ముగిసిన లలితా జ్యువెలరీ IPO బిడ్డింగ్! షేర్ అలాట్మెంట్, లిస్టింగ్ ఎప్పుడంటే?
లలితా జ్యువెలరీ మార్ట్ IPOకు ఇన్వెస్టర్ల నుంచి భారీ స్పందన లభించింది. ఆగస్టు 19న బిడ్డింగ్ ముగిసే సమయానికి ఇష్యూ 62.97 రెట్లు సబ్స్క్రైబ్ అయింది. QIB విభాగం 145.38 రెట్లు, NII 73.89 రెట్లు, రిటైల్ 11.81 రెట్లు బుక్ అయ్యాయి. గ్రే మార్కెట్లో రూ.40 GMP నమోదైంది. ఆగస్టు 24న లిస్టింగ్ అయ్యే అవకాశం ఉంది.
Updated on: Aug 19, 2026 | 7:21 PM
లలితా జ్యువెలరీ మార్ట్ లిమిటెడ్ ఇనీషియల్ పబ్లిక్ ఆఫరింగ్ (IPO)కు ఇన్వెస్టర్ల నుంచి భారీ స్పందన లభించింది. ఆగస్టు 17న ప్రారంభమైన మూడు రోజుల బిడ్డింగ్ ప్రక్రియ ఆగస్టు 19తో ముగిసింది. ఒక్కో షేరుకు రూ.190–రూ.201 ధరల శ్రేణిలో వచ్చిన ఈ రూ.1,700 కోట్ల ఇష్యూ.. చివరి రోజు సాయంత్రం 5 గంటల సమయానికి 62.97 రెట్లు సబ్స్క్రైబ్ అయింది.
ఏ కేటగిరీలో ఎంత సబ్స్క్రిప్షన్?
ఇన్వెస్టర్ల విభాగాల వారీగా చూస్తే క్వాలిఫైడ్ ఇన్స్టిట్యూషనల్ బయ్యర్స్ (QIB) విభాగం ఏకంగా 145.38 రెట్లు సబ్స్క్రైబ్ అయింది. నాన్-ఇన్స్టిట్యూషనల్ ఇన్వెస్టర్స్ (NII) విభాగం 73.89 రెట్లు, రిటైల్ ఇన్వెస్టర్ల వాటా 11.81 రెట్లు బుక్ అయింది. మొత్తం ఇష్యూ విలువ రూ.1,700 కోట్లు కాగా, ఇందులో రూ.1,200 కోట్ల ఫ్రెష్ ఇష్యూ, రూ.500 కోట్ల ఆఫర్ ఫర్ సేల్ ఉన్నాయి.
గ్రే మార్కెట్లో రూ.40 ప్రీమియం
ఇదిలా ఉంటే లలితా జ్యువెలరీ మార్ట్ IPOపై గ్రే మార్కెట్ సెంటిమెంట్ కూడా పాజిటివ్గా ఉంది. మార్కెట్ పరిశీలకుల ప్రకారం ఆగస్టు 19న షేర్లు రూ.40 GMP (గ్రే మార్కెట్ ప్రీమియం)తో ట్రేడ్ అవుతున్నాయి. IPO గరిష్ఠ ధర రూ.201గా ఉండటంతో, ఈ GMP ఆధారంగా సుమారు రూ.241 వద్ద లిస్టింగ్ అయ్యే అవకాశం ఉందని అంచనా. అంటే ఇష్యూ ధరతో పోలిస్తే దాదాపు 20 శాతం ప్రీమియం సూచిస్తున్నట్లవుతుంది. అయితే GMP అనేది అధికారిక లిస్టింగ్ ధరకు హామీ కాదు.
బ్రోకరేజ్ సంస్థల నుంచి ‘సబ్స్క్రైబ్’ రేటింగ్
IPO విలువ, కంపెనీ వృద్ధి అవకాశాలను పరిశీలించిన పలు బ్రోకరేజ్ సంస్థలు సానుకూల అభిప్రాయాలు వ్యక్తం చేశాయి. కంపెనీ బ్రాండ్, విస్తరించగల వ్యాపార నమూనా, రాబడి నిష్పత్తులు, ఆర్గనైజ్డ్ జ్యువెలరీ రిటైల్ రంగంలో వృద్ధి అవకాశాలను దృష్టిలో ఉంచుకుని కొన్ని సంస్థలు ‘సబ్స్క్రైబ్’ రేటింగ్ ఇచ్చాయి. అయితే పెట్టుబడిదారులు కంపెనీ ఆర్థిక పరిస్థితులు, విలువ, మార్కెట్ రిస్క్లను స్వయంగా పరిశీలించాల్సి ఉంటుంది.
ఆగస్టు 20న అలాట్మెంట్.. 24న లిస్టింగ్?
షెడ్యూల్ ప్రకారం లలితా జ్యువెలరీ మార్ట్ IPOకు ఆగస్టు 20న షేర్ అలాట్మెంట్ ఖరారయ్యే అవకాశం ఉంది. రీఫండ్, డీమ్యాట్లో షేర్ల క్రెడిట్ ప్రక్రియ ఆగస్టు 21న జరగనుంది. ఇక ఆగస్టు 24, 2026న లిస్టింగ్ అయ్యే అవకాశం ఉంది. అయితే IPOలో భారీ సబ్స్క్రిప్షన్, GMP ఉన్నప్పటికీ లిస్టింగ్ లాభాలు ఖచ్చితమని భావించకూడదు. గ్రే మార్కెట్ ప్రీమియం మారుతూ ఉంటుంది కాబట్టి పెట్టుబడిదారులు తమ రిస్క్ సామర్థ్యాన్ని బట్టి నిర్ణయం తీసుకోవడం కీలకం.
