Weather: అడపాదడపా జల్లులే.. వచ్చే 3 రోజులు ఏపీలో వాతావరణం ఇలా..
Andhra Pradesh Weather: ఆంధ్రప్రదేశ్లో రాబోయే మూడు రోజుల పాటు పలు ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉందని భారత వాతావరణ శాఖ అమరావతి కేంద్రం తెలిపింది. ఉత్తర కోస్తా, రాయలసీమలో ఉరుములు, మెరుపులతో పాటు గంటకు 40-50 కి.మీ వేగంతో ఈదురుగాలులు వీచే అవకాశం ఉందని ప్రజలను అప్రమత్తంగా ఉండాలని సూచించింది.
Updated on: Jul 10, 2026 | 1:48 PM
ఏపీలో దిగువ ట్రోపో ఆవరణంలో నైరుతి, పశ్చిమ దిశల నుంచి గాలులు వీస్తున్న నేపథ్యంలో రాబోయే మూడు రోజుల పాటు పలు ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉందని భారత వాతావరణ శాఖ అమరావతి కేంద్రం వెల్లడించింది. కొన్ని ప్రాంతాల్లో ఉరుములు, మెరుపులతో పాటు గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశముందని తెలిపింది.
ఉత్తర కోస్తా ఆంధ్రప్రదేశ్, యానాం :
శుక్రవారం ఉత్తర కోస్తా జిల్లాలు, యానాంలో కొన్ని చోట్ల తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. ఒకటి లేదా రెండు ప్రాంతాల్లో ఉరుములు, మెరుపులు సంభవించవచ్చు. గంటకు 40-50 కిలోమీటర్ల వేగంతో బలమైన గాలులు వీచే అవకాశం ఉంది.
శనివారం కూడా ఒకటి లేదా రెండు చోట్ల తేలికపాటి నుంచి మోస్తరు వర్షాలు లేదా జల్లులు కురిసే అవకాశముండగా, 40-50 కిలోమీటర్ల వేగంతో ఈదురుగాలులు వీచే అవకాశం ఉంది.
ఆదివారం ఒకటి లేదా రెండు ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉంది. గాలుల వేగం గంటకు 30-40 కిలోమీటర్ల వరకు ఉండొచ్చని వాతావరణ శాఖ పేర్కొంది.
దక్షిణ కోస్తా ఆంధ్రప్రదేశ్
దక్షిణ కోస్తా జిల్లాల్లో శుక్రవారం, శనివారం ఒకటి లేదా రెండు చోట్ల తేలికపాటి నుంచి మోస్తరు వర్షాలు కురిసే అవకాశం ఉంది. ఈ రెండు రోజులు గంటకు 40-50 కిలోమీటర్ల వేగంతో బలమైన గాలులు వీచే అవకాశం ఉంది.
ఆదివారం మాత్రం దక్షిణ కోస్తాలో పొడి వాతావరణం నెలకొనే అవకాశం ఉందని, అయితే గంటకు 30-40 కిలోమీటర్ల వేగంతో గాలులు వీచే అవకాశముందని అధికారులు తెలిపారు.
రాయలసీమలోనూ వర్ష సూచన
రాయలసీమలో శుక్రవారం ఒకటి లేదా రెండు చోట్ల తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. కొన్ని ప్రాంతాల్లో ఉరుములు, మెరుపులు సంభవించవచ్చు. గంటకు 40-50 కిలోమీటర్ల వేగంతో బలమైన గాలులు వీచే అవకాశం ఉంది.
శనివారం కూడా ఒకటి లేదా రెండు చోట్ల తేలికపాటి నుంచి మోస్తరు వర్షాలు లేదా జల్లులు కురిసే అవకాశముండగా, అదే స్థాయిలో ఈదురుగాలులు వీచే అవకాశం ఉంది.
ఆదివారం రాయలసీమలో పొడి వాతావరణం ఏర్పడే అవకాశముందని, గాలుల వేగం గంటకు 30-40 కిలోమీటర్ల వరకు నమోదయ్యే అవకాశం ఉందని వాతావరణ శాఖ వెల్లడించింది.
ఉరుములు, మెరుపులు సంభవించే సమయంలో చెట్ల కింద నిలబడకుండా జాగ్రత్తలు తీసుకోవాలని, బలమైన గాలుల కారణంగా రైతులు, మత్స్యకారులు, సాధారణ ప్రజలు అప్రమత్తంగా ఉండాలని వాతావరణ శాఖ సూచించింది. స్థానిక వాతావరణ పరిస్థితులను ఎప్పటికప్పుడు గమనిస్తూ అధికారుల సూచనలు పాటించాలని కోరింది.
