ఢిల్లీ-లూథియానా విమానంలో ఒకరికి కరోనా పాజిటివ్

విమాన ప్రయాణికులకు సమగ్ర కరోనా స్క్రీనింగ్ పరీక్షలు జరుగుతాయని, తమకు కరోనా లేదనే ధ్రువీకరణ పత్రాన్ని వారు  నింపి ఇవ్వాలని, పైగా ఆరోగ్య సేతు యాప్ లో సదరు ప్రయాణికులకు  అసలు ఆ పాజిటివ్ లక్షణాలు లేవని తేలితేనే విమానం ఎక్కేందుకు అనుమతిస్తామని పౌర విమానయాన శాఖ, ఎయిర్ లైన్స్ వర్గాలు తమ మార్గదర్శక సూత్రాల్లో పదేపదే పేర్కొన్నాయి. . కానీ అవి బూటకంగా కనిపిస్తున్నాయనే విమర్శలు వినవస్తున్నాయి. ఇందుకు ఉదాహరణగా నిన్న ఢిల్లీ-లూథియానా ఎయిరిండియా విమానంలో ప్రయాణిస్తున్న ఓ వ్యక్తికి కరోనా పాజిటివ్ లక్షణాలున్నట్టు తేలింది. దీంతో  పంజాబ్ ప్రభుత్వ నిబంధనల ప్రకారం..36 మంది ప్రయాణికులను, నలుగురు విమాన సిబ్బందిని క్వారంటైన్ కి తరలించారు. అలయెన్స్ ఎయిర్ సంస్థలో సెక్యూరిటీ విభాగంలో పని చేసే ఈ వ్యక్తి.. పెయిడ్ టికెట్ పై ప్రయాణిస్తున్నాడట. అలాగే ఈ నెల 25 న చెన్నై నుంచి కోయంబత్తూరుకు ప్రయాణిస్తున్న ఇండిగో విమానంలో కూడా ఒక వ్యక్తికి కరోనా పాజిటివ్ ఉన్నట్టు తెలియడంతో ఆ ఎయిర్ లైన్స్ సంస్థ మొత్తం సిబ్బందినంతటినీ 14 రోజుల క్వారంటైన్ కి షిఫ్ట్ చేసింది. ఆ ప్యాసింజర్ తనకు తాను కోయంబత్తూరులోని ఈ ఎస్ ఐ ఆసుపత్రిలో ప్రత్యేక క్వారంటైన్ వార్డులో చేరాడట. ఇలా విమాన ప్రయాణికుల్లోనూ కరోనా సోకిన వ్యక్తులు బయటపడడంతో ఎయిర్ లైన్స్ వర్గాలు ఆందోళన వ్యక్తం చేస్తున్నాయి.