పల్నాడు జిల్లా పిడుగురాళ్ల మండలంలోని బ్రాహ్మణపల్లి గ్రామానికి చెందిన రైతు కోటేశ్వరరావు సైబర్ నేరగాళ్ల వలలో చిక్కుకొని తన ₹16,82,875 రూపాయలు కోల్పోయాడు. మినప, పత్తి, కందులు పండించి, వాటిని అమ్మి వచ్చిన డబ్బును చైతన్య గ్రామీణ బ్యాంకు, యూనియన్ బ్యాంకు ఖాతాల్లో దాచుకున్నాడు. ఈ క్రమంలో అతని ఫోన్కు ఒక వాట్సాప్ మెసేజ్ వచ్చింది. అది మోసపూరిత లింక్ అని తెలియక కోటేశ్వరరావు క్లిక్ చేశాడు. దీంతో అతని ఫోన్ హ్యాక్ అయింది. సైబర్ నేరగాళ్లు ముందుగా డ్రా అయిన మెసేజ్లు రాకుండా సెట్టింగ్స్ మార్చారు. ఆ తర్వాత ఒకేసారి కాకుండా చిన్న చిన్న మొత్తాల్లో డబ్బును బదిలీ చేశారు. మొత్తం ₹16,82,875 రూపాయలు ఖాళీ చేశారు. తన అవసరాల కోసం డబ్బు డ్రా చేయడానికి వెళ్లినప్పుడు బ్యాంక్ ఖాతాలో బ్యాలెన్స్ నిల్ అని చూసి రైతు అవాక్కయ్యాడు. వెంటనే పోలీసులకు ఫిర్యాదు చేయగా కేసు నమోదు చేసుకున్నారు. సైబర్ నేరగాళ్లకు ధనవంతులు, పేదవారు అనే తేడా ఉండదని, బ్యాంక్ ఖాతాలో డబ్బు ఉంటే చాలని ఈ ఘటన మరోసారి రుజువు చేసింది.