TCS CEO Salary: వామ్మో.. టీసీఎస్ CEO జీతం ఎంతో తెలుసా? ఆయన కంటే COO జీతం ఎక్కువ..!

ఐటీ కంపెనీల్లో పనిచేసే సాధారణ ఉద్యోగుల జీతాలే కాదు.. ఆ కంపెనీల మేనేజ్‌మెంట్లలో కీలక బాధ్యతలు నిర్వహించే వారు కూడా భారీ జీతాలు అందుకుంటున్నారు. దేశంలోని దిగ్గజ ఐటీ సర్వీసెస్ కంపెనీ టాటా కన్సల్టెన్సీ (TCS) సీఈవో, మేనేజింగ్ డైరెక్టర్ కే కృతివాసన్ గత ఆర్థిక సంవత్సరంలో భారీగా జీతభత్యాలు అందుకున్నారు. 2023-24 ఆర్థిక సంవత్సరంలో ఆయన రూ.25.4 కోట్ల జీతాన్ని పొందారు. అంటే నెలసరి జీతం రూ.2 కోట్ల పైమాటే. 2023 జూన్ 1 తేదీన కృతివాసన్ టీసీఎస్ సీఈవో, ఎండీగా బాధ్యతలు చేపట్టారు.అంతకు ముందు 2023 ఏప్రిల్ 1 నుంచి 2023 మే 31 వరకు ఆ కంపెనీకి బ్యాంకింగ్, ఫినాన్సియల్ సర్వీసెస్, ఇన్స్యూరెన్స్ (బీఎఫ్ఎస్ఐ) గ్లోబల్ హెడ్‌గా ఉన్నారు. ఈ సేవలను కలుపుకుని.. జూన్ 1, 2023 నుంచి మార్చి 31, 2024 వరకు సీఈవో, ఎండీగా పనిచేసినందుకు కృతివాసన్ రూ.25.4 కోట్ల జీతాన్ని పొందారు. వాస్తవానికి ఆ కంపెనీ మాజీ సీఈవో రాజేశ్ గోపినాథ్ జీతంతో పోల్చితే కృతివాసన్ జీతం తక్కువే. 2022-23 ఆర్థిక సంవత్సరానికి టీసీఎస్ సీఈవోగా ఉన్న రాజేశ్ గోపినాథ్ 29.16 కోట్ల జీతాన్ని పొందారు.

కాగా టీసీఎస్ చీఫ్ ఆపరేటింగ్ ఆఫీసర్, ఎగ్జిక్యూటివ్ డైరెక్టర్‌గా ఉన్న ఎన్ గణపతి సుబ్రహ్మణ్యం 2023-24 ఆర్థిక సంవత్సరానికి 26.18 కోట్ల జీతాన్ని పొందారు. మునుపటి ఆర్థిక సంవత్సరంతో పోల్చితే 2023-24లో ఆయన జీతం 8.2 శాతం పెరిగింది. ఈ నెలతో ఆయన పదవీ విరమణ చేయనున్నారు.

ఉద్యోగుల జీతాల పెంపు ఇలా..

టీసీఎస్ వార్షిక రిపోర్ట్‌లోని వివరాల మేరకు 2023-24 ఆర్థిక సంవత్సరంలో టీసీఎస్‌లో పనిచేసే మధ్యస్థ ఉద్యోగుల జీతాలు 10.8 శాతం పెరిగాయి. ప్రస్తుతం టీసీఎస్ కంపెనీ రోల్స్‌లో 6,01,546 మంది శాశ్వత ఉద్యోగులు ఉన్నారు. భారతదేశంలోని TCS ఉద్యోగులకు సగటు వార్షిక జీతం పెరుగుదల 5.5 శాతం నుండి 8 శాతం వరకు ఉండగా.. మంచి పనితీరును కనబర్చిన ఉద్యోగులు 10 శాతానికి పైగా జీతం పెంపును అందుకున్నారు.

భారతదేశం వెలుపల పనిచేస్తున్న ఉద్యోగులకు 1.5 శాతం నుండి 6 శాతం వరకు జీతాలు పెరిగాయని టీసీఎస్ కంపెనీ తెలిపింది. ఆయా దేశాల్లో మార్కెట్ ట్రెండ్స్‌కు అనుగుణంగా అక్కడ పనిచేసే తమ ఉద్యోగుల రెమ్యునరేషన్‌లో పెరుగుదల ఉంటుందని ఆ కంపెనీ వెల్లడించింది.