హెచ్1బీ వీసాదారులకు బంపర్ గుడ్న్యూస్.. ట్రంప్ లక్ష డాలర్ల ఫీజుపై కోర్టు కొరడా!
అమెరికాలో ఉద్యోగం చేయాలని ఆశపడే విదేశీ వృత్తి నిపుణులకు, ముఖ్యంగా భారతీయ ఐటీ ఉద్యోగులకు అమెరికా న్యాయస్థానం నుండి పెద్ద ఊరట లభించింది. హెచ్1బీ (H-1B) వీసాల దరఖాస్తుదారులపై డొనాల్డ్ ట్రంప్ ప్రభుత్వం విధించిన లక్ష డాలర్ల (సుమారు రూ. 84 లక్షలు) భారీ ఫీజు నిబంధనను బోస్టన్లోని ఫెడరల్ కోర్టు కొట్టివేసింది. ట్రంప్ తీసుకున్న ఈ నిర్ణయం పూర్తిగా చట్ట విరుద్ధమని యూఎస్ డిస్ట్రిక్ట్ జడ్జి లియో సొరొకిన్ సోమవారం నాడు కీలక తీర్పును వెలువరించారు. అసలు ఇంతకీ ఈ వివాదం ఏంటి..? వలసదారులపై ఎలాంటి ప్రభావం ఉంటుంది..?
Updated on: Jun 09, 2026 | 9:03 AM
అమెరికాలో ఉద్యోగం చేయాలనే కలలు కనే విదేశీ నిపుణులకు, ముఖ్యంగా భారతీయ టెక్కీలకు అమెరికా న్యాయస్థానం నుండి తిరుగులేని విజయం లభించింది. హెచ్1బీ (H-1B) వీసా దరఖాస్తుదారులపై డొనాల్డ్ ట్రంప్ ప్రభుత్వం విధించిన 1,00,000 డాలర్ల (సుమారు రూ. 84 లక్షలు) భారీ రుసుమును బోస్టన్లోని ఫెడరల్ కోర్టు పూర్తిగా రద్దు చేసింది. ఈ నిబంధన విధించడానికి అధ్యక్షుడికి ఎలాంటి చట్టపరమైన అధికారం లేదని, ఇది పూర్తిగా చట్టవిరుద్ధమైన అనధికారిక పన్ను (Unauthorized Tax) అని కోర్టు తేల్చిచెప్పింది. నివేదిక ప్రకారం.. ఈ వివాదం, కోర్టు తీర్పుకు సంబంధించిన పూర్తి వివరాలు ఇలా ఉన్నాయి:
వివాదం ఏమిటి?:
గత ఏడాది సెప్టెంబరులో డొనాల్డ్ ట్రంప్ ప్రభుత్వం ఒక వివాదాస్పద నిర్ణయాన్ని తీసుకుంది. దీని ప్రకారం, విదేశాల్లో ఉంటూ అమెరికా తాత్కాలిక వలస వీసా అయిన హెచ్1బీకి ఎంపికైన నిపుణులు లక్ష డాలర్ల భారీ ఫీజును చెల్లించాలని నిబంధన విధించింది. అమెరికాలోని స్థానిక నిపుణుల ప్రయోజనాలను రక్షించేందుకే ఈ అదనపు భారాన్ని మోపినట్లు అప్పట్లో ప్రభుత్వం పేర్కొంది. అయితే, ఇంత పెద్ద మొత్తంలో ఫీజు ఖరారు చేయడంపై సర్వత్రా విమర్శలు వ్యక్తమయ్యాయి. ట్రంప్ ప్రభుత్వ నిర్ణయాన్ని సవాలు చేస్తూ అమెరికాలోని 20 రాష్ట్రాల అటార్నీ జనరల్స్ బోస్టన్ ఫెడరల్ కోర్టులో పిటిషన్లు దాఖలు చేశారు.
కోర్టు తీర్పులో ఏముంది?:
ఈ పిటిషన్లపై సమగ్ర విచారణ జరిపిన జడ్జి లియో సొరొకిన్.. ట్రంప్ ప్రభుత్వం విధించిన ఈ భారీ ఫీజు చెల్లదని స్పష్టం చేశారు. ఇది కేవలం ఒక పెనాల్టీ లేదా సాధారణ రుసుము కాదు, ఇది ఒక రకమైన పన్ను (Tax). అమెరికా రాజ్యాంగం ప్రకారం కాంగ్రెస్ (పార్లమెంట్) ఆమోదం లేకుండా అధ్యక్షుడు ఇటువంటి పన్నుల విధింపుపై స్వతహాగా ఎలాంటి నిర్ణయాలు తీసుకోలేరు అని జడ్జి తన తీర్పులో పేర్కొన్నారు. కాంగ్రెస్ అనుమతి లేనందున ఈ ఫీజు చట్ట విరుద్ధమని కోర్టు తేల్చి చెప్పింది.
భారతీయులకు, టెక్ కంపెనీలకు ఊరట:
అమెరికా ప్రతి ఏటా జారీ చేసే హెచ్1బీ వీసాలలో సింహభాగం భారతీయ ఐటీ నిపుణులకే దక్కుతుంటాయి. ట్రంప్ విధించిన ఈ భారీ ఫీజు నిబంధన అమలులోకి వచ్చి ఉంటే, ఎంతోమంది ప్రతిభావంతులైన భారతీయులు అమెరికా వెళ్లే అవకాశాన్ని కోల్పోయేవారు. అంతేకాకుండా వారిని నియమించుకునే కంపెనీలపై కూడా ఆర్థిక భారం పడేది. సిలికాన్ వ్యాలీలోని గూగుల్, మైక్రోసాఫ్ట్ వంటి దిగ్గజ టెక్ కంపెనీలు కూడా విదేశీ ప్రతిభను నియమించుకోవడానికి వెనకాడుతుండేవి. ఇప్పుడు ఫెడరల్ కోర్టు ఈ నిర్ణయాన్ని కొట్టేయడంతో వలస నిపుణులకు, అమెరికన్ కార్పొరేట్ రంగానికి చాలా పెద్ద ఆర్థిక ఊరట లభించింది.
