తూర్పు గోదావరి జిల్లా గోపాలపురం మండలంలోని కమ్మరికుంట కాలనీలో అక్టోబర్ 29న తీవ్ర విషాదం చోటుచేసుకుంది. ఇనుప తీగపై బట్టలు ఆరేస్తుండగా సంభవించిన విద్యుదాఘాతానికి గురై భార్యాభర్తలు అక్కడికక్కడే మృతి చెందారు. మృతులు చేపల వ్యాపారి పెంటబోయిన బంగారయ్య (57), అతని భార్య అప్పలనరసమ్మ (53)గా గుర్తించారు. ఘటన వివరాల్లోకి వెళితే, అప్పలనరసమ్మ తన ఇంటి ఆవరణలో ఇనుప తీగపై బట్టలు ఆరేస్తుండగా, ఆ బట్టలు ప్రక్కనే ఉన్న విద్యుత్ వైరుకు తగిలాయి. దీంతో ఆమెకు కరెంట్ షాక్ కొట్టి గిలగిల కొట్టుకుంది. భార్య బాధను చూసిన బంగారయ్య ఆమెను కాపాడే ప్రయత్నంలో వెనక నుంచి పట్టుకోగా, అతనికి కూడా విద్యుదాఘాతం తగిలింది. దంపతులిద్దరూ అక్కడికక్కడే ప్రాణాలు కోల్పోయారు. ఇలాంటి ఘటనలు జరగకుండా ప్రజలు తగిన జాగ్రత్తలు తీసుకోవాలని, ముఖ్యంగా విద్యుత్ తీగల సమీపంలో బట్టలు ఆరేయడం, ఇతర పనులు చేయడంలో అప్రమత్తంగా ఉండాలని అధికారులు హెచ్చరిస్తున్నారు.