కరోనా గుడ్‌న్యూస్: మార్కెట్లోకి రష్యా కరోనా వ్యాక్సిన్..త్వరలోనే..

ప్రపంచవ్యాప్తంగా కరోనావైరస్ విలయతాండవం చేస్తోంది. కరోనా మహమ్మారి ధాటికి ఇప్పటికే లక్షలాది మంది ప్రాణాలు కోల్పోయారు. కోట్లాలో జనాలు వైరస్ బారిన పడి చికిత్స పొందుతున్నారు. ప్రస్తుతం ప్రపంచంలోని దేశాలన్నీ.. కరోనా నివారణకు రష్యా తయారు చేసిన ‘స్పుత్నిక్ వి’ వ్యాక్సిన్ కోసం ఎదురుచూస్తున్నాయి. ఈ క్రమంలో స్పుత్నిక్ వి వ్యాక్సిన్‌ను మార్కెట్లోకి విడుదల చేసినట్లు రష్యా శుభవార్త చెప్పింది. త్వరలోనే దేశ వ్యాప్తంగా పంపిణీ చేస్తామని ఈ మేరకు రష్యా ఆరోగ్యమంత్రిత్వ శాఖ వెల్లడించింది. ‘కరోనా వైరస్‌ను నియంత్రించడానికి గమాలియా నేషనల్ రిసెర్చ్‌ సెంటర్‌ అభివృద్ధి చేసిన ఈ వ్యాక్సిన్‌ అన్ని రకాల ప్రయోగ పరీక్షల్లో ఉత్తమ ఫలితాలు సాధించింది. అందువల్ల దీన్ని ప్రజలకు అందుబాటులోకి తెస్తున్నాం’ అని రష్యా ఆరోగ్యశాఖ ఓ ప్రకటనలో పేర్కొన్న‌ది.