‘రాక్షసుడు’ కు పట్టిన పైరసీ భూతం!

రొటీన్ సినిమాలకు భిన్నంగా టాలీవుడ్ హీరో బెల్లంకొండ శ్రీనివాస్ తన కెరీర్‌లో నటించిన మొదటి చిత్రం ‘రాక్షసుడు’. ‘రాచ్చసన్’ అనే తమిళ సైకో థ్రిల్లర్ సినిమాకు రీమేక్‌గా తెరకెక్కిన ఈ సినిమా ఆగస్ట్ 2న విడుదలై పాజిటివ్ టాక్ తెచ్చుకుంది. దీంతో చిత్ర యూనిట్ సంబరాల్లో ఉంది. అయితే.. తమిళ్‌రాకర్స్ వెబ్‌సైట్‌లో సినిమా విడుదలైన రోజే పైరసీ ‘రాక్షసుడు’ కనిపించడంతో చిత్ర యూనిట్ షాకయింది. పైరసీ వెబ్‌సైట్స్‌ను కట్టడి చేయడంలో టాలీవుడ్ సఫలం అయినప్పటికీ తమిళ్‌రాకర్స్ మాత్రం డొమైన్ ఎక్స్‌టెన్షన్‌ను మార్చుకుంటూ నిర్మాతలకు కంటి మీద కునుకు లేకుండా చేస్తుంది.

దీంతో తమిళ్‌రాకర్స్‌ ప్రభావం కలెక్షన్లపై పడే అవకాశం లేకపోలేదు. కోర్టు ఆదేశాలతో పలు పైరసీ వెబ్‌సైట్‌లను బ్లాక్ చేసినప్పటికీ తమిళ్‌రాకర్స్ మాత్రం ఊసరవెల్లి రంగులు మార్చినట్టుగా డొమైన్ నేమ్స్ మార్చుకుంటూ కొత్త సినిమాలను లీక్ చేయడమే పనిగా పెట్టుకుంది.