Poultry: వారంలో 2 రోజులు కోళ్లకు ఈ ఆకులు మేతగా వేస్తే చాలు.. మీరు ఊహించలేరు..

కోళ్ళ పెంపకంలో వాటి ఆరోగ్యం అత్యంత కీలకం. వ్యాధులు రాకుండా నివారించడానికి, కోళ్ళ ఎదుగుదలను ప్రోత్సహించడానికి మునగాకు, అవిశ ఆకు, సుబాబుల్ ఆకుల వినియోగం ఒక అద్భుతమైన సహజసిద్ధమైన పరిష్కారం. ఈ ఆకులను వారానికి మూడు నుంచి నాలుగు సార్లు అందించడం వల్ల చాలా ప్రయోజనాలు కలుగుతాయి. మునగాకులో ఫైబర్ కంటెంట్ అధికంగా ఉండటం వల్ల ఇది కోళ్ళ జీర్ణవ్యవస్థను మెరుగుపరుస్తుంది. సక్రమమైన జీర్ణక్రియ వల్ల కోడికి ఆహారం బాగా అరిగి, దాని నుంచి పోషకాలను సమర్థవంతంగా గ్రహిస్తుంది. ఇది కోడి ఎదుగుదలకు, బరువు పెరగడానికి దోహదపడుతుంది. మంచి అరుగుదల ఉన్న కోడి చురుకుగా ఉంటుంది. అలాగే మునగాకులో విటమిన్ సి, జింక్ పుష్కలంగా ఉంటాయి, ఇవి కోడి రోగనిరోధక శక్తిని బలోపేతం చేస్తాయి. దీంతో జలుబు, తుమ్ములు, దగ్గు, గురక వంటి శ్వాసకోశ సమస్యలు, ఇతర వైరల్ వ్యాధులు రాకుండా కోళ్ళు రక్షించబడతాయి. మునగాకు కాలేయ పనితీరును కూడా మెరుగుపరుస్తుంది, ఇది కోడి ఆరోగ్యానికి ఎంతో అవసరం. ఈ ఆకులను అందించడం వల్ల గుడ్ల సైజు కూడా మెరుగవుతుంది.

వ్యాధుల నివారణకు ఖరీదైన మందులు వాడే బదులు, మునగాకు, అవిశ ఆకు, సుబాబుల్ ఆకులను ముందు నుంచే అందించడం చాలా లాభదాయకం. సుబాబుల్ ఆకులో అధిక మోతాదులో ప్రోటీన్ ఉంటుంది, ఇది కోడికి అవసరమైన ప్రోటీన్ లోపాన్ని తీరుస్తుంది. ఈ మూడు ఆకులను వారానికి ఒకటి లేదా రెండు సార్లు ఇవ్వవచ్చు. కోళ్ళకు ఈ ఆకులను అందించే పద్ధతి కూడా సులభం. ఆకులను కోసి నేరుగా షెడ్‌లో వేయవచ్చు. కోళ్ళు వాటిని పొడుచుకుని తింటాయి. ఉదాహరణకు, సాయంత్రం సమయంలో ఆకులను వేస్తే, మరుసటి ఉదయం నాటికి కేవలం కాడలు మాత్రమే మిగిలి ఉంటాయి. ఒకవేళ కోళ్ళు వెంటనే తినకపోతే, ఆకులను కాడలు లేకుండా చిన్న ముక్కలుగా చేసి, తవుడు లేదా అన్నంలో కలిపి పెట్టవచ్చు. ఇలా నాలుగైదు సార్లు అలవాటు చేస్తే, కోళ్ళు అలవాటు పడి నేరుగా తినడం ప్రారంభిస్తాయి. పెద్ద ఫామ్‌లలో (300-400 కోళ్ళు) కొమ్మలతో సహా తెచ్చి షెడ్‌లో వేలాడదీయవచ్చు లేదా నేలపై వేయవచ్చు, అవి ఆకులను మాత్రమే తిని కాండాలను వదిలేస్తాయి. చిన్న పిల్లల నుంచి గుడ్లు పెట్టే కోళ్ళ వరకు, పెద్ద పందేపు కోళ్ళ వరకు అన్ని రకాల కోళ్ళకు ఈ ఆకులను నిర్భయంగా అందించవచ్చు. ఈ సహజసిద్ధమైన పద్ధతిని పాటించడం ద్వారా కోళ్ళు ఆరోగ్యంగా, చురుకుగా ఉండి, ఫామ్‌లో మరణాల రేటు బాగా తగ్గుతుంది.

Also Read: ఇలా చేస్తే.. నిమిషాల్లోనే ఇంట్లో ఉన్న బల్లులన్నీ పరార్..