ముగ్గురికి ముళ్ళ పరీక్ష.. వ్యూహం ఇదే!
తెలంగాణ మునిసిపల్ ఎన్నికలు మూడు రాజకీయ పార్టీలకేమో గానీ ముగ్గురు ఎంపీలకు పరీక్షగా మారాయంటున్నరు తెలంగాణ బీజేపీ వర్గాలు. గత ఎన్నికల్లో అనూహ్యంగా ఎంపీలుగా గెలిచిన నిజామాబాద్, ఆదిలాబాద్, కరీంనగర్ ఎంపీలకు ఇప్పుడు వారివారి నియోజకవర్గాల పరిధిలో వున్న మునిసిపాలిటీలలో బిజెపిని గెలిపించుకోవడం సవాల్‌గా మారింది. మొన్నటి పార్లమెంటు ఎన్నికల్లో వారి జోరుకు టీఆర్ఎస్, కాంగ్రెస్ అభ్యర్థులు కుదేలయ్యారు. కానీ ఇప్పుడు పరిస్థితి భిన్నంగా మారింది. దాంతో వారికి మునిసిపల్ ఎన్నికలుపరీక్షగా మారాయి. బండి సంజయ్… కరీనంగర్‌లో […]
Updated on: Dec 31, 2019 | 8:15 AM
తెలంగాణ మునిసిపల్ ఎన్నికలు మూడు రాజకీయ పార్టీలకేమో గానీ ముగ్గురు ఎంపీలకు పరీక్షగా మారాయంటున్నరు తెలంగాణ బీజేపీ వర్గాలు. గత ఎన్నికల్లో అనూహ్యంగా ఎంపీలుగా గెలిచిన నిజామాబాద్, ఆదిలాబాద్, కరీంనగర్ ఎంపీలకు ఇప్పుడు వారివారి నియోజకవర్గాల పరిధిలో వున్న మునిసిపాలిటీలలో బిజెపిని గెలిపించుకోవడం సవాల్‌గా మారింది. మొన్నటి పార్లమెంటు ఎన్నికల్లో వారి జోరుకు టీఆర్ఎస్, కాంగ్రెస్ అభ్యర్థులు కుదేలయ్యారు. కానీ ఇప్పుడు పరిస్థితి భిన్నంగా మారింది. దాంతో వారికి మునిసిపల్ ఎన్నికలుపరీక్షగా మారాయి.
బండి సంజయ్… కరీనంగర్‌లో ఎమ్మెల్యేగా ఓడి, ఎంపీగా గెలిచారు. ధర్మపురి అరవింద్.. నిజామాబాద్‌లో ఏకంగా కేసీఆర్ కూతురు కవితను ఓడించారు. సోయం బాపురావు.. ఆదీవాసీల సత్తా ఏంటో చాటి పార్లమెంటు మెట్లెక్కారు. ఈ ముగ్గురు ఎంపీలు పార్లమెంట్‌ ఎన్నికల్లో బీజేపీ తరపున గెలిచారు. ప్రస్తుతం వీరు ప్రాతినిధ్యం వహిస్తున్న కరీంనగర్, నిజామాబాద్, ఆదిలాబాద్ పార్లమెంట్‌ స్థానాల్లో మున్సిపల్‌ ఎన్నికలు జరగబోతున్నాయి. ఈ ఎన్నికల్లో బీజేపీ తరపున మెజార్టీ సీట్లు గెలవాలనేది వీరికి అధిష్టానం ఇచ్చిన టార్గెంట్.
పార్లమెంట్‌ ఎన్నికల్లో ఈ ముగ్గురి పర్సనల్‌ ఎజెండా నరేంద్ర మోదీ చరిష్మా జతవ్వడంతో విజయం సాధించారనే వాదన ఉంది. దీంతో ఇప్పుడు మున్సిపల్‌ ఎన్నికల్లో మెజార్టీ సీట్లు గెలిచి…తమ సత్తా చాటాలని ఈ నేతలు భావిస్తున్నారట. ఈ ఎన్నికలు కరీంనగర్ ఎంపీ సంజయ్‌కు కీలకంగా మారాయి. మోదీ హవాకు తనపై వున్న సింపతీ తోడవ్వడంతో సంజయ్ కరీంనగర్ ఎంపీగా విజయం సాధించారు. అయితే ఆ తర్వాత జరిగిన స్థానిక సంస్థల ఎన్నికల్లో బీజేపీ ఆశించిన ఫలితాలు రాలేదు. దీంతో ఇప్పుడు జరిగే మున్సిపల్‌ ఎన్నికలోనైనా సత్తా చాటాలని సంజయ్ భావిస్తున్నారు.
గత మున్సిపల్‌ ఎన్నికల్లో వేములవాడ మినహా ఎక్కడ బీజేపీ పెద్దగా సీట్లు సాధించలేదు. కౌన్సిలర్‌ నుంచి ఎంపీగా విజయం సాధించిన సంజయ్‌పై ఇప్పుడు భారీ అంచనాలు ఉన్నాయి. కరీంనగర్ కార్పొరేషన్‌తో పాటు నాలుగు మున్సిపాలిటీల్లో జెండా ఎగురవేస్తామన్న ధీమా బీజేపీలో కనిపిస్తోంది.
నిజామాబాద్ ఎంపీ ధర్మపురి అరవింద్‌కి మొన్నటి ఎన్నికల్లో కాలం కలిసివచ్చింది. పసుపు బోర్డు విషయం తేలకపోవడంతో ఇపుడు ప్రజల నుండి తీవ్ర వ్యతిరేకత వస్తోంది. దీంతో ఈ సారి ఆయన లోకల్‌ సెంటిమెంట్ ప్లే చేసే పనిలో పడ్డారు. కార్పొరేషన్‌ గెలిస్తే నిజామాబాద్ పేరు మారుస్తామని ప్రచారం చేస్తున్నారు. అయితే ఈ సారి ఈ లోకల్‌ సెంటిమెంట్ అరవింద్‌కు కలిసి వస్తుందా? లేదా? అనేది చూడాలి.
ఆదిలాబాద్ ఎంపీ సోయం బాపురావు తుడుందెబ్బ అధ్యక్షుడు. ఎన్నికల ముందు కాంగ్రెస్ నుండి బీజేపీకి మారిన ఆయన…ఆదివాసీ సెంటిమెంట్‌తో ఎంపీ అయ్యారు. ఖానాపూర్‌, బోథ్‌, ఆసిఫాబాద్‌లో బలమైన ఓటు బ్యాంక్‌ సోయం సొంతం. లోకల్‌ ఎలక్షన్స్‌లో పట్టుమని పది సీట్లు కూడా బీజేపీ గెలవలేకపోయింది. అయితే ఈ సారి మున్సిపల్‌ ఎన్నికల్లో సత్తా చాటాలని సోయం బాపురావు ప్రయత్నిస్తున్నారు.
