Aamir Khan: మళ్లీ ప్రేమలో పడ్డ ఆమీర్‌ ఖాన్‌! గౌరీ స్ప్రాట్‌తో ఏడాది నుంచి డేటింగ్‌ చేస్తున్నట్లు..

బాలీవుడ్‌ ప్రముఖ నటుడు ఆమీర్ ఖాన్ మళ్లీ ప్రేమలో పడినట్లు తెలుస్తోంది. తన స్నేహితురాలు గౌరీ స్ప్రాట్‌తో డేటింగ్ చేస్తున్నట్లు ఆయనే స్వయంగా వెల్లడించారు. ముంబైలో జరిగిన తన 60వ పుట్టినరోజు వేడుకల సందర్భంగా ఆయన మీడియాతో ఈ సమాచారాన్ని పంచుకున్నారు. గౌరీతో ఏడాది కాలంగా డేటింగ్‌ చేస్తున్నానని, ఆమె తనకు 25 ఏళ్లుగా తెలుసని ఆమీర్‌ తెలిపారు. స్ప్రాట్‌కు ఆరేళ్ల కొడుకు ఉన్నాడు. శుక్రవారం ఆమీర్‌కు 60 ఏళ్లు నిండిన క్రమంలో గౌరీ కుటుంబ సభ్యులను కూడా కలిశానని, వారు తమ సంబంధం పట్ల సంతోషంగా ఉన్నారని చెప్పారు. ఈ సంబంధంలో తాను నిబద్ధతతో, సంతోషంగా ఉన్నానని ఖాన్ అన్నారు.

గౌరీ స్ప్రాట్ ‘లగాన్’, ‘దంగల్’ వంటి తన సినిమాలలో కొన్ని మాత్రమే చూశారని కూడా ఆయన పేర్కొన్నారు. బుధవారం, సల్మాన్ ఖాన్, షారుఖ్ ఖాన్‌లను ఆమీర్‌ ఖాన్ తన పుట్టినరోజు విందుకు ఆహ్వానించారు. ఈ పార్టీలోనే గౌరీ స్ప్రాట్‌ను వారిద్దరికి పరిచయం చేసినట్లు ఆమీర్‌ వెల్లడించాడు. గౌరీ స్ప్రాట్‌ సగం తమిళియన్, సగం ఐరిష్ అని తెలిపారు. ఆమె తాత ఒక స్వాతంత్ర్య సమరయోధుడని కూడా ఆమీర్‌ పేర్కొన్నారు. కాగా ఆమీర్‌ ఖాన్, తన మాజీ భార్య కిరణ్ రావుతో జూలై 2021లో విడాకులు తీసుకున్న విషయం తెలిసిందే. ఈ దంపతులకు ఆజాద్ రావు ఖాన్ అనే కుమారుడు ఉన్నాడు. అంతకముందు ఆమీర్‌ రీనా దత్తాను వివాహం చేసుకున్నారు. వారికి ఇద్దరు పిల్లలు – కుమార్తె ఇరా ఖాన్, కుమారుడు జునైద్ ఖాన్ ఉన్నారు.

మరిన్ని ఎంటర్టైన్మెంట్ వార్తల కోసం ఇక్కడ క్లిక్ చేయండి