Driving License Rules: ఇక డ్రైవింగ్‌ టెస్ట్‌ కోసం ఆర్‌టీవో ఆఫీస్‌ వెళ్లాల్సిన అవసరం లేదు.. లైసెన్స్‌ నిబంధనల్లో మార్పు

Driving License New Rules: భారత్‌లో వాహనాల సంఖ్య క్రమంగా పెరుగుతోంది. ముఖ్యంగా కోవిడ్ లాక్‌డౌన్ సమయంలో చాలా మంది మోటార్‌బైక్‌లు లేదా కార్ల కొనుగోలు వైపు మొగ్గు చూపారు. అయితే ప్రతి ఒక్కరూ రోడ్డుపై బాధ్యతాయుతంగా నడపడం లేదు. తాజాగా పూణెలో జరిగిన ప్రమాదం ఇందుకు నిదర్శనం. 17 ఏళ్ల బాలుడు మద్యం తాగి పోర్షే కారు నడుపుతూ ఇద్దరు ఐటీ ఉద్యోగులపై తీసుకెళ్లాడు. ఈ పరిస్థితిలో కేంద్ర రోడ్డు రవాణా, రహదారుల మంత్రిత్వ శాఖ జూన్ 1 నుండి కొత్త డ్రైవింగ్ లైసెన్స్ రూల్స్ 2024 ను అమలు చేయబోతోంది. కొత్త నిబంధనల ప్రకారం.. డ్రైవింగ్ లైసెన్స్ పొందడానికి ప్రాంతీయ రవాణా కార్యాలయం లేదా ఆర్టీఓ వద్ద డ్రైవింగ్ పరీక్షకు రాయాల్సిన అవసరం లేదు. మీరు ఈ కొత్త నిబంధనలను ఉల్లంఘిస్తే మీరు 25,000 రూపాయల వరకు జరిమానా చెల్లించవలసి ఉంటుంది. కొత్త రూల్ అమల్లోకి రాకముందే, దాని గురించి తెలుసుకోవడం చాలా ముఖ్యం.

ప్రైవేట్ ఇన్‌స్టిట్యూట్‌లలో డ్రైవింగ్ టెస్ట్: జూన్ 1 నుంచి ప్రభుత్వ ప్రాంతీయ రవాణా కార్యాలయాల్లో కాకుండా ప్రైవేట్ డ్రైవింగ్ శిక్షణ కేంద్రాల్లో డ్రైవింగ్ టెస్ట్ నిర్వహించవచ్చు. ఈ సంస్థలకు లైసెన్స్ అర్హత కోసం పరీక్షలు నిర్వహించి సర్టిఫికెట్లు జారీ చేసేందుకు ప్రభుత్వ అనుమతి ఇస్తోంది. ఈ ఆమోదం పొందడానికి ప్రైవేట్ డ్రైవింగ్ పాఠశాలలకు మంత్రిత్వ శాఖ కొన్ని కొత్త నిబంధనలను జారీ చేసింది. డ్రైవింగ్ పాఠశాలలకు కనీసం 1 ఎకరం భూమి ఉండాలి. ఫోర్ వీలర్ శిక్షణ కోసం కనీసం 2 ఎకరాలు.

ట్రైనర్ అర్హతలు: ట్రైనర్ తప్పనిసరిగా హైస్కూల్ డిప్లొమా లేదా తత్సమాన విద్యార్హత కలిగి ఉండాలి. అలాగే, అతనికి కనీసం 5 సంవత్సరాల డ్రైవింగ్ అనుభవం ఉండాలి. అలాగే, బయోమెట్రిక్స్, ఐటీ సిస్టమ్స్‌ అనుభవం ఉండాలి.

శిక్షణ వ్యవధి: తేలికపాటి మోటారు వాహనాలకు 4 వారాల్లో 29 గంటల శిక్షణ. ఇందులో 8 గంటలు థియరీకి, మిగిలిన 21 గంటలు ప్రాక్టికల్ శిక్షణకు ఇస్తారు. భారీ వాహనాలకు 6 వారాల్లో కనీసం 38 గంటల శిక్షణ. ఇందులో 8 గంటలు థియరీకి, 30 గంటలు ప్రాక్టికల్ శిక్షణకు ఇస్తారు.

పర్యావరణ పరిరక్షణకు ప్రాధాన్యత: కాలుష్యాన్ని తగ్గించడం కొత్త నిబంధనల లక్ష్యాలలో ఒకటి. ఇందుకోసం దాదాపు 9 లక్షల పాత ప్రభుత్వ వాహనాలను దశలవారీగా రద్దు చేయడంతోపాటు వాహన ఉద్గారాలపై కఠిన నిబంధనలను అమలు చేయనున్నారు.

జరిమానా: అనుమతించదగిన వేగం కంటే వేగంగా డ్రైవ్ చేస్తే రూ. 1000 నుండి 2000 వరకు జరిమానా విధించబడుతుంది. అయితే మైనర్ అతివేగంతో వాహనం నడుపుతూ పట్టుబడితే రూ.25వేలు జరిమానా చెల్లించాల్సి ఉంటుంది. దీంతో పాటు వాహన యజమాని రిజిస్ట్రేషన్ కూడా రద్దు కానుంది. మైనర్‌కు 25 సంవత్సరాల వయస్సు వచ్చే వరకు డ్రైవింగ్ లైసెన్స్ ఇవ్వబడదు. లైసెన్స్ లేకుండా వాహనం నడుపుతూ పట్టుబడితే రూ.500 జరిమానా విధిస్తారు. హెల్మెట్ ధరించకుండా మోటార్ బైక్ నడిపితే రూ.100 జరిమానా, సీటు బెల్టు పెట్టుకోకుండా కారు నడిపితే రూ.100 జరిమానా విధిస్తారు.

దరఖాస్తు ప్రక్రియ: మొత్తంగా దరఖాస్తు ప్రక్రియ మునుపటి మాదిరిగానే ఉంటుంది. ప్రత్యేక మార్పులు చేయలేదు. https://parivahan.gov.inని సందర్శించడం ద్వారా ఆన్‌లైన్ లేదా ఆఫ్‌లైన్‌లో దరఖాస్తు చేసుకోండి. అయితే రోడ్డు రవాణా, రహదారుల మంత్రిత్వ శాఖ కొత్త లైసెన్స్‌ల కోసం అవసరమైన పత్రాలను సమర్పించే విధానాన్ని సులభతరం చేసింది. దరఖాస్తు రుసుము కోరిన లైసెన్స్ రకాన్ని బట్టి ఉంటుంది. పత్రాలను సమర్పించడానికి, డ్రైవింగ్ నైపుణ్యాలను నిరూపించుకోవడానికి ఆర్టీవోకి వెళ్లవలసిన అవసరం లేదు.

మరిన్ని బిజినెస్ వార్తల కోసం ఇక్కడ క్లిక్ చేయండి