FASTag: బ్యాంకును మార్చుకుంటే మీ FASTagను కూడా మార్చుకోవాలా? పాత వాలెట్‌లో ఉన్న డబ్బు ఏమవుతుంది?

FASTag: ఇప్పుడు ఫాస్టాగ్ వినియోగదారులకు ఒక శుభవార్త. మీరు మీ ఫాస్టాగ్ బ్యాంక్‌ను మార్చాలనుకుంటే, ఇకపై కొత్త ట్యాగ్ తీసుకోవడం గానీ, మీ పాతదాన్ని డీయాక్టివేట్ చేసి కొత్తది తీసుకోవడం అవసరం ఉండదు. రోడ్డు రవాణా, రహదారుల శాఖ మంత్రి నితిన్ గడ్కరీ ‘వన్ ట్యాగ్’ అనే కొత్త ఫీచర్‌ను ప్రారంభించారు. దీని ద్వారా మీరు మీ వాహనం ఫాస్టాగ్‌ను మార్చుకుంటూనే, అదే ఫాస్టాగ్‌ను కొనసాగించవచ్చు. అయితే, బ్యాంక్ మార్చిన తర్వాత మీ పాత ఫాస్టాగ్ వాలెట్‌లోని డబ్బుకు ఏమవుతుంది? మీరు మళ్లీ కేవైసీ (KYC) ప్రక్రియ చేయించుకోవాలా? దీని గురించి పూర్తి వివరాలు తెలుసుకుందాం..

OneTagను ఎలా ఉపయోగించాలి?

NHAI వారి రాజమార్గయాత్ర మొబైల్ యాప్ ద్వారా వన్‌ట్యాగ్ అందుబాటులో ఉంది. మీ ఫాస్టాగ్ బ్యాంకును మార్చుకునే ప్రక్రియను ఈ యాప్ ద్వారా పూర్తి చేయవచ్చు. ముందుగా మీరు యాప్‌లోకి లాగిన్ అయి, మీ వాహనం రిజిస్ట్రేషన్ నంబర్‌ను నమోదు చేయాలి. ఆ తర్వాత మీ వాహనం వన్‌ట్యాగ్‌కు అర్హమైనదో కాదో యాప్ సూచిస్తుంది. మీరు మీ బ్యాంకును మార్చుకోగలిగితే, ప్రక్రియ ప్రారంభమవుతుంది. ఇందులో మీ గుర్తింపును ధృవీకరించడం, మీ ఆమోదం తెలపడం, కొత్త బ్యాంకును ఎంచుకోవడం వంటి దశలు ఉంటాయి.

కొత్త బ్యాంకులో మళ్లీ కేవైసీ చేయించుకోవాలా?

మీరు బ్యాంకు మారినప్పుడు కొత్త KYC ప్రక్రియను పూర్తి చేయాల్సి ఉంటుంది. KYC అంటే బ్యాంకు మీ గుర్తింపును, ఇతర సంబంధిత సమాచారాన్ని ధృవీకరిస్తుంది. ఈ ప్రక్రియలో భాగంగా మొదటగా మీ ప్రస్తుత బ్యాంకు నుండి ఆరు అంకెల మొబైల్ వెరిఫికేషన్ కోడ్ (MVC) తీసుకోవలసి ఉంటుంది. ఇది మీ గుర్తింపును ధృవీకరిస్తుంది.

ఆ తర్వాత మీరు ఒక కొత్త బ్యాంకును ఎంచుకోవాల్సి ఉంటుంది. ఆ కొత్త బ్యాంకు మీ కేవైసీ, వాలెట్ యాక్టివేషన్ ప్రక్రియను పూర్తి చేస్తుంది. ఇది పూర్తయిన తర్వాత, మీ ఫాస్టాగ్ కొత్త బ్యాంకుతో అనుకూలంగా మారుతుంది.

పాత ఫాస్టాగ్ వాలెట్‌లో ఉంచిన డబ్బుకు ఏమవుతుంది?

బ్యాంకు మార్చిన తర్వాత మీ పాత ఫాస్టాగ్ వాలెట్ క్లోజ్‌ అవుతుంది. అవసరమైన అకౌంటింగ్, కోతల తర్వాత మీ పాత బ్యాంకులో మిగిలి ఉన్న నిధులు మీకు తిరిగి వస్తాయి. అంటే, బ్యాంకు మార్చినప్పుడు మీ పాత వాలెట్‌లోని నిధుల కోసం కూడా ఇదే ప్రక్రియ ఏర్పాటు చేశారు. అయితే, నిధులను తిరిగి ఇచ్చే ముందు పాత బ్యాంకు అవసరమైన ధృవీకరణ, అకౌంటింగ్‌ను పూర్తి చేస్తుంది.

కొత్త ఫాస్టాగ్‌ తీసుకోవాలా?

వన్‌ట్యాగ్ ప్రత్యేక లక్షణం ఏమిటంటే మీరు బ్యాంకులను మార్చినా కూడా మీ వాహనానికి అనుబంధంగా ఉన్న ఫాస్టాగ్ ఐడి అలాగే ఉంటుంది. అందువల్ల విండ్‌స్క్రీన్‌పై ఇప్పటికే ఇన్‌స్టాల్ చేసిన ట్యాగ్‌ను యధావిధిగా ఉపయోగించవచ్చు. గమనించదగ్గ విషయం ఏమిటంటే, మీరు బ్యాంకులను మార్చిన తర్వాత, మీ ఫాస్టాగ్‌ను మరొక బ్యాంకుకు బదిలీ చేయడానికి ముందు ఆరు నెలల పాటు వేచి ఉండాలి. దీనిని కూలింగ్ పీరియడ్ అని అంటారు.

ఇది కూడా చదవండి: Compound Walls: ప్రహరీ గోడ కడుతున్నారా? ఈ చిన్న పొరపాటు చేస్తే గోడ బీటలు వారడం ఖాయం!

వన్‌ట్యాగ్ అంటే ఏమిటి?

OneTag అనేది NETC FASTag వినియోగదారులు కొత్త FASTag కొనుగోలు చేయాల్సిన అవసరం లేకుండా, అవసరమైనప్పుడు బ్యాంకులను మార్చుకోవడానికి అనుమతించే ఒక ఫీచర్. బ్యాంకు మార్పు ప్రక్రియను సులభతరం చేయడం, వినియోగదారులకు మరిన్ని ఎంపికలను అందించడం దీని ముఖ్య ఉద్దేశ్యం.

ఫాస్టాగ్ అంటే ఏమిటి? అది ఎలా పనిచేస్తుంది?

ఫాస్టాగ్ అనేది వాహనం విండ్‌స్క్రీన్‌కు అతికించే ఒక చిన్న ట్యాగ్. టోల్ ప్లాజాల వద్ద వాహనాన్ని గుర్తించడంలో సహాయపడే RFID టెక్నాలజీ ఇందులో ఉంటుంది. మీ వాహనం టోల్ ప్లాజా గుండా వెళ్ళినప్పుడు, అనుసంధానించిన ఖాతా నుండి టోల్ రుసుము ఆటోమేటిక్‌గా కట్‌ అవుతుంది. దీనివల్ల తరచుగా నగదు చెల్లింపులు చేయవలసిన అవసరం తగ్గుతుంది.

ఫాస్టాగ్ టోల్ ప్లాజాల వద్ద నిరీక్షణ సమయాన్ని తగ్గించగలదు. ట్రాఫిక్ రద్దీని తగ్గించడంలో సహాయపడుతుంది. అలాగే టోల్ చెల్లింపు రికార్డులను ఆన్‌లైన్‌లో చూసేందుకు కూడా వీలు కల్పిస్తుంది. భారతదేశంలో జనవరి 1, 2021 నుండి, సరుకులు లేదా ప్రయాణీకులను తీసుకువెళ్లే అన్ని ఫోర్‌ వీలర్స్‌ వాహనాలు, అంతకంటే ఎక్కువ స్థాయి వాహనాలకు, అలాగే M, N కేటగిరీ వాహనాలకు ఫాస్టాగ్ తప్పనిసరి.

ఇది కూడా చదవండి: Washing Machine Tips: వాషింగ్ మెషిన్‌లో కంఫర్ట్‌ ఎప్పుడు వేయాలో తెలుసా? చాలా మంది చేసే పొరపాటు ఇదే!

Heat Solutions Heat: రేకుల షెడ్డులో వేడితో తట్టుకోలేకపోతున్నారా? ఇలా చేస్తే ఏసీలాంటి కూలింగ్‌..!

మరిన్ని బిజినెస్ వార్తల కోసం ఇక్కడ క్లిక్ చేయండి