TSPSC Group-4: విద్యార్థులకు అలర్ట్.. నేటి నుంచే గ్రూప్ -4 అప్లికేషన్లు.. పూర్తి వివరాలివే..
నిరుద్యోగులు ఎప్పుడెప్పుడా అని ఎదురు చూస్తున్న గ్రూప్ - 4 ఉద్యోగాల భర్తీలో కీలక సమయం ఆసన్నమైంది. నేటి (శుక్రవారం) నుంచి దరఖాస్తుల ప్రక్రియ ప్రారంభం కానుంది. అభ్యర్థుల నుంచి ఆన్ లైన్....
నిరుద్యోగులు ఎప్పుడెప్పుడా అని ఎదురు చూస్తున్న గ్రూప్ – 4 ఉద్యోగాల భర్తీలో కీలక సమయం ఆసన్నమైంది. నేటి (శుక్రవారం) నుంచి దరఖాస్తుల ప్రక్రియ ప్రారంభం కానుంది. అభ్యర్థుల నుంచి ఆన్ లైన్ విధానంలో అప్లికేషన్లు స్వీకరించనున్నారు. ఈ మేరకు టీఎస్పీఎస్సీ గతంలోనే వివరాలు వెల్లడించింది. మొత్తం 25 ప్రభుత్వ విభాగాల్లో 9,168 పోస్టులకు ప్రకటన జారీ చేసిన విషయం తెలిసిందే. ఈ క్రమంలో జిల్లాల వారీగా పోస్టులతో కూడిన సమగ్ర ప్రకటనతో పాటు ఆన్‌లైన్‌ దరఖాస్తుల ప్రక్రియకు ఏర్పాట్లు పూర్తి చేసింది. శుక్రవారం నుంచి ప్రారంభమయ్యే ఈ ప్రక్రియ 2023 జనవరి 12న ముగియనుంది. ఆబ్జెక్టివ్‌ విధానంలో పరీక్షను ఏప్రిల్‌ లేదా మే నెలలో నిర్వహించనున్నారు.
కాగా.. గ్రూప్-4 ఉద్యోగాల్లో అత్యధికంగా పురపాలకశాఖ పరిధిలో 1,862 వార్డు అధికారుల పోస్టులు ఉన్నాయి. విభాగాల వారీగా అయితే.. 2,701 పోస్టులను భర్తీ చేయనున్నారు. రెవెన్యూశాఖలో 2,077 , సీసీఎల్‌ఏ పరిధిలో 1,294, సాధారణ, సంక్షేమ గురుకులాల్లో 991 పోస్టులు ఉన్నాయి. జూనియర్‌ అసిస్టెంట్‌ పోస్టులు 6,859, జూనియర్‌ అకౌంటెంట్‌ 429, జూనియర్‌ ఆడిటర్‌ 18, వార్డు అధికారుల పోస్టులు 1,862 భర్తీ చేయనున్నారు.
గ్రూప్-4 ఉద్యోగాలకు దరఖాస్తుల ప్రక్రియ ప్రారంభం కావడం, జనవరి 12 వరకు దరఖాస్తుల ప్రక్రియ ఉండటంతో భారీ సంఖ్యలో అప్లికేషన్లు వస్తాయని కమిషన్‌ అంచనా వేస్తోంది. దాదాపు 6-7 లక్షల వరకు అభ్యర్థులు అప్లై చేసుకునే అవకాశం ఉన్నట్లు తెలుస్తోంది. 2018లో రాష్ట్రవ్యాప్తంగా 700 వీఆర్‌ఓ ఉద్యోగాలకు దాదాపు 10 లక్షల మందికిపైగా దరఖాస్తు చేశారు. గ్రూప్-4 కేటగిరీలో 2 వేల లోపు పోస్టులతో ప్రకటన వెలువడినప్పుడు 4.8 లక్షల మంది దరఖాస్తు చేశారు. ప్రస్తుతం ఏకంగా 9,168 పోస్టులు ఉండటంతో భారీ సంఖ్యలో అభ్యర్థులు దరఖాస్తు చేసుకునే అవకాశాలు కనిపిస్తున్నాయి.
మరిన్ని తాజా విద్యా, ఉద్యోగ సమాచారం కోసం క్లిక్‌ చేయండి.
