క్రెడిట్ స్కోర్‌లో భారీ మార్పు! ఇక ప్రతి వారం అప్‌డేట్స్‌కు RBI రెడీ

భారతీయ రుణ వ్యవస్థలో కీలకమైన మార్పుకు శ్రీకారం చుట్టబడింది. ఇప్పటివరకు నెలవారీ లేదా పక్షవారీగా జరిగే క్రెడిట్ రిపోర్ట్ అప్‌డేట్స్‌ను మరింత వేగవంతం చేస్తూ RBI వారానికి ఒకసారి డేటా నవీకరణ విధానాన్ని అమలు చేసే దిశగా అడుగులు వేస్తోంది. 2026 మధ్య నాటికి ఈ మార్పులు పూర్తిగా అమల్లోకి వచ్చే అవకాశముంది. ఈ కొత్త విధానం ప్రకారం బ్యాంకులు, ఇతర రుణదాతలు ప్రతి నెలలో నాలుగు సార్లు 9వ, 16వ, 23వ తేదీలతో పాటు నెలాఖరులో క్రెడిట్ ఇన్ఫర్మేషన్ కంపెనీలకు (CICs) వినియోగదారుల డేటాను సమర్పించాల్సి ఉంటుంది. దీని ద్వారా వినియోగదారుల క్రెడిట్ ప్రొఫైల్ దాదాపు రియల్‌ టైమ్‌కి దగ్గరగా అప్టేడ్‌ అవుతుంది.

ఈ మార్పుల ప్రధాన లక్ష్యం డేటా తాజాదనం, కచ్చితత్వాన్ని పెంచడం. రుణదాతలు పాత డేటా ఆధారంగా నిర్ణయాలు తీసుకోకుండా, తాజా ఆర్థిక సమాచారంతో రిస్క్ అంచనా వేయగలగడం ఈ విధానం ద్వారా సాధ్యమవుతుంది. ఒక వ్యక్తి రుణాన్ని ముందుగానే చెల్లించినా లేదా క్రెడిట్ కార్డ్ బకాయిలను తీర్చినా, ఆ సమాచారం వేగంగా క్రెడిట్ రిపోర్ట్‌లో ప్రతిబింబిస్తుంది. దీంతో మంచి ఆర్థిక ప్రవర్తనకు త్వరిత ప్రయోజనాలు లభిస్తాయి.

అయితే ఈ వ్యవస్థకు మరో వైపు కూడా ఉంది. చెల్లింపుల్లో ఆలస్యం, బౌన్స్ అయిన చెక్కులు లేదా క్రెడిట్ వినియోగం పెరగడం వంటి అంశాలు కూడా వెంటనే రికార్డవుతాయి. గతంలో నెలవారీ అప్‌డేట్ల వల్ల ఉండే కొంత సడలింపు ఇకపై ఉండదు. దీంతో రుణగ్రహీతలు నిరంతరం ఆర్థిక క్రమశిక్షణ పాటించాల్సిన అవసరం ఏర్పడుతుంది. ఈ మార్పులతో క్రెడిట్ రిపోర్ట్ ఒక స్థిర పత్రం కాకుండా, ప్రత్యక్ష ఆర్థిక డైరీలా మారనుంది. నిపుణుల అభిప్రాయం ప్రకారం, ఇది పారదర్శకతను పెంచడంతో పాటు మోసాలను తగ్గించడంలో సహాయపడుతుంది. అయితే వినియోగదారులు తమ ఆర్థిక కార్యకలాపాలపై మరింత జాగ్రత్తగా ఉండాల్సిన అవసరం స్పష్టంగా కనిపిస్తోంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి