బంగారం కాదు మార్కెట్లో వెండి మెరుపులు.. 150శాతం లాభాలతో సరికొత్త రికార్డులు..

పసిడి ధరలు చుక్కలనంటుతుండటంతో భారతీయల ప్రాధాన్యతలు శరవేగంగా మారుతున్నాయి. 10 గ్రాముల బంగారం ధర రూ.1.50 లక్షల మార్కును దాటి సామాన్యుడి బడ్జెట్‌కు అందనంత ఎత్తుకు చేరడంతో అందరి దృష్టీ ఇప్పుడు తెల్ల బంగారంగా పిలిచే వెండి వైపు మళ్లింది. గత రెండేళ్ల కాలంలోనే వెండి ధరలు ఏకంగా 150 శాతానికి పైగా పెరిగి ఆశ్చర్యపరిచాయి. గతంలో కిలో ధర రికార్డు స్థాయిలో రూ.4 లక్షల వరకు వెళ్లి, ప్రస్తుతం రూ.2.25 లక్షల నుంచి రూ.2.30 లక్షల శ్రేణిలో స్థిరపడుతోంది. సాధారణంగా దీపావళి, ధన్‌తేరాస్ సమయాల్లో బంగారానికి పోటెత్తే డిమాండ్ ఈసారి వెండి వైపు మళ్లుతోందని వ్యాపార వర్గాలు చెబుతున్నాయి. ఇండియా బులియన్ అండ్ జ్యువెలర్స్ అసోసియేషన్ జాతీయ కార్యదర్శి సురేంద్ర మెహతా ప్రకారం.. బంగారం ధరలు అందుబాటులో లేకపోవడమే వెండి డిమాండ్ అనూహ్యంగా పెరగడానికి ప్రధాన కారణం. గత ఏడాదితో పోలిస్తే ఈ పండుగ సీజన్‌లో వెండి కొనుగోళ్లు 17 నుంచి 18 శాతం మేర వృద్ధి చెందే అవకాశముంది. కేవలం పూజా సామగ్రి, పాత్రలకే పరిమితం కాకుండా నాణేలు, బిస్కెట్లు, వెండి ఈటీఎఫ్‌లు, అలాగే సోలార్ ప్యానెళ్లు, ఎలక్ట్రానిక్స్ వంటి పారిశ్రామిక వినియోగం వైపు నుంచి వెండికి స్థిరమైన గిరాకీ లభిస్తుంది.

ఆభరణాల రంగంలో వస్తున్న పెను మార్పు

వెండిని కేవలం పూజా సామాను లేదా చవకైన లోహంగా చూసే దృక్పథం వేగంగా మారుతోంది. ప్రముఖ నగల సంస్థల అధినేతల పరిశీలన ప్రకారం..

సువంకర్ సేన్, సెన్కో గోల్డ్ – డైమండ్స్ సీఈవో : బడ్జెట్ పరిమితుల దృష్ట్యా వినియోగదారులకు డిజైన్లతో ప్రయోగాలు చేసేందుకు వెండి ఒక రక్షక లోహంగా మారింది. తమ విక్రయశాలల్లో వెండి డిమాండ్ 25-30 శాతం పెరిగిందని, కొత్త డిజైన్లు తీసుకొస్తే ఇది తదుపరి బిగ్ ట్రెండ్‌గా నిలుస్తుందని సేన్ స్పష్టం చేశారు.

జోయ్ అలుక్కాస్, జోయాలుక్కాస్ చైర్మన్ : యువతరం ఇప్పుడు ప్రతిరోజూ ధరించగలిగే తేలికపాటి, ఆధునిక ఆభరణాలను ఇష్టపడుతున్నారు. బంగారం ధరలతో పోలిస్తే వెండి ఈ అవసరాన్ని సులభంగా తీరుస్తోంది. డిజైన్, నాణ్యతతో కూడిన వెండి నగలు సరికొత్త అధ్యాయాన్ని లిఖిస్తున్నాయని ఆయన వెల్లడించారు.

బంగారం-వెండి నిష్పత్తి ప్రభావం

వెండి దూకుడు వెనుక మార్కెట్ లెక్కలు కూడా ఉన్నాయి. లండన్ స్టాక్ ఎక్స్ఛేంజ్ గ్రూప్ విశ్లేషకుడు దేబాజిత్ సాహా తెలిపిన వివరాల ప్రకారం.. గోల్డ్-సిల్వర్ రేషియో 100 స్థాయికి చేరినప్పుడు బంగారంతో పోలిస్తే వెండి బాగా చౌకగా ఉందని భావించి భారీగా కొనుగోళ్లు జరిగాయి. అంతర్జాతీయ మార్కెట్లో ఔన్సుకు 121 డాలర్ల స్థాయి వరకు పెరిగిన వెండి, ఆ తర్వాత ఊహాజనిత కొనుగోళ్లు చల్లారడంతో తిరిగి స్థిరపడింది.

దిగుమతుల్లో భారతదేశం సరికొత్త రికార్డు

ధరల హెచ్చుతగ్గులు ఉన్నప్పటికీ, వెండి వినియోగంలో భారతదేశం ప్రపంచంలోనే అగ్రగామిగా నిలిచింది. కోటక్ మ్యూచువల్ ఫండ్ గణాంకాల ప్రకారం, శుద్ధి చేసిన వెండిని ప్రపంచంలోనే అత్యధికంగా దిగుమతి చేసుకునే దేశంగా భారత్ అవతరించింది. 2025లో భారత వెండి దిగుమతుల విలువ దాదాపు 9.2 బిలియన్ డాలర్లకు చేరింది. ఇది 2024తో పోలిస్తే 44 శాతం పెరుగుదల. అంతర్జాతీయంగా సోలార్, గ్రీన్ ఎనర్జీ, ఎలక్ట్రానిక్స్ విభాగాల నుంచి పారిశ్రామిక డిమాండ్ రికార్డు స్థాయిలో 680.5 మిలియన్ ఔన్సులకు చేరడంతో పాటు సరఫరా కొరత ఉండటం వెండికి దీర్ఘకాలికంగా కలిసివచ్చే అంశం.

బంగారం ధరలు సామాన్యుడిని బెంబేలెత్తిస్తున్న వేళ అటు పెట్టుబడిదారులకు నికర ఆదాయాన్ని, ఇటు ఆభరణాల ప్రియులకు సరికొత్త ఫ్యాషన్‌ను అందిస్తూ వెండి మార్కెట్‌లో నిజమైన వైట్ గోల్డ్‌గా వెలుగొందుతుంది.