ మూవీలో చెర్రీ అల్లూరి సీతారామరాజు.. ఎన్టీఆర్ కొమరం భీమ్‌ పాత్రలో కనిపించనున్నారు. అలియా భట్, ఒలివియా హీరోయిన్లుగా నటిస్తున్నారు. అజయ్ దేవగన్, సముద్రఖని, రాహుల్ రామకృష్ణ తదితరులు కీలక పాత్రలలో కనిపించనున్నారు. భారీ బడ్జెట్‌తో తెరకెక్కుతోన్న ఈ మూవీకి కీరవాణి సంగీతం అందిస్తున్నారు.

Read This Story Also: కేటీఆర్ విన్నపం.. ‘ఎస్‌ బ్రదర్’ అన్న పవన్..!